ନ୍ୟୁୟର୍କ,୧୩।୯(ଏପି): ୟୁଏସ୍ ଓପନ୍ ମହିଳା ଡବଲ୍ସ ଇଭେଣ୍ଟରେ ଭେରା ଜାଭୋନାରେଭା ଓ ଲଉରା ସିଗ୍ମଣ୍ଡ ଟାଇଟଲ ହାସଲ କରିଛନ୍ତି। ଶୁକ୍ରବାର ଅନୁଷ୍ଠିତ ଫାଇନାଲ ମ୍ୟାଚ୍ରେ ଅଣସିଡ୍ ଏହି ରୁଷିଆ ଓ ଜର୍ମାନୀ ଯୋଡି ୬-୪, ୬-୪ ସେଟ୍ରେ ତୃତୀୟ ସିଡ୍ ମାନ୍ୟତାପ୍ରାପ୍ତ ଯୋଡି ଆମେରିକାର ନିକୋଲ ମେଲିଚାର ଓ ଚାଇନାର ୟିଫାନ ଜୁଙ୍କୁ ପରାସ୍ତ କରି ଚାମ୍ପିୟନ ହେବାର ଗୌରବ ଅର୍ଜନ କରିଛନ୍ତି। ଏହି ବିଜୟ ସହ ଜାଭୋନାରେଭା ଓ ସିଗ୍ମଣ୍ଡ ୪ ଲକ୍ଷ ଆମେରିକୀୟ ଡଲାର ପୁରସ୍କାର ରାଶି ହାସଲ କରିଛନ୍ତି। ଟୁର୍ନାମେଣ୍ଟର ଠିକ୍ ପୂର୍ବରୁ ଏହି ବିଜେତା ଯୋଡି ସାଥି ହୋଇ ଖେଳିବାକୁ ନିଷ୍ପତ୍ତି ନେଇଥିଲେ। ଏବେ ଆଗାମୀ ଫ୍ରେଞ୍ଚ୍ ଓପନ୍ରେ ମଧ୍ୟ ଦୁହେଁ ସାଥୀ ହୋଇ ଖେଳିବାକୁ ଯୋଜନା କରିଛନ୍ତି।
ଜାଭୋନାରେଭା ଚଳିତ ସପ୍ତାହରେ ୩୬ ବର୍ଷରେ ପଦାର୍ପଣ କରିବେ। ପୂର୍ବରୁ ସେ ୨୦୦୬ ୟୁଏସ୍ ଓପନ୍ରେ ନାଥାଲି ଡେଚିଙ୍କ ସହ ଟାଇଟଲ ହାସଲ କରିଥିଲେ। ୨୦୧୦ ସଂସ୍କରଣରେ ସେ ମଧ୍ୟ ସିଙ୍ଗଲ୍ସ ଫାଇନାଲରେ କିମ୍ କ୍ଲିଷ୍ଟର୍ସଙ୍କଠାରୁ ପରାସ୍ତ ହୋଇ ରନର୍ସଅପ ହୋଇଥିଲେ। ୨୦୧୨ରେ ମଧ୍ୟ ସେ ଅଷ୍ଟ୍ରେଲିଆନ୍ ଓପନ୍ ଡବଲ୍ସ ଟାଇଟଲ ହାସଲ କରିଥିଲେ। ଏହାପରେ ସେ ଆଘାତ ସମସ୍ୟା ଦେଇ ଗତିକରିଥିଲେ। ୨୦୧୬ରେ ଝିଅ ଏବେଲିନାଙ୍କୁ ଜନ୍ମ ଦେବା ପରେ ସେ ଟେନିସ ବେଶି ଖେଳି ନ ଥିଲେ। ଅନ୍ୟପଟେ ଦ୍ୱିତୀୟ ଥର ପାଇଁ ଜୁ ଓ ମେଲିଚାର ୟୁଏସ୍ ଓପନ୍ରେ ରନର୍ସଅପ୍ ବିବେଚିତ ହୋଇଛନ୍ତି।
