ଓ୍ବାଶିଂଟନ୍,୧୩।୮: ଆମେରିକାରେ କରୋନା ଭ୍ୟାକ୍ସିନର ବୁଷ୍ଟର ଡୋଜ୍ର ପ୍ରୟୋଗକୁ ମଞ୍ଜୁରୀ ପ୍ରଦାନ କରାଯାଇଛି। ଆମେରିକାରେ ବର୍ତ୍ତମାନ କରୋନାର ହାଇ ରିସ୍କ ଥିବା ରୋଗୀଙ୍କୁ ଟିକାର ତୃତୀୟ ଡୋଜ୍ ଦିଆଯିବ। ମଡର୍ନା ଏବଂ ଫାଇଜର ଟିକାର ତୃତୀୟ ଡୋଜ୍କୁ ଜରୁରୀକାଳୀନ ବ୍ୟବହାର ପାଇଁ ମଞ୍ଜୁରୀ ମିଳିଛି। ଆମେରିକାର ଫୁଡ୍ ଆଣ୍ଡ ଡ୍ରଗ୍ ଆଡମିନିଷ୍ଟ୍ରେସନ୍ (ଏଫ୍ଡିଏ) ଶୁକ୍ରବାର ଏନେଇ ଘୋଷଣା କରିଛି। ଉଚ୍ଚ ବିପଦଜ୍ଜନକ ରୋଗୀମାନେ ଯଥା ଯେଉଁମାନେ ପୂର୍ବରୁ ଗମ୍ଭୀର ରୋଗରେ ପୀଡ଼ିତ କିମ୍ବା ଯାହାର ରୋଗ ପ୍ରତିରୋଧକ ଶକ୍ତି ଦୁର୍ବଳ ରହିଛି ସେମାନଙ୍କୁ ଏହି ବୁଷ୍ଟର ଡୋଜ୍ରେ ସାମିଲ କରାଯିବ। ଯେପରିକି ଯେଉଁ ରୋଗୀଙ୍କର ପୂର୍ବରୁ ଟ୍ରାନ୍ସପ୍ଲାଣ୍ଟ ହୋଇଛି କିମ୍ବା କର୍କଟ ଭଳି ରୋଗରେ ପୀଡିତ ଅଛନ୍ତି ସେମାନଙ୍କୁ ହିଁ କରୋନା ଟିକାର ତୃତୀୟ ଡୋଜ୍ ଦିଆଯିବ ବୋଲି ଏଫ୍ଡିଏ ପକ୍ଷରୁ କୁହାଯାଇଛି। ଦେଶରେ କରୋନା ମହାମାରୀର ଆଉ ଏକ ଲହର ଆତଙ୍କ ଖେଳାଇଛି। ଏହି ଲହରରେ ଲୋକଙ୍କ ରୋଗପ୍ରତିରୋଧକ ଶକ୍ତି ଅଧିକ ରହିବା ଜରୁରୀ। ନୂଆ ଭାରିଆଣ୍ଟ ସହ ସଂକ୍ରମଣ ବଢ଼ିବାର ଆଶଙ୍କା ଥିବାରୁ ଏହି ବୁଷ୍ଟର ଡୋଜକୁ ଅନୁମତି ଦିଆଯାଇଛି ବୋଲି ଏଫ୍ଡିଏ କମିସନର ଜାନେଟ ଉଡ୍କକ୍ କହିଛନ୍ତି। ତେବେ ରୋଗ ପ୍ରତିରୋଧକ ଶକ୍ତି ଦୁର୍ବଳ ଥିବା ଲୋକଙ୍କ ପାଇଁ ଏହି ଅତିରିକ୍ତ ଡୋଜ୍ ଆବଶ୍ୟକ ରହିଛି। କିନ୍ତୁ ଯେଉଁମାନେ ସମ୍ପୂର୍ଣ୍ଣ ଟିକାକରଣ କରାଇସାରିଛନ୍ତି ଏବଂ ସୁରକ୍ଷିତ ଅଛନ୍ତି ସେମାନଙ୍କୁ ଏବେ କୋଭିଡ ଟିକାର ଅତିରିକ୍ତ ମାତ୍ରା ଦରକାର ନାହିଁ ବୋଲି ଏଫ୍ଡିଏ କମିସନର ଜାନେଟ କହିଛନ୍ତି।