ଓ୍ବାଶିଂଟନ,୧୦।୫ : ମଙ୍ଗଳବାର ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଗିରଫ କରାଯାଇଛି। ଏହା ପରେ ଇମ୍ରାନ ଖାନଙ୍କ ସମର୍ଥକମାନେ ଏହାକୁ ତୀବ୍ର ବିରୋଧ କରିଛନ୍ତି। ଇମ୍ରାନଙ୍କ ଗିରଫଦାରୀକୁ ନେଇ ଆମେରିକା ପ୍ରତିକ୍ରିୟା ରଖିଛି। ପାକିସ୍ତାନରେ ହୋଇଥିବା ଅନୈତିକତାକୁ ନେଇ ଆମେରିକା ପ୍ରତିକ୍ରିୟା ପ୍ରକାଶ କରି ପାକିସ୍ତାନରେ ଗଣତାନ୍ତ୍ରିକ ନୀତି ତଥା ଆଇନର ଶାସନକୁ ସମ୍ମାନ ଦେବାକୁ ଆହ୍ବାନ ଦେଇଛି।
ଆମେରିକାର ବୈଦେଶିକ ବିଭାଗର ମୁଖପାତ୍ର କହିଛନ୍ତି କୌଣସି ନେତାଙ୍କ ପାଇଁ ସେମାନଙ୍କର କୌଣସି ଆଦର୍ଶ ନାହିଁ। ପାକିସ୍ତାନରେ ଇମ୍ରାନ ଖାନଙ୍କ ନାଟକୀୟ ଗିରଫଦାରୀକୁ ନେଇ ସେ ଗଣତାନ୍ତ୍ରିକ ନୀତିକୁ ସମ୍ମାନ ଦେବାକୁ କହିଛନ୍ତି।
ମୁଖପାତ୍ର କହିଛନ୍ତି, ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଗିରଫଦାରୀ ବିଷୟରେ ଆମେ ଅବଗତ। ଆମେ ଯେପରି ପୂର୍ବରୁ କହିଛୁ, ଗୋଟିଏ ରାଜନୈତିକ ପ୍ରାର୍ଥୀ କିମ୍ବା ଅନ୍ୟ ଦଳ ବିରୁଦ୍ଧରେ ଆମେରିକାର କୌଣସି ଆଭିମୁଖ୍ୟ ନାହିଁ। ଆମେ ସମଗ୍ର ବିଶ୍ୱରେ ଗଣତାନ୍ତ୍ରିକ ନୀତି ଏବଂ ଆଇନର ଶାସନକୁ ସମ୍ମାନ ଦେବା ପାଇଁ ଆହ୍ବାନ କରୁଛୁ।
ଆମେରିକାର ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ କହିଛନ୍ତି, ଆମେ ନିଶ୍ଚିତ କରିବାକୁ ଚାହୁଁଛୁ ପାକିସ୍ତାନରେ ଯାହା ଘଟୁଛି ତାହା ଆଇନ ଶୃଙ୍ଖଳା, ସମ୍ବିଧାନ ଅନୁଯାୟୀ ଅଟେ। ବ୍ରିଟେନର ବୈଦେଶିକ ସଚିବ ଜେମ୍ସ କ୍ଲିଭର୍ଲି କହିଛନ୍ତି, ଆମେ ପାକିସ୍ତାନରେ ଶାନ୍ତିପୂର୍ଣ୍ଣ ଗଣତନ୍ତ୍ର ଦେଖିବାକୁ ଚାହୁଁଛୁ। ଆମେ ଆଇନର ନିୟମ ଦେଖିବାକୁ ଚାହୁଁଛୁ।