ଭୁବନେଶ୍ୱର, ୧୪ା୯(କ୍ରୀଡ଼ା ପ୍ରତିନିଧି): ଅକ୍ଟୋବର ୧୧ରୁ ୩୦ ପର୍ଯ୍ୟନ୍ତ ଭାରତର ୩ଟି ଭେନ୍ୟୁରେ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ଅନୁଷ୍ଠିତ ହେବ। ଭାଗ ନେବାକୁ ଯାଉଥିବା ୧୬ଟି ଦଳ ମଧ୍ୟରୁ ଅନ୍ୟତମ ଆମେରିକାର ଏକ ପ୍ରତିନିଧି ମଣ୍ଡଳୀ ସମ୍ପ୍ରତି ଭାରତ ଗସ୍ତରେ ଅଛନ୍ତି। ଏହି ପ୍ରତିନିଧି ଦଳ ମଙ୍ଗଳବାର ଭୁବନେଶ୍ୱର ଆସି କଳିଙ୍ଗ ଷ୍ଟାଡିୟମ ଏବଂ ଟ୍ରେନିଂ ସେଣ୍ଟର ଗୁଡ଼ିକ ଅନୁଧ୍ୟାନ କରିଛନ୍ତି। ଏହି ଅବସରରେ ସେମାନେ ଭିତ୍ତିଭୂମୀ ପରକ୍ଷିବା ସହ ବିଭିନ୍ନ ସୁବିଧା ସୁଯୋଗ ସମ୍ପର୍କରେ ଅବଗତ ହୋଇଛନ୍ତି। ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବସେବା ବିଭାଗର କର୍ମକର୍ତ୍ତା ଏବଂ ସ୍ଥାନୀୟ ଆୟୋଜକ କମିଟି (ଏଲ୍ଓସି)ର କର୍ମକର୍ତ୍ତାମାନେ ସେମାନଙ୍କୁ ଏ ଦିଗରେ ସହଯୋଗ କରିଥିଲେ। ପ୍ରକାଶ ଯୋଗ୍ୟ ଯେ, ଭୁବନେଶ୍ୱରର କଳିଙ୍ଗ ଷ୍ଟାଡିୟମ ସମେତ ଗୋଆର ପଣ୍ଡିତ ଜବାହରଲାଲ ନେହେରୁ ଷ୍ଟାଡିୟମ ଏବଂ ନଭି ମୁମ୍ବାଇସ୍ଥିତ ଡିଓ୍ବାଇ ପାଟିଲ ଷ୍ଟାଡିୟମରେ ମ୍ୟାଚ ଗୁଡ଼ିକ ଖେଳାଯିବ। ଗ୍ରୁପ୍ ପର୍ଯାୟରେ ଭାରତର ସମସ୍ତ ୩ଟି ଯାକ ମ୍ୟାଚ ଭୁବନେଶ୍ୱରରେ ଅନୁଷ୍ଠିତ ହେବ। ଏହା ବ୍ୟତୀତ ଅନ୍ୟ ୩ଟି ମ୍ୟାଚ ମଧ୍ୟ ଏଠାରେ ଖେଳାଯିବ। ଅକ୍ଟୋବର ୧୧ ଅପରାହ୍ନ ୪ଟା ୩୦ରେ ମରକ୍କୋ-ବ୍ରାଜିଲ ଏବଂ ରାତି ୮ଟାରେ ଭାରତ-ଆମେରିକା ମଧ୍ୟରେ ମ୍ୟାଚ ଅନୁଷ୍ଠିତ ହେବ। ସେହିପରି ୧୪ ତାରିଖ ଅପରାହ୍ନ ୪ଟା ୩୦ରେ ବ୍ରାଜିଲ-ଆମେରିକା ଓ ରାତି ୮ଟାରେ ଭାରତ-ମରକ୍କୋ ମ୍ୟାଚ ଖେଳାଯିବ। ଅକ୍ଟୋବର ୧୭ରେ ନାଇଜେରିଆ-ଚିଲି ଏବଂ ଭାରତ-ବ୍ରାଜିଲ ମଧ୍ୟରେ ମ୍ୟାଚ ଅନୁଷ୍ଠିତ ହେବ। ଗ୍ରୁପ୍ ‘ଏ’ରେ ଭାରତ, ଆମେରିକା, ମରକ୍କୋ, ବ୍ରାଜିଲ, ଗ୍ରୁପ୍ ‘ବି’ରେ ଜର୍ମାନୀ, ନାଇଜେରିଆ, ଚିଲି, ନ୍ୟୁଜିଲାଣ୍ଡ, ଗ୍ରୁପ୍ ‘ସି’ରେ ସ୍ପେନ, କଲମ୍ବୋ, ମେକ୍ସିକୋ, ଚାଇନା ଏବଂ ଗ୍ରୁପ୍ ‘ଡି’ରେ ଜାପାନ, ତାଞ୍ଜାନିଆ, କାନାଡ଼ା ଓ ଫ୍ରାନ୍ସ ସ୍ଥାନ ପାଇଛନ୍ତି। ଅକ୍ଟୋବର ୨୧ ଓ ୨୨ ତାରିଖରେ ୪ଟି କ୍ୱାର୍ଟର ଫାଇନାଲ, ୨୬ରେ ୨ଟି ସେମିଫାଇନାଲ ଏବଂ ୩୦ରେ ତୃତୀୟ ସ୍ଥାନ ପାଇଁ ପ୍ଲେ-ଅଫ୍ ଏବଂ ଫାଇନାଲ ଅନୁଷ୍ଠିତ ହେବ।