ନ୍ୟୁୟର୍କ, ୭।୯(ପି.ଟି.): ୟୁଏସ୍ ଓପନ୍ ଟେନିସ ଟୁର୍ନାମେଣ୍ଟରେ ଅଭିଜ୍ଞ ଭାରତୀୟ ଖେଳାଳି ରୋହନ ବୋପାନ୍ନା ଓ ତାଙ୍କ କାନାଡ଼ା ପାର୍ଟନର ଡେନିସ ଶାପୋଭାଲୋଭ ପୁରୁଷ ଡବଲ୍ସ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଏହି ଅଣସିଡ ଇଣ୍ଡୋ- କାନାଡିଆନ ଯୋଡି ଶନିବାର ଦ୍ୱିତୀୟ ରାଉଣ୍ଡ ମୁକାବିଲାରେ ଷଷ୍ଠ ସିଡ୍ ଜର୍ମାନୀ ଯୋଡି କେଭିନ୍ କ୍ରିଏଜ୍ ଓ ଆଣ୍ଡ୍ରିଆସ୍ ମିଜ୍ଙ୍କୁ ୪-୬, ୬-୪, ୬-୩ ସେଟ୍ରେ ପରାସ୍ତ କରି କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଏକ ଘଣ୍ଟା ୪୭ ମିନିଟ୍ରେ ବୋପାନ୍ନା ଓ ଶାପୋଭାଲୋଭ ବିଜୟୀ ହୋଇଥିଲେ। କ୍ୱାର୍ଟରରେ ଏହି ଯୋଡି ଡଚ୍- ରୋମାନିଆ ଯୋଡି ଜିଲ- ଜୁଲିଏନ୍ ରୋଜର ଓ ହୋରିଆ ଟେକାଉଙ୍କୁ ଭେଟିବେ। ରୋଜର- ଟେକାଉ ଅନ୍ୟଏକ ଦ୍ୱିତୀୟ ରାଉଣ୍ଡ ମ୍ୟାଚ୍ରେ ଟପ୍ ସିଡ୍ ଯୋଡି କଲମ୍ବିଆର ଜୁଆନସେବାଷ୍ଟିଆନ କାବାଲ ଓ ରୋବେର୍ଟ ଫାରାଙ୍କୁ ୪-୬,୬-୩, ୬-୪ ସେଟ୍ ହରାଇ କ୍ୱାର୍ଟରକୁ ଉଠିଛନ୍ତି।
ସୁମିତ ନାଗାଲ ଓ ଦିଭିଜ ଶରନ ଟୁର୍ନାମେଣ୍ଟରୁ ବିଦାୟ ନେବା ପରେ ବୋପାନ୍ନା ଏକମାତ୍ର ଭାରତୀୟ ଭାବେ ଟୁର୍ନାମେଣ୍ଟରେ ଅଭିଯାନ ଜାରି ରଖିଛନ୍ତି। ପୁରୁଷ ସିଙ୍ଗଲ୍ସ ଦ୍ୱିତୀୟ ରାଉଣ୍ଡ ମୁକାବିଲାରେ ନାଗାଲ ବିଶ୍ୱର ୩ ନମ୍ବର ତଥା ଦ୍ୱିତୀୟ ସିଡ୍ ଅଷ୍ଟ୍ରିଆର ଡୋମିନିକ୍ ଥିମ୍ଙ୍କଠଶଣଉ ପରାସ୍ତ ହୋଇ ବିଦାୟ ନେଇଥିଲେ। ଅନ୍ୟପଟେ ଶରନ ଓ ତାଙ୍କ ସର୍ବିୟା ପାର୍ଟନର ନିକୋଲଶ କାସିକ୍ ପୁରୁଷ ସିଙ୍ଗଲ୍ସ ପ୍ରଥମ ରାଉଣ୍ଡରେ ପ୍ରତିପକ୍ଷ ଅଷ୍ଟମ ସିଡ୍ ଯୋଡି ନିକୋଲା ମେକ୍ଟିକ ଓ ଓ୍ବେସଲି କୁଲହୋଫ୍ଙ୍କଠାରୁ ପରାସ୍ତ ହୋଇଥିଲେ।
