ଓ୍ବାଶିଂଟନ,୧୮।୧୦ : ପାକିସ୍ତାନରେ ଚାଲିଥିବା ରାଜନୈତିକ ଅସ୍ଥିରତା ମଧ୍ୟରେ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ବିବୃତ୍ତି ନେଇ ଉତ୍ତେଜନା ସୃଷ୍ଟି ହୋଇଛି। ପରମାଣୁ ଅସ୍ତ୍ରଶସ୍ତ୍ର ସହିତ ପାକିସ୍ତାନକୁ ସବୁଠାରୁ ବିପଜ୍ଜନକ ଦେଶ ବୋଲି ବାଇଡେନ କହିଥିଲେ। ଏହି ବିବୃତ୍ତି ପରେ ଅଭିନେତା ଠାରୁ ଆରମ୍ଭ କରି ଖବରଦାତା ତଥା କୂଟନୀତିଜ୍ଞ ପର୍ଯ୍ୟନ୍ତ ଏବଂ ପାକିସ୍ତାନର ନେତାମାନେ ଗୋଟିଏ ପରେ ଗୋଟିଏ ଆମେରିକାକୁ ଘେରିବାକୁ ଲାଗିଲେ। ଆମେରିକାର ରାଷ୍ଟ୍ରଦୂତଙ୍କୁ ଡକାଇ ପାକିସ୍ତାନ ସରକାର ଏସମ୍ପର୍କରେ ଆପତ୍ତି ଉଠାଇ ରାଷ୍ଟ୍ରପତି ଜୋ ବାଇଡେନଙ୍କ ବିବୃତ୍ତି ନେଇ ଜବାବ ତଲବ କରିଥିଲେ।
ବର୍ତ୍ତମାନ ଆମେରିକାର ମୁଖପାତ୍ର ଏହି ପ୍ରସଙ୍ଗରେ ସ୍ପଷ୍ଟୀକରଣ ଦେଇଛନ୍ତି। ଆମେରିକାର ବୈଦେଶିକ ବିଭାଗ ମୁଖପାତ୍ର ବେଦାନ୍ତ ପଟେଲ ଏ ସମ୍ପର୍କରେ ଏକ ବିବୃତ୍ତି ଦେଇଛନ୍ତି। ସେ କହିଛନ୍ତି ଯେ ଆମେରିକା ପାକିସ୍ତାନର ପ୍ରତିବଦ୍ଧତା ଏବଂ ଆଣବିକ ଅସ୍ତ୍ରଶସ୍ତ୍ରକୁ ସୁରକ୍ଷିତ ରଖିବା କ୍ଷମତା ଉପରେ ବିଶ୍ୱାସ ରଖିଛି। ନିଜର ସ୍ବାର୍ଥ ପାଇଁ ଆମେରିକା ସର୍ବଦା ଏକ ସୁରକ୍ଷିତ ଏବଂ ସମୃଦ୍ଧ ଦେଶ ଭାବେ ପାକିସ୍ତାନକୁ ଗୁରୁତ୍ୱପୂର୍ଣ୍ଣ ବିବେଚନା କରିଛି। ପାକିସ୍ତାନ ସହ ଦୀର୍ଘ ଦିନର ସହଯୋଗକୁ ମଧ୍ୟ ଆମେରିକା ଗୁରୁତ୍ୱ ଦେଇଥାଏ।
ଏପରି ମନ୍ତବ୍ୟ ଜାରି କରି ଆମେରିକା ପାକିସ୍ତାନ ସହିତ ସମ୍ପର୍କରେ ସ୍ଥିରତା ଆଣିବାକୁ ଉଦ୍ୟମ କରିବା ସହିତ ଏସିଆର ବିଭିନ୍ନ ଦେଶଙ୍କ ସହିତ ବନ୍ଧୁତାପୂର୍ଣ୍ଣ ସ୍ଥିତି ସୃଷ୍ଟି କରିବାକୁ ଚାହୁଁଥିବା ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି।