ଓ୍ବାଶିଂଟନ,୨୪।୧୨: ବିବାଦ ସହ ଡୋନାଲ୍ଡ ଟ୍ରମ୍ପଙ୍କ ସମ୍ପର୍କ ବେଶ ପୁରୁଣା। ଏବେ ତାଙ୍କର ଆଗାମୀ ପଦକ୍ଷେପକୁ ନେଇ ଆମେରିକୀୟ ଗଣମାଧ୍ୟମରେ ଆଲୋଚନା ସରଗରମ ରହିଛ। ଯଦି ଟ୍ରମ୍ପ ୨୦୨୪ରେ କ୍ଷମତା ଗ୍ରହଣ କରନ୍ତି ତେବେ ତାଙ୍କ ପ୍ରଶାସନର ପ୍ରାରମ୍ଭିକ ଦିନରେ ଭୂକମ୍ପ ଆଣିପାରେ। ସେଇଟି ହେଲା ଟ୍ରମ୍ପ ବିଶ୍ୱ ସ୍ବାସ୍ଥ୍ୟ ସଂଗଠନ WHO)ରୁ ଆମେରିକାକୁ ବାହାର କରିବାକୁ ଘୋଷଣା କରିପାରନ୍ତି। ଏହି ପଦକ୍ଷେପ ତାଙ୍କୁ ନେଇ ଚାଲି ଆସୁଥିବା ଦୀର୍ଘଦିନର ସମାଲୋଚନା ଏବଂ ବିରୋଧର ଫଳାଫଳ ହେବ, ଯାହାକି ବିଶ୍ୱ ସ୍ବାସ୍ଥ୍ୟ ପରିଚାଳନାର ଚିତ୍ରକୁ ସମ୍ପୂର୍ଣ୍ଣ ଭାବେ ବଦଳାଇଦେଇପାରେ ବୋଲି କୁହାଯାଉଛି।
WHO ସହ ଆମେରିକାର ସମ୍ପର୍କ ଦଶନ୍ଧି ପୁରୁଣା। ହେଲେ ଟ୍ରମ୍ପଙ୍କ ପୂର୍ବ କାର୍ଯ୍ୟକାଳ ମଧ୍ୟରେ ଏହି ସମ୍ପର୍କ ଖଟା ହୋଇଥିଲା। ମହାମାରୀ ସମୟରେ ସେ WHO ଉପରେ ପକ୍ଷପାତିତା କରିଥିବା ଅଭିଯୋଗ ଆଣିଥିଲେ। ଏହାପରେ ସେ ଆମେରିକା ଦେଉଥିବା ଅର୍ଥକୁ ବନ୍ଦ କରିଦେଇଥିଲେ। ଏବେ ଟ୍ରମ୍ପ କ’ଣ ପୁରୁଣା ଘଟଣାର ପୁନରାବୃତ୍ତ କରବେ ସେନେଇ ଚର୍ଚ୍ଚା ବଢ଼ିଛି।
ଯଦିଓ ଟ୍ରମ୍ପଙ୍କ ଟିମ୍ ଏଯାବତ WHOରୁ ପ୍ରତ୍ୟାହାର ଯୋଜନା ଉପରେ କୌଣସି ମନ୍ତବ୍ୟ ଦେଇନାହାନ୍ତି, ହେଲେ ବିଶେଷଜ୍ଞ ତଥା ବିଶ୍ୱ ସ୍ବାସ୍ଥ୍ୟ ନେତାମାନେ ଏହା ଉପରେ ଉଦ୍ବେଗ ପ୍ରକାଶ କରୁଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ,ଯଦି ଟ୍ରମ୍ପ ଏହି ପଦକ୍ଷେପ ନିଅନ୍ତି ତେବେ WHOକୁ ଗୋଟିଏ ବର୍ଷ ପୂର୍ବରୁ ନୋଟିସ ଦେବାକୁ ପଡ଼ି। ଏହି ସମୟରେ ଆମେରିକକୁ ଏହାର ପାଣ୍ଠି ସମ୍ବନ୍ଧରେ ନିଷ୍ପତ୍ତି ନେବାକୁ ପଡ଼ିବ।
ଆମେରିକା ହେଉଛି WHOର ସବୁଠାରୁ ବଡ଼ ଆର୍ଥିକ ଭାଗିଦାରୀ। ସଂଗଠନର ମୋଟ ବଜେଟର ୧୬% ହେଉଛି ଆମେରିକାର ପାଣ୍ଠି। ଏଣୁ ଟ୍ରମ୍ପ ଏଥିରୁ ଓହରିଗଲେ ଗମ୍ଭୀର ପ୍ରଭାବ ପଡ଼ିପାରେ। ଅର୍ଥର ଅଭାବ ସଂଗଠନକୁ ଦୁର୍ବଳ କରପାରେ। କେବଳ ଏତିକି ନୁହେଁ ଆମେରକାର ଅନୁପସ୍ଥିତି ଚାଇନା ଏବଂ ଅନ୍ୟ ଦେଶମାନଙ୍କୁ ସଂଗଠନରେ ତାଙ୍କ ସ୍ଥିତିକୁ ମଜଭୂତ କରିବାର ସୁଯୋଗ ଦେବ।