ନୂଆଦିଲ୍ଲୀ: ଆମେରିକାର ଡୋନାଲ୍ଡ ଟ୍ରମ୍ପ ପ୍ରଶାସନ ପକ୍ଷରୁ ଏଚ୍-୧ ବି ଭିଜାକୁ ନେଇ ନୂଆ ନିୟମ ଜାରି କରାଯାଇଛି। ଏହି ନିୟମ ଅନ୍ତର୍ଗତ ୟୁଏସ୍ କର୍ମଚାରୀଙ୍କୁ ରୋଜଗାର କ୍ଷେତ୍ରରେ ଅଧିକ ସୁଯୋଗ ମିଳିବ। ଟ୍ରମ୍ପ ସରକାର ବିଦେଶରୁ ୟୁଏସ୍ ଯାଉଥିବା କର୍ମଚାରୀଙ୍କ ସଂଖ୍ୟା କମାଇବା ଏବଂ ଅପ୍ରବାସନକୁ ନିୟନ୍ତ୍ରଣ କରିବା ଲାଗି ଏଭଳି କଟକଣା ଜାରି କରିଥିବା କୁହାଯାଉଛି। ୟୁଏସ୍ ଡିମାର୍ଟମେଣ୍ଟ ଅଫ୍ ହୋମ୍ଲାଣ୍ଡ ସିକ୍ୟୁରିଟି ମଙ୍ଗଳବାର ଏସ୍- ବି ଭିଜାକୁ ନେଇ ନୂଆ ନିୟମ ଜାରି କରିଥିବା ଜଣାପଡ଼ିଛି। ଆମେରିକା ପ୍ରତିବର୍ଷ ପ୍ରାୟ ୮୫ ହଜାର ଏଚ୍-୧ ବି ଭିଜା ଜାରି କରୁଛି। ଏହି ଭିଜା ଲାଭକରି ବିଦେଶର କୁଶଳୀ କର୍ମଚାରୀମାନେ ସେଠାରେ ଚାକିରି ପାଇଥାନ୍ତି। ନୂଆ ନିୟମ ଲାଗୁହେବା ଦ୍ୱାରା ଭାରତୀୟ ପ୍ରଫେଶନାଲମାନେ ଅଧିକ ପ୍ରଭାବିତ ହେବା ଆଶଙ୍କା ପ୍ରକାଶ ପାଇଛି। କାରଣ ଏହି ବର୍ଗର କର୍ମଚାରୀଙ୍କୁ ନିଯୁକ୍ତିଦେବା ଲାଗି ଆମେରିକା ଫାର୍ମଗୁଡିକୁ ଅଧିକ ଅର୍ଥ ଖର୍ଚ୍ଚ କରିବାକୁ ପଡିବ। ଫଳରେ ସେମାନେ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେବାରୁ ବିରତ ହେବେ ବୋଲି କୁହାଯାଉଛି। ୟୁଏସ୍ ଜାରି କରୁଥିବା ମୋଟ୍ ଏଚ୍-୧ ବି ଭିଜା ମଧ୍ୟରୁ ଭାରତୀୟମାନେ ପ୍ରାୟ ୭୦% ଭିଜା ଲାଭ କରିଥାନ୍ତି। ଭାରତ ପଛକୁ ଚାଇନା ଏହି ଭିଜା ଲାଭ କରିବାରେ ଦ୍ୱିତୀୟ ସ୍ଥାନରେ ରହିଛି। ନୂଆ ନିୟମ ଦ୍ୱାରା ନିଯୁକ୍ତି ଲାଗି ଆବେଦନ କରୁଥିବା ମୋଟ ପ୍ରାର୍ଥୀଙ୍କ ମଧ୍ୟରୁ ପ୍ରାୟ ଏକ ତୃତୀୟାଂଶ ବାଦ୍ ପଡ଼ିବେ ବୋଲି ଆକଳନ କରାଯାଇଛି। ଭାରତରୁ ଅଧିକାଂଶ ଆଇଟି ପ୍ରଫେଶନାଲ ଏହି ଭିଜା ଦ୍ୱାରା ଆମେରିକାରେ ଚାକିରି ଲାଗି ଯାଇଥାନ୍ତି ।