ବମ୍ବେ: ନାୟିକା ନୁହେଁ ବରଂ ଖଳନାୟିକା ଭାବେ ଖ୍ୟାତି ଅର୍ଜନ କରିଛନ୍ତି ଲୋକପ୍ରିୟ ଟେଲି ଅଭିନେତ୍ରୀ ଉର୍ବଶୀ ଢ଼ୋଲକିଆ। ଆଜି ବି ଦର୍ଶକ ତାଙ୍କର ଚରିତ୍ର ‘କୋମଲିକା’କୁ ବେଶ୍ ପସନ୍ଦ କରନ୍ତି। ଅଭିନୟକୁ ନେଇ ଉର୍ବଶୀ ଯେତେ ଚର୍ଚ୍ଚିତ ତା’ଠାରୁ ଅଧିକ ସେ ବ୍ୟକ୍ତିଗତ ଜୀବନକୁ ନେଇ। ୧୬ ବର୍ଷ ବୟସରେ ତାଙ୍କର ବିବାହ ହୋଇଥିଲା। ୧୭ ବର୍ଷ ହୋଇଥିବା ବେଳେ ସେ ଜାଆଁଳା ସନ୍ତାନର ଜନନୀ ହୋଇଥିଲେ। ଉଭୟଙ୍କ ନାମ ସେ ସାଗର ଏବଂ କ୍ଷିତିଜ୍ ରଖିଥିଲେ। ବିବାହର ଦୁଇ ବର୍ଷ ପରେ ସେ ନିଜ ସ୍ବାମୀଙ୍କଠାରୁ ଅଲଗା ହୋଇଯାଇଥିଲେ। ଏହାପରେ ଉର୍ବଶୀ କେବେହେଲେ ବିବାହ କରିବେ ନାହିଁ ବୋଲି ନିଷ୍ପତ୍ତି ନେଇଥିଲେ।
ଉର୍ବଶୀଙ୍କ ନାମ କିନ୍ତୁ ଏକାଧିକ ଲୋକଙ୍କ ସହ ଯୋଡ଼ାଯାଇଛି। ପ୍ରଥମେ ତାଙ୍କ ନାମ ଅଭିନେତା ଅନୁଜ ସଚଦେବାଙ୍କ ସହ ଯୋଡ଼ା ଯାଇଥିଲା। ଉଭୟ କିଛି ଦିନ ପରସ୍ପରକୁ ଡେଟ୍ କରିଥିଲେ। ହେଲେ ପରେ ସେମାନଙ୍କ ବ୍ରେକ୍ଅପ୍ ହୋଇଯାଇଥିଲା। ଅନୁଜଙ୍କ ସହ ସେ ‘ନଚ ବଲିୟେ’ରେ ନଜର ଆସିଥିଲେ। ପରେ ଉର୍ବଶୀଙ୍କ ନାମ ଜଣେ ବ୍ୟବସାୟୀଙ୍କ ସହ ଯୋଡ଼ା ଯାଇଥିଲା। ହେଲେ ଏହା ଗୁଜବ ବୋଲି ସେ ସ୍ପଷ୍ଟିକରଣ ଦେଇଥିଲେ।
ଦୀର୍ଘ ଦିନରୁ ଛୋଟ ପରଦାରୁ ଦୂରେଇ ଯାଇଥିଲେ ହେଁ ଏବେ ଉର୍ବଶୀ ପୁଣି ଫେରୁଛନ୍ତି। ଖୁବ୍ଶୀଘ୍ର ତାଙ୍କୁ କର୍ଲସ ଚ୍ୟାନେଲରେ ପ୍ରସାରିତ ହେବାକୁ ଥିବା ‘ନାଗିନ୍-୬’ ଧାରାବାହିକରେ ଦେଖିବାକୁ ମିଳିବ। ଏହା ଜଣା ପଡ଼ିବା ପରେ ପ୍ରଶଂସକଙ୍କ ଉତ୍କଣ୍ଠା ବଢ଼ିଛି।
