କିଭ୍,୫।୧୦: ଚଳିତ ବର୍ଷ ଫେବୃଆରୀରୁ ଏପର୍ଯ୍ୟନ୍ତ ରୁଷିଆ ୟୁକ୍ରେନ ଉପରେ ଆକ୍ରମଣ ଜାରି ରଖିଛି। ଯେତେବେଳେ ରୁଷିଆ ୟୁକ୍ରେନ ଉପରେ ଆକ୍ରମଣ କରିଥିଲା, ସେତେବେଳେ କାହାରି ଧାରଣା ନ ଥିଲା ଯେ, ୟୁକ୍ରେନ ନିଜକୁ ଏତେ ଦିନ ପର୍ଯ୍ୟନ୍ତ ନିଜକୁ ବଞ୍ଚାଇ ରଖିବା ପାଇଁ ସଂଘର୍ଷ କରିବ। ବର୍ତ୍ତମାନ ପରିସ୍ଥିତି ଏପରି ହୋଇଛି ଯେ, ୟୁକ୍ରେନ ଧୀରେ ଧୀରେ ରୁଷିଆ ଦ୍ୱାରା ଅଧିକୃତ ହୋଇଥିବା ଅଞ୍ଚଳଗୁଡ଼ିକୁ ମୁକ୍ତ କରୁଛି। ନିକଟରେ ୟୁକ୍ରେନ ଦକ୍ଷିଣରେ ଥିବା ନିପ୍ରୋ ନଦୀ କୂଳରେ ଥିବା ଗ୍ରାମଗୁଡ଼ିକୁ ପୁନର୍ବାର ନିଜ ଆୟତ୍ତକୁ ନେଇଛି। ଏହାକୁ ଖେରସନ ଅଞ୍ଚଳରେ ତାଙ୍କର ସବୁଠାରୁ ବଡ ବିଜୟ ଭାବେ ଦେଖାଯାଉଛି। ଫଳରେ ରୁଷିଆ ସେନାକୁ ଅନେକ ଅଞ୍ଚଳରୁ ପଛକୁ ଯିବାକୁ ପଡ଼ିଛି। ୟୁକ୍ରେନର ଗୃହ ମନ୍ତ୍ରଣାଳୟର ପରାମର୍ଶଦାତା ଆଣ୍ଟୋନ ହେରାସ୍ଚେଙ୍କୋ ସ୍ପଷ୍ଟ କରି ସୋସିଆଲ ମିଡିଆରେ ଏକ ଫେଟୋ ପୋଷ୍ଟ କରିଛନ୍ତି। ଯେଉଁଥିରେ ୟୁକ୍ରେନ ସୈନ୍ୟମାନେ ଉକ୍ତ ଅଞ୍ଚଳରେ ନିଜର ପତାକା ଉତ୍ତୋଳନ କରିଥିବା ଦେଖିବାକୁ ମିଳିଛି। ଇତିମଧ୍ୟରେ ରୁଷିଆ ବିରୋଧରେ ଏହି ଯୁଦ୍ଧରେ ଆମେରିକା କ୍ରମାଗତ ଭାବେ ୟୁକ୍ରେନକୁ ସହାୟତା କରିଆସୁଛି। ଆମେରିକା ୟୁକ୍ରେନକୁ ୬୨.୫ କୋଟି ଡଲାରର ସାମରିକ ସହାୟତା ଘୋଷଣା କରିଛି। ଏଥିରେ ହାଇ ମୋବିଲିଟି ଆର୍ଟିଲିୟରି ରକେଟ ସିଷ୍ଟମ (ଏଚ୍ଆଇଏମ୍ଆର୍ଏସ୍) କ୍ଷେପଣାସ୍ତ୍ର ଏବଂ ତୋପ ସହିତ ସାମରିକ ସହାୟତା ମଧ୍ୟ ସାମିଲ ରହିଛି। ଅନ୍ୟପଟେ ବାଇଡେନ ସରକାର କହିଛନ୍ତି ଯେ, ସେ ୟୁକ୍ରେନକୁ ଖୁବ୍ଶୀଘ୍ର ମଧ୍ୟମ ରେଞ୍ଜର ହାଇ-ଟେକ୍ ରକେଟ ସିଷ୍ଟମ ପଠାଉଛନ୍ତି।
