ଓ୍ବାଶିଂଟନ/ନ୍ୟୁୟର୍କ, ୨୨ା୬,(ଅରୂପାନନ୍ଦ ଦେଠୀ): ଏକ ମହାଶକ୍ତି ଭାବେ ଭାରତର ଉତ୍ଥାନକୁ ଆମେରିକା ସମର୍ଥନ କରେ ଓ ଆଗାମୀ ଦିନରେ ଏହା ଜାରି ରହିବ। ହ୍ବାଇଟ୍ ହାଉସ୍ରେ ରାଷ୍ଟ୍ରପତି ଜୋ ବାଇଡେନ୍ଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉଚ୍ଚସ୍ତରୀୟ କଥାବାର୍ତ୍ତା ପୂର୍ବରୁ ପରରାଷ୍ଟ୍ର ବିଭାଗର ଜଣେ ବରିଷ୍ଠ ଅଧିକାରୀ ଏହା କହିଛନ୍ତି। ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଭାରତ ଓ ଆମେରିକା ପରସ୍ପରକୁ ମୁଖ୍ୟ ପ୍ରତିରକ୍ଷା ସହଯୋଗୀ ଭାବେ ଦେଖୁଛନ୍ତି। ମୋଦିଙ୍କ ଗସ୍ତ ଦୁଇ ଦେଶର ସମ୍ପର୍କକୁ ଆହୁରି ଗଭୀର ଓ ନିବିଡ଼ କରିବ। ଭାରତକୁ ବିଶ୍ୱକୁ ନେଇଯିବା ଲାଗି ପ୍ରଧାନମନ୍ତ୍ରୀଙ୍କ ମିଶନକୁ ଆଗେଇ ନେବାରେ ଏହା ସହାୟକ ହେବ ଏବଂ ବୈଶ୍ୱିକ ମଞ୍ଚରେ ଭାରତର ନେତୃତ୍ୱକୁ ପ୍ରଦର୍ଶିତ କରିବ। ମୋଦିଙ୍କ ଗସ୍ତର ୬ଟି ମୁଖ୍ୟ ପ୍ରସଙ୍ଗ ରହିଛି। ତାହା ହେଲା ପ୍ରତିରକ୍ଷା, ପ୍ରଯୁକ୍ତି, ବ୍ୟବସାୟ ଓ ଇନୋଭେଶନ, ଶିକ୍ଷା ଏବଂ ଭ୍ରମଣ କ୍ଷେତ୍ରରେ ସହଯୋଗ ବଢ଼ାଇବା। ଦୁଇ ଦେଶ ପ୍ରମୁଖ ପ୍ରତିରକ୍ଷା ସହଯୋଗୀ ହୋଇଥିବାରୁ ବିଭିନ୍ନ ପ୍ରତିରକ୍ଷା ସରଞ୍ଜାମ ଏକାଠି ନିର୍ମାଣ କରିବା ଦିଗରେ କାର୍ଯ୍ୟ କରିବେ। ଏହା ବ୍ୟତୀତ ସୂଚନା ଆଦାନପ୍ରଦାନ ଓ ଲଜିଷ୍ଟିକ୍ ନେଟ୍ଓ୍ବର୍କ ବଢ଼ାଇବେ ବୋଲି ପରରାଷ୍ଟ୍ର ବିଭାଗ ଅଧିକାରୀ କହିଛନ୍ତି। ସେହିପରି ପ୍ରଯୁକ୍ତି ସହଭାଗିତାରେ ଦୁଇଦେଶ ଏକାଠି ସେମିକଣ୍ଡକ୍ଟର, ଅତ୍ୟାଧୁନିକ ଟେଲିକମ୍, ବାୟୋଟେକ୍, ଆର୍ଟିଫିସିଆଲ ଇଣ୍ଟେଲିଜେନ୍ସ, କ୍ୱାଣ୍ଟମ୍ କମ୍ପ୍ୟୁଟିଂ ପାଇଁ କାର୍ଯ୍ୟ କରିବେ।
ବୁଧବାର ଗସ୍ତର ଦ୍ୱିତୀୟ ଦିନରେ ପ୍ରଧାନମନ୍ତ୍ରୀ ଜାତିସଂଘ ମୁଖ୍ୟାଳୟ ପରିସରରେ ଆୟୋଜିତ ଯୋଗ କାର୍ଯ୍ୟକ୍ରମର ନେତୃତ୍ୱ ନେବା ସହ ଜାତିସଂଘକୁ ଉଦ୍ବୋଧନ ଦେଇ ଯୋଗ ‘ଏକ ଭାରତ, ଶ୍ରେଷ୍ଠ ଭାରତ’ ଭାବନାର ପ୍ରତିନିଧିତ୍ୱ କରୁଥିବା କହିଥିଲେ। ଏହା ପୂର୍ବରୁ ସେ ନ୍ୟୁୟର୍କରେ ନୋବେଲ ବିଜୟୀ ଖ୍ୟାତନାମା ଅର୍ଥନୀତିଜ୍ଞ ପ୍ରଫେସର ପଲ୍ ରୋମର, ନିବେଶକ ତଥା ହେଜ୍ ଫଣ୍ଡ୍ର ସହପ୍ରତିଷ୍ଠାତା, ବ୍ରିଜ୍ଓ୍ବାଟର ଆସୋସିଏଟ୍ସ ରେ ଡାଲିଓ ଏବଂ ଅନ୍ୟ ପ୍ରମୁଖ ଚିନ୍ତାନାୟକମାନଙ୍କ ସହ ବିଭିନ୍ନ ପ୍ରସଙ୍ଗରେ ବିଚାରବିମର୍ଶ କରିଥିଲେ। ଆର୍ଥତ୍କ ଅଭିବୃଦ୍ଧିକୁ ପ୍ରୋତ୍ସାହିତ କରିବା ପାଇଁ ତାଙ୍କ ସରକାରଙ୍କ ସଂସ୍କାରମୂଳକ କାର୍ଯ୍ୟ ସମ୍ପର୍କରେ ପ୍ରଧାନମନ୍ତ୍ରୀ ସେମାନଙ୍କୁ ଅବଗତ କରାଇଥିଲେ। ଆଧାର ବ୍ୟବହାର, ଡିଜିଲକର ସମେତ ଭାରତର ଡିଜିଟାଲ ଯାତ୍ରା ସମ୍ପର୍କରେ ପ୍ରଫେସର ରୋମରଙ୍କ ସହ ପ୍ରଧାନମନ୍ତ୍ରୀ କଥା ହୋଇଥିଲା।
ଆର୍ଥିକ ଅଭିବୃଦ୍ଧିକୁ ଆଗେଇ ନେବା ଲାଗି ସରକାରଙ୍କ ପଦକ୍ଷେପ ସମ୍ପର୍କରେ ଡାଲିଓଙ୍କ ସହ ଆଲୋଚନା ହୋଇଥିବାବେଳେ ମୋଦି ତାଙ୍କୁ ଭାରତ ଆସିବାକୁ ଆମନ୍ତ୍ରଣ କରିଛନ୍ତି। ପ୍ରଧାନମନ୍ତ୍ରୀ ଆଷ୍ଟ୍ରୋଫିଜିକିଷ୍ଟ ତଥା ଲେଖକ ଓ ସାଇନ୍ସ କମ୍ୟୁନିକେଟର ନେଇଲ୍ ଡେ ଗ୍ରାସେ ଟାଇସନ୍ଙ୍କ ସହ ମତ ବିନିମୟ କରିଥିଲେ। ମହାକାଶ କ୍ଷେତ୍ରରେ ଭାରତର ଦ୍ରୁତ ବିକାଶ ସମ୍ପର୍କରେ ଉଭୟଙ୍କ ମଧ୍ୟରେ ଆଲୋଚନା ହୋଇଥିଲା। ଆମେରିକୀୟ ବୌଦ୍ଧ ଧର୍ମାବଲମ୍ବୀ ବିଦ୍ୱାନ ତଥା ପଦ୍ମଶ୍ରୀ ପୁରସ୍କାର ବିଜେତା ପ୍ରଫେସର ରବର୍ଟ ଥୁର୍ମାନ ପ୍ରଧାନମନ୍ତ୍ରୀଙ୍କୁ ଭେଟି ଆଲୋଚନା କରିଥିଲେ। ବୈଶ୍ୱିକ ଚ୍ୟାଲେଞ୍ଜଗୁଡ଼ିକର ସମାଧାନରେ ବୌଦ୍ଧଧର୍ମର ମୂଲ୍ୟବୋଧ କିପରି ମାର୍ଗଦର୍ଶକ ଭାବେ କାର୍ଯ୍ୟ କରିପାରିବ, ସେନେଇ ଆଲୋଚନା ହୋଇଥିଲା। ଏହା ବ୍ୟତୀତ ଆମେରିକାର ଖ୍ୟାତନାମା ଗାଣିତିକ ପରିସଂଖ୍ୟାନବିତ୍, ଶିକ୍ଷାବିତ୍, ବୁଦ୍ଧିଜୀବୀ ତଥା ଲେଖକ ପ୍ରଫେସର ନସିମ ନିକୋଲାସ୍ ଟାଲେବଙ୍କ ସହ ମୋଦି ଭାବ ବିନିମୟ କରିଥିଲେ। ଗ୍ରାମୀ ପୁରସ୍କାର ବିଜୟିନୀ ଭାରତୀୟ-ଆମେରିକୀୟ ଗାୟିକା ଫାଲ୍ଗୁନୀ ଶାହାଙ୍କୁ ଭେଟି ମୋଦି ତାଙ୍କର ଉଚ୍ଚ ପ୍ରଶଂସା କରିଥିଲେ।