ନୂଆଦିଲ୍ଲୀ,୧ା୧୦: ଲେବାନନରେ ଇସ୍ରାଏଲର ଆକ୍ରମଣ ମଧ୍ୟରେ ଇରାନ ବାଲିଷ୍ଟିକ୍ ମିସାଇଲ ଆକ୍ରମଣ କରିବାକୁ ପ୍ରସ୍ତୁତ କରୁଛି। ଆମେରିକାର ଗୋଇନ୍ଦା ରିପୋର୍ଟ ଅନୁଯାୟୀ ଇରାନ ଯେକୌଣସି ସମୟରେ ମିସାଇଲ ଆକ୍ରମଣ କରିପାରେ। ହ୍ୱାଇଟ ହାଉସର ଜଣେ ବରିଷ୍ଠ ଅଧିକାରୀ ସ୍ପଷ୍ଟ କରିଛନ୍ତି ଯେ ଆମେରିକା ନିକଟରେ ଏହାର ସୂଚନା ରହିଛି। ଏହାରି ମଧ୍ୟରେ ଇସ୍ରାଏଲ ପ୍ରଧାନମନ୍ତ୍ରୀ ନେତାନ୍ୟାହୁ ଏକଜୁଟ ରହିବାକୁ ନିବେଦନ କରିଛନ୍ତି।
ଆମେରିକାର ଅଧିକାରୀ ଏହା ମଧ୍ୟ କହିଛନ୍ତି ଯେ ସେମାନେ ଇସ୍ରାଏଲକୁ ସକ୍ରିୟ ଭାବରେ ସମର୍ଥନ କରୁଛନ୍ତି ଏବଂ ଯଦି ଇରାନ ଏପରି କରେ ତେବେ ଭୟଙ୍କର ପରିଣାମ ଭୋଗିବ। ଏହି ଆଶଙ୍କା ମଧ୍ୟରେ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ବିବୃତ୍ତି ମଧ୍ୟ ସାମ୍ନାକୁ ଆସିଛି। ସେ କହିଛନ୍ତି, “ଆମେ ଇରାନର ମନ୍ଦ ଅଭ୍ୟାସ ବିରୁଦ୍ଧରେ ଏକ ଅଭିଯାନ ମଧ୍ୟରେ ଅଛୁ। ଆଗାମୀ ଆହ୍ୱାନପୂର୍ଣ୍ଣ ଦିନରେ ଆମେ ଏକଜୁଟ ହୋଇ ଦୃଢ ଭାବରେ ଠିଆ ହେବା ଆବଶ୍ୟକ।”
ପୂର୍ବରୁ ଏପ୍ରିଲରେ ଇରାନ ପ୍ରାୟ ୧୭୦ ଡ୍ରୋନ୍, ୩୦ ରୁ ଅଧିକ କ୍ରୁଜ୍ କ୍ଷେପଣାସ୍ତ୍ର ଏବଂ ୧୨୦ ରୁ ଅଧିକ ବାଲିଷ୍ଟିକ୍ କ୍ଷେପଣାସ୍ତ୍ର ଇସ୍ରାଏଲ୍ ଆଡକୁ ଚଳାଇଥିଲା। ତେବେ ଇସ୍ରାଏଲ ସେମାନଙ୍କ ମଧ୍ୟରୁ ଅଧିକାଂଶଙ୍କୁ ପ୍ରତିହତ କରିଥିଲା। ଯଦିଓ ଇରାନର ସହଯୋଗୀମାନେ ଇସ୍ରାଏଲ ଉପରେ ଲଗାତାର ରକେଟ୍-କ୍ଷେପଣାସ୍ତ୍ର ଆକ୍ରମଣ କରିଥିଲେ, କିନ୍ତୁ ଆଜି ପରିସ୍ଥିତି ଏପରି ହୋଇଛି ଯେ ଇସ୍ରାଏଲ୍ ସେନା ତାର ସମସ୍ତ ସହଯୋଗୀଙ୍କୁ ଶାନ୍ତ କରି ଦେଇଛି।
