ଓ୍ବାଶିଂଟନ,୧।୬ : ପେଣ୍ଟାଗନ ୟୁକ୍ରେନ ପାଇଁ ୩୦୦ ମିଲିୟନ ଡଲାରର ଅସ୍ତ୍ର ପ୍ୟାକେଜ ଘୋଷଣା କରିଛି। ଏହି ପ୍ୟାକେଜରେ ବାୟୁ ପ୍ରତିରକ୍ଷା ପ୍ରଣାଳୀ ଏବଂ ଲକ୍ଷ ଲକ୍ଷ ରାଉଣ୍ଡ ଗୁଳି ଅନ୍ତର୍ଭୁକ୍ତ। ପ୍ରତିରକ୍ଷା ବିଭାଗ କହିଛି ୟୁକ୍ରେନକୁ ଆମେରିକାର ସୁରକ୍ଷା ସହାୟତାର ମୋଟ ମୂଲ୍ୟ ୩୭.୬ ବିଲିୟନ ଡ଼ଲାରରେ ପହଞ୍ଚାଇବ। ରୁଷିଆର ଆକ୍ରମଣ ପରେ ଆମେରିକା କ୍ରମାଗତ ଭାବରେ ୟୁକ୍ରେନକୁ ସାମରିକ ସହାୟତା ଯୋଗାଉଛି।
ପେଣ୍ଟାଗନ କହିଛି ୟୁକ୍ରେନକୁ ଏହାର ତୁରନ୍ତ ଯୁଦ୍ଧ ଆବଶ୍ୟକତା ଏବଂ ଭବିଷ୍ୟତର ସୁରକ୍ଷା ସହାୟତା ଆବଶ୍ୟକତା ପୂରଣ କରିବା ପାଇଁ ଆମେରିକା ତାର ସହଯୋଗୀ ତଥା ଅଂଶୀଦାରମାନଙ୍କ ସହ କାର୍ଯ୍ୟ ଜାରି ରଖିବ।
ୟୁକ୍ରେନକୁ ଅସ୍ତ୍ରଶସ୍ତ୍ର ଏବଂ ଅନ୍ୟାନ୍ୟ ସହାୟତା ଯୋଗାଇବା ପାଇଁ ନାଟୋ ଏବଂ ଅନ୍ୟ ସହଯୋଗୀମାନଙ୍କ ଦ୍ୱାରା ଆମେରିକା ଉଦ୍ୟମକୁ ଆଗେଇ ନେଉଛି। ୟୁକ୍ରେନ ଦେଶର ପୂର୍ବ ଏବଂ ଦକ୍ଷିଣରେ ଅଧିକାର କରିଥିବା ଅଞ୍ଚଳରୁ ରୁଷିଆ ସୈନ୍ୟମାନଙ୍କୁ ଘଉଡାଇବା ପାଇଁ ଏକ ପ୍ରତିପକ୍ଷ ଆକ୍ରମଣ ପାଇଁ ପ୍ରସ୍ତୁତ ହେଉଥିବାବେଳେ ଏହି ଅତ୍ୟାଧୁନିକ ଅସ୍ତ୍ରଶସ୍ତ୍ର ପଠାଯାଇଛି।
ପେଣ୍ଟାଗନ କହିଛି ଏହି ପ୍ୟାକେଜରେ ସ୍ବଦେଶୀ ବାୟୁ ପ୍ରତିରକ୍ଷା ପ୍ରଣାଳୀ, ଏଆଇଏମ-୭ବାୟୁ ପ୍ରତିରକ୍ଷା କ୍ଷେପଣାସ୍ତ୍ର, ଆଭେଞ୍ଜର ଏୟାର ଡିଫେନ୍ସ ସିଷ୍ଟମ ଏବଂ ଷ୍ଟିଙ୍ଗର ଆଣ୍ଟି ଏୟାରକ୍ରାଫ୍ଟ କ୍ଷେପଣାସ୍ତ୍ର ଅନ୍ତର୍ଭୁକ୍ତ।
ଏହା ସହିତ ହାଇ ମୋବିଲିଟି ଆର୍ଟିଲିରି ରକେଟ ସିଷ୍ଟମ, ୧୫୫ ମିମି ଏବଂ ୧୦୪ ମିମି ଆର୍ଟିଲିରି ରାଉଣ୍ଡ, ୧୦୫ ମିମି ଟ୍ୟାଙ୍କ ଗୁଳି ଏବଂ ଜୁନି ବିମାନ ରକେଟ ପାଇଁ ଗୁଳି ଏହି ପ୍ୟାକେଜର ଏକ ଅଂଶ । ପେଣ୍ଟାଗନ କହିଛି ଆମେରିକା ୟୁକ୍ରେନକୁ ୩୦ ମିଲିୟନ ରାଉଣ୍ଡରୁ ଅଧିକ ଛୋଟ ଅସ୍ତ୍ରଶସ୍ତ୍ର ପଠାଇବ।