ଓ୍ବାଶିଂଟନ,୨୫।୩ : ଆମେରିକାର ରାଷ୍ଟ୍ରପତି ଜୋ ବାଇଡେନ ଇରାନକୁ ଚେତାବନୀ ଦେଇଛନ୍ତି ଏବଂ କହିଛନ୍ତି ଯେ ଆମେରିକୀୟ ନାଗରିକଙ୍କୁ ବଞ୍ଚାଇବା ପାଇଁ ସେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବେ। ସିରିଆରେ ଇରାନ ସମର୍ଥିତ ସୁରକ୍ଷା ବାହିନୀ ବିରୋଧରେ ଆମେରିକାର ଏୟାର ଷ୍ଟ୍ରାଇକ ପରେ ବାଇଡେନଙ୍କ ଏହି ବିବୃତ୍ତି ଆସିଛି। ଏଥି ସହିତ ସିରିଆର ଏକ ଆମେରିକୀୟ ବେସ ଉପରେ ଡ୍ରୋନ ଆକ୍ରମଣରେ ଜଣେ ଆମେରିକୀୟ କଣ୍ଟ୍ରାକ୍ଟରଙ୍କର ମୃତ୍ୟୁ ଘଟିଥିଲା ଏବଂ ପାଞ୍ଚ ଜଣ ଆମେରିକୀୟ ସୈନିକ ଆହତ ହୋଇଥିଲେ। ଆମେରିକା ଏଥିପାଇଁ ଇରାନକୁ ଦାୟୀ କରିଛି।
ଗୁରୁବାର ଆମେରିକା ଇରାନ ସମର୍ଥିତ ବାହିନୀର ବେସ ଉପରେ ଏୟାର ଷ୍ଟ୍ରାଇକ କରିଥିଲା। ଯେଉଁଥିରେ ଆମେରିକାର ଏଫ-୧୫ ଜେଟଗୁଡିକ ଇରାନର ଇସଲାମିକ ରିଭୋଲ୍ୟୁଶନାରୀ ଗାର୍ଡ କର୍ପସ ସଂଗଠନର ଦୁଇଟି ଟାର୍ଗେଟ ଉପରେ ଆକ୍ରମଣ କରିଥିଲା। ସିରିଆରେ ମାନବିକ ଅଧିକାର ପାଇଁ କାର୍ଯ୍ୟ କରୁଥିବା ଏକ ସଂଗଠନ ଦାବି କରିଛି ଯେ ଆମେରିକୀୟ ଆକ୍ରମଣରେ ଇରାନ ସମର୍ଥିତ ଆଠଜଣ ସୈନିକ ନିହତ ହୋଇଛନ୍ତି। ଯଦିଓ ଇରାନର ଷ୍ଟେଟ ଟିଭି ଦାବି କରିଛି ଯେ ଏହି ଆକ୍ରମଣରେ କୌଣସି କ୍ଷୟକ୍ଷତି ହୋଇନାହିଁ।
ତେବେ ଆମେରିକା-ଇରାନ ମୁହାଁମୁହିଁ ହେବା ଦ୍ୱାରା ସିରିଆ ଏବେ ଏକ ଯୁଦ୍ଧକ୍ଷେତ୍ର ପାଲଟିଛି। ଉଭୟ ଆମେରିକା ଏବଂ ଇରାନ ସିରିଆରେ ପରସ୍ପର ଉପରେ ଆକ୍ରମଣ ଜାରି ରଖିଛନ୍ତି। ଏହା ଦ୍ୱାରା ସିରିଆ ଅଯଥାରେ ବଳିର ଛେଳି ପାଳଟିଛି ବୋଲି ଅନ୍ତର୍ଜାତୀୟସ୍ତରରେ ଚର୍ଚ୍ଚା ଜାରି ରହିଛି।
