ଓ୍ବାଶିଂଟନ,୨୩।୮: ଆମେରିକାରେ ୨୦ ଲକ୍ଷରୁ ଅଧିକ ପ୍ରଭାବଶାଳୀ ଭାରତୀୟ-ଆମେରିକୀୟଙ୍କୁ ନିଜ ଆଡକୁ ଆକର୍ଷିତ କରିବାକୁ ଚେଷ୍ଟା କରୁଛନ୍ତି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ପ୍ରଥମ କରି ନିର୍ବାଚନ ପ୍ରଚାର ଲାଗି ଟ୍ରମ୍ପ ଭିଡିଓ ବିଜ୍ଞାପନ ଜାରି କରିଛନ୍ତି। ଏହି ଭିଡିଓରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାଷଣ ଓ ଟ୍ରମ୍ପଙ୍କ ଅହମଦାବାଦ ଗସ୍ତର ଐତିହାସିକ ସମ୍ବୋଧନର ସଂକ୍ଷିପ୍ତ କ୍ଲିପ ଦେଖିବାକୁ ମିଳିଛି। ଆମେରିକାରେ ଆସନ୍ତା ନଭେମ୍ବରରେ ରାଷ୍ଟ୍ରପତି ନିର୍ବାଚନ ହେବାକୁ ଥିବା ବେଳେ ଏବେଠାରୁ ଆରମ୍ଭ ହେଲାଣି ପ୍ରଚାର କାର୍ଯ୍ୟ। ସୂଚନାଯୋଗ୍ୟ, ଚଳିତବର୍ଷ ଫେବୃୟାରୀରେ ଆମେରିକା ରାଷ୍ଟ୍ରପତି ଭାରତ ଗସ୍ତ କରିଥିବା ବେଳେ ଗୁଜରାଟର ଅହମଦାବାଦରେ ବିଶାଳ ଜନସମୁଦ୍ରକୁ ସମ୍ବୋଧନ କରିଥିଲେ। ଟ୍ରମ୍ପଙ୍କ ସହ ତାଙ୍କ ସହଧର୍ମିଣି ତଥା ଆମେରିକାର ଫାଷ୍ଟ ଲେଡି ମେଲାନିଆ ଟ୍ରମ୍ପ, ଝିଅ ଇଭାଙ୍କା ଟ୍ରମ୍ପ, ଜ୍ୱାଇଁ ଜେରେଡ ଆଦି ଆସିଥିଲେ। ତେବେ ମୋଦି ଯେତେବେଳେ ଆମେରିକା ଗସ୍ତ କରିଥିଲେ ମେଡିସନ ସ୍କୋୟାର ଗ୍ରାଉଣ୍ଡରେ ତାଙ୍କୁ ପାଖାପାଖି ୫୦ ହଜାର ଲୋକ ଲାଇଭ୍ ଦେଖିଥିଲେ। ସେଠାରେ ମୋଦି ଯେଉଁ ଭାଷଣ ଦେଇଥିଲେ ସେଥିରେ ସେ ଟ୍ରମ୍ପଙ୍କର ଖୁବ୍ ପ୍ରଶଂସା ବି କରିଥିଲେ। ଏବେ ନିର୍ବାଚନ ପ୍ରଚାରରେ ଏହାକୁ ଟ୍ରମ୍ପ ଅସ୍ତ୍ର କରିଥିବା କୁହାଯାଉଛି।
