ମୁମ୍ବାଇ: ବଲିଉଡ୍ ଅଭିନେତ୍ରୀ ଉର୍ବଶୀ ରୌତେଲା ନିଜର ଅଭିନୟ ସହିତ ତାଙ୍କର ଫିଟନେସକୁ ନେଇ ସବୁବେଳେ ଚର୍ଚ୍ଚାରେ ରହିଥାନ୍ତି । ସୋସିଆଲ ମିଡ଼ିଆରେ ମଧ୍ୟ ସେ ବେଶ୍ ଆକ୍ଟିଭ। ନିକଟରେ ସେ ପ୍ରଶଂସକଙ୍କ ସହ ଏକ ଖୁସି ଖବର ବାଣ୍ଟିଛନ୍ତି। ସେଇଟି ହେଲା ୟୁଏଇ ଦ୍ବାରା ତାଙ୍କୁ ମିଳିଥିବା ଗୋଲ୍ଡେନ୍ ଭିସା। ସେ ନିଜର ଏକ ଫଟୋ ତାଙ୍କର ସୋସିଆଲ ମିଡିଆ ଆକାଉଣ୍ଟରେ ଶେୟାର କରି ଏହା କହିଛନ୍ତି। କ୍ୟାପ୍ଶନରେ ଉର୍ବଶୀ ଲେଖିଛନ୍ତି, ପ୍ରଥମ ଭାରତୀୟ ଅଭିନେତ୍ରୀ ଭାବେ ମାତ୍ର ୧୨ ଘଣ୍ଟା ମଧ୍ୟରେ ୧୦ ବର୍ଷ ଯାଏ ଏହି ଗୋଲ୍ଡେନ୍ ଭିସା ମିଳିଛି। ଏହାକୁ ନେଇ ସେ ୟୁଏଇ ସରକାରଙ୍କୁ ଧନ୍ୟବାଦ ଜଣାଇଛନ୍ତି। ତେବେ ଭିସା ମିଳିବା ପରେ ସେ ଖୁସି ଥିବା ଦେଖାଯାଉଛି।
ବର୍ତ୍ତମାନ ଉର୍ବଶୀ ଗୋଲ୍ଡେନ୍ ଭିସା ପାଇ ଆଗାମୀ ୧୦ ବର୍ଷ ପାଇଁ ୟୁଏଇରେ ରହିପାରିବେ। ଏହା ପୂର୍ବରୁ ବ୍ୟବସାୟୀ, ନିବେଶକ ଏବଂ ଡାକ୍ତରମାନଙ୍କୁ ଗୋଲ୍ଡେନ ଭିସା ଦିଆଯାଉଥିଲା। ଏହି ଭିସା ନିବେଶକ, ଉଦ୍ୟୋଗୀ, ଅନୁସନ୍ଧାନକାରୀ, ଡାକ୍ତରୀ ବୃତ୍ତିଗତ, ବୈଜ୍ଞାନିକ ଏବଂ ଛାତ୍ରମାନଙ୍କ ପାଇଁ ଉପଲବ୍ଧ ଥିଲା। କିନ୍ତୁ ସାମ୍ପ୍ରତିକ ସମୟରେ ବଲିଉଡ୍ କଳାକାରଙ୍କୁ ମଧ୍ୟ ଏହି ଭିସା ଦିଆଯାଉଛି ।