ନୂଆଦିଲ୍ଲୀ,୧।୮ : ପୀୟୂଷ ଗୋୟଲଙ୍କ ସହ ମତଭେଦ ଯୋଗୁ ରିଜର୍ଭ ବ୍ୟାଙ୍କର ପୂର୍ବତନ ଗଭର୍ନର ଉର୍ଜିତ ପଟେଲ ତାଙ୍କ ପଦବୀରୁ ଇସ୍ତଫା ଦେଇଥିଲେ। ଉର୍ଜିତ ସିଧାସଳଖ ଭାବେ ପୀୟୂଷ ଗୋୟଲଙ୍କ ନାମ ନ ଉଠାଇ କହିଛନ୍ତି ଯେ, ତତ୍କାଳୀନ ଅର୍ଥମନ୍ତ୍ରୀଙ୍କ ସହ ତାଙ୍କର ମତଭେଦ ରହିଥିଲା। ସେହି ସମୟରେ ଆସିଥିବା ଦେବାଳିଆ ଆଇନରେ ବିଭିନ୍ନ ଦିଗକୁ ନେଇ ସରକାରଙ୍କ ସହ ତାଙ୍କର ପଡି ନ ଥିଲା। ସେହି ଆଇନରେ ରହିଥିବା ବିଭିନ୍ନ ତ୍ରୁଟି ସମ୍ପର୍କରେ ଉର୍ଜିତ ସରକାରଙ୍କୁ କହିବାରୁ ରୋଷର ଶିକାର ହୋଇଥିବା କୁହାଯାଇଛି। ଉର୍ଜିତ ଏହି ପ୍ରସଙ୍ଗକୁ ତାଙ୍କ ନୂଆ ପୁସ୍ତକ ଓଭର ଡ୍ରାଫ୍ଟ ସେଭିଂ ଦି ଇଣ୍ଡିଆନ ସେଭର ପୁସ୍ତକରେ ଉଲ୍ଲେଖ କରିଛନ୍ତି। ପୁସ୍ତକରେ ସେ ପୀୟୂଷଙ୍କ ନାମକୁ ସିଧାସଳଖ ଉଲ୍ଲେଖ କରି ନ ଥିଲେ ମଧ୍ୟ ୨୦୧୮ର ମଧ୍ୟଭାଗରେ ସେ ଯେଉଁ ସମୟର କଥା କହୁଛନ୍ତି ସେହି ସମୟରେ ପୀୟୂଷ ଗୋୟଲଙ୍କୁ କିଛି ସମୟ ଲାଗି ଅର୍ଥମନ୍ତ୍ରୀ ଦାୟିତ୍ୱ ଭାର ପ୍ରଦାନ କରାଯାଇଥିଲା। ମେ ୨୦୧୮ ଠାରୁ ଅଗଷ୍ଟ ୨୦୧୮ ମଧ୍ୟରେ ଗୋୟଲ ଦାୟିତ୍ୱରେ ରହିଥିଲେ। ପୁସ୍ତକରେ ଗୋୟଲଙ୍କୁ ଉର୍ଜିତ ଟାର୍ଗେଟ କରିଥିବା ନଜରରେ ଆସିଛି। ଦେବାଳିଆ ଆଇନରେ ଆସିଥିବା ସର୍କୁଲାରକୁ ପରିବର୍ତ୍ତନ କରିବା ତଥା କୋହଳ କରିବା ଲାଗି ଗୋୟଲ କହିଥିଲେ। ସେ ମିଡିଆ ଆଗରେ କହିଥିଲେ ଯେ, ୯୦ ଦିନ ପରେ ମଧ୍ୟ କୌଣସି ଋଣକୁ ଏନ୍ପିଏ କୁହାଯାଇପାରିବ ନାହିଁ। ପୂର୍ବତନ ଅର୍ଥମନ୍ତ୍ରୀ ଅରୁଣ ଜେଟ୍ଲୀଙ୍କ ନେତୃତ୍ୱରେ ଦେବାଳିଆ ଆଇନକୁ ସରକାର ଆଗକୁ ବଢାଇଥିଲେ। ହେଲେ ତାଙ୍କର ସ୍ବାସ୍ଥ୍ୟ ଖରାପ ହେବା ପରେ ଗୋୟଲଙ୍କୁ କିଛି ସମୟ ଅର୍ଥମନ୍ତ୍ରୀ ଦାୟିତ୍ୱରେ ରହିବାକୁ ପଡିଥିଲା। ନିଜ କାର୍ଯ୍ୟକାଳ ଶେଷ ହେବାର ଆଠ ମାସ ଆଗରୁ ଉର୍ଜିତ ଇସ୍ତଫା ଦେଇଥିଲେ। ଉର୍ଜିତଙ୍କ କାର୍ଯ୍ୟକାଳ ସମୟରେ ଆସିଥିବା ନୋଟ୍ବନ୍ଦୀ ସମ୍ପର୍କରେ ତାଙ୍କ ନୂଆ ପୁସ୍ତକରେ କୌଣସି ଉଲ୍ଲେଖ ନାହିଁ। ସେହିଭଳି ଏଲ୍ଆଇସି ଦ୍ୱାରା ଆଇଡିବିଆଇ ବ୍ୟାଙ୍କ କ୍ରୟ ବିରୋଧରେ ମଧ୍ୟ ଉର୍ଜିତ ରହିଥିଲେ ବୋଲି ପୁସ୍ତକରେ କୁହାଯାଇଛି।