ଓ୍ବାଶିଂଟନ୍,୨୨।୧୦: ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିବା ସହ ରେକର୍ଡ ପାଇଁ ଲୋକମାନେ ଅନେକ ଚ୍ୟାଲେଞ୍ଜପୂର୍ଣ୍ଣ କାର୍ଯ୍ୟ କରିଥାନ୍ତି। ଇତିମଧ୍ୟରେ ଆମେରିକାର ଜଣେ ବ୍ୟକ୍ତି ଦେଢ଼ଶହ ଜଳନ୍ତା ମହମବତୀକୁ ପାଟିରେ ୩୦ସେକେଣ୍ଡ ପର୍ଯ୍ୟନ୍ତ ରଖି ଗିନିଜ୍ ଓ୍ବାଲର୍ଡ ରେକର୍ଡରେ ନିଜ ନାମକୁ ସାମିଲ୍ କରିଥିବା ଜଣାପଡ଼ିଛି। ଗତ ଡିସେମ୍ବରରେ ଇଡାହୋର ଡେଭିଡ୍ ରଶ୍ ମହମବତୀକୁ ପାଟିରେ ରଖି ରେକର୍ଡ କରିବାକୁ ଉଦ୍ୟମ କରିଥିବା ବେଳେ ସେଥିରେ ସେ ଅସଫଳ ହୋଇଥିବା କହିଛନ୍ତି। କ୍ୟାଣ୍ଡେଲଗୁଡ଼ିକର ଓଜନ ବହୁତ ଅଧିକ ହୋଇଥିବା ବେଳେ ପାଟିରେ ସେଗୁଡ଼ିକୁ ରଖିବା ସହଜ ନ ଥିଲା। ପାଟିରୁ ଲାଳ ବାହାରିବା କାରଣରୁ ଏଗୁଡ଼ିକ ଖସିଯାଉଥିଲା। ତେବେ ମହମବତୀ ସବୁକୁ ଦାନ୍ତରେ ଜୋର୍ରେ କାମୁଡ଼ି ରଖିବା ଦ୍ୱାରା ୩୦ ସେକେଣ୍ଡ ପର୍ଯ୍ୟନ୍ତ ଏହା ପାଟିରେ ରହିଥିଲା ବୋଲି ରଶ୍ କହିଛନ୍ତି। ୟୁଟ୍ୟୁବରେ ଏହାର ଏକ ଭିଡିଓକୁ ରଶ୍ ନିଜେ ଶେୟାର କରିଛନ୍ତି। ତେବେ ଗୋଟିଏ ପରେ ଗୋଟିଏ ଜଳନ୍ତା କ୍ୟାଣ୍ଡେଲ ସେ ପାଟିରେ ରଖୁଥିବାର ଉକ୍ତ ଭିଡିଓରେ ଦେଖିବାକୁ ମିଳିଛି। ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିିଛି।