ବେଜିଂ,୭।୩ : ଦୀର୍ଘ ଦିନ ଧରି ଚାଇନା ଏବଂ ଆମେରିକା ମଧ୍ୟରେ ତିକ୍ତତା ଜାରି ରହିଛି। ଦୁଇ ବିଶ୍ୱ ଶକ୍ତି ମଧ୍ୟରେ ଉତ୍ତେଜନା କମ୍ ହେବାର ନାମ ନେଉନାହିଁ। ପ୍ରଥମେ ତାଇୱାନ ପ୍ରସଙ୍ଗରେ ଏବଂ ପରେ ଗୁପ୍ତଚର ବେଲୁନ ଉପରେ ଉଭୟେ ମୁହାଁମୁହିଁ ହୋଇଛନ୍ତି। ଏହି ସମୟରେ ଚାଇନା ପୁଣି ଥରେ ଆମେରିକାକୁ କଡ଼ା ସମାଲୋଚନା କରିଛି।
ଚାଇନା ଆମେରିକାକୁ ଚେତାବନୀ ଦେଇଛି ଯେ ଏହାର ଭୁଲ ନୀତି ବଦଳାଇବା ଉଚିତ। ନଚେତ ବିବାଦୀୟ ପରିସ୍ଥିତି ଉପୁଜିବ ଏବଂ ଏହା କ୍ଷତିକାରକ ହେବ। ମଙ୍ଗଳବାର ଏକ ଗଣମାଧ୍ୟମ ସମ୍ମିଳନୀରେ ଚାଇନାର ବୈଦେଶିକ ମନ୍ତ୍ରୀ କିନ ଗ୍ୟାଙ୍ଗ ଏହା କହିଛନ୍ତି।
ଏଥିସହ ସେ କହିଛନ୍ତି ଯେ ଉଚିତ ପ୍ରତିଯୋଗିତା କରିବା ପରିବର୍ତ୍ତେ ଆମେରିକା ଚାଇନାକୁ ଦମନ କରିବାକୁ ଚେଷ୍ଟା କରୁଛି। ଆମେରିକା ଏହାର ଏସିଆ-ପ୍ରଶାନ୍ତ ମହାସାଗର ଅଞ୍ଚଳ ରଣନୀତିରେ ଦ୍ୱିତୀୟ ନାଟୋ ପ୍ରତିଷ୍ଠା କରିବାକୁ ଚାହୁଁଛି। ଏହି ଅଞ୍ଚଳରେ ବିବାଦ ବଢ଼଼ାଇବା ପାଇଁ ଆମେରିକାର ଏହି ଷଡ଼ଯନ୍ତ୍ର ସଫଳ ହେବ ନାହିଁ । ଏହି ରଣନୀତିର ଉଦ୍ଦେଶ୍ୟ ସ୍ପଷ୍ଟ ଏବଂ ଏହା ହେଉଛି ଚାଇନାକୁ ଏହି ଅଞ୍ଚଳରେ ଘେରି ରହିବା ।