ଓ୍ବାଶିଂଟନ,୬।୯: ଜି -୨୦ ଶିଖର ସମ୍ମିଳନୀ ଭାରତରେ ଅନୁଷ୍ଠିତ ହେବାକୁ ଯାଉଛି। ଏଭଳି ପରିସ୍ଥିତିରେ ଦିଲ୍ଲୀରେ ପ୍ରସ୍ତୁତି ଶେଷ ହୋଇଛି। ଏଥି ସହିତ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ସମେତ ଅନେକ ଦେଶର ନେତା ଏହି ସମ୍ମିଳନୀରେ ଯୋଗ ଦେବାକୁ ଯାଉଛନ୍ତି। ଏହି ସମୟରେ ଆମେରିକାର ଫାଷ୍ଟ ଲେଡି ଜିଲ ବାଇଡେନଙ୍କୁ କୋଭିଡ ପଜିଟିଭ ବୋଲି ଜଣାପଡିଛି। ସୋମବାର ଫାଷ୍ଟ ଲେଡିଙ୍କ ରିପୋର୍ଟ ପଜିଟିଭ ଆସିବା ପରେ ଆମେରିକା ରାଷ୍ଟ୍ରପତି ଭାରତ ଗସ୍ତ କରିବେ କି ନାହିଁ ସେ ନେଇ ସନ୍ଦେହ ପ୍ରକାଶ ପାଇଥିଲା। ହେଲେ ଏବେ ଜଣାପଡିଛି କି ଜୋ ବାଇଡେନଙ୍କ ରିପୋର୍ଟ ଲଗାତାର ଦୁଇ ଦିନର ଟେଷ୍ଟ ପରେ ବି ନେଗେଟିଭ ଆସିଛି। ଯଦିଓ ବାଇଡେନଙ୍କ ପରୀକ୍ଷା ରିପୋର୍ଟ ନେଗେଟିଭ ଆସିଛି, ତଥାପି ହ୍ବାଇଟ ହାଉସ ପକ୍ଷରୁ ସମସ୍ତ ଆବଶ୍ୟକୀୟ ସତର୍କତା ନିଆଯାଇଛି। ହ୍ବାଇଟ ହାଉସ କହିଛି ଯେ ଜୋ ବାଇଡେନ ଭାରତ ଏବଂ ଭିଏତନାମ ଗସ୍ତ ସମୟରେ ରୋଗ ନିୟନ୍ତ୍ରଣ ଏବଂ ପ୍ରତିରୋଧ କେନ୍ଦ୍ର ବା ସେଣ୍ଟର ଫର ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନଶନ(ସିଡିସି) ର କୋଭିଡ-୧୯ ନିର୍ଦ୍ଦେଶାବଳୀ ଅନୁସରଣ କରିବେ।
ତେବେ ବାଇଡେନ ବିଦେଶ ଗସ୍ତ କରୁଥିବା ସମୟରେ ବି ତାଙ୍କ ସ୍ବାସ୍ଥ୍ୟ ଉପରେ ଲଗାତାର ନଜର ରଖାଯିବ।
