ନ୍ୟୁୟର୍କ, ୩।୯(ପି.ଟି.)- ଦୀର୍ଘ ୭ ବର୍ଷ ବ୍ୟବଧାନରେ ପ୍ରଥମ ଭାରତୀୟ ଭାବେ ସୁମିତ ନାଗାଲ କୌଣସି ଏକ ଗ୍ରାଣ୍ଡସ୍ଲାମ ଟେନିସ ଟୁର୍ନାମେଣ୍ଟର ପ୍ରଥମ ରାଉଣ୍ଡ ମ୍ୟାଚ ଜିତିଛନ୍ତି। ଏଠାରେ ଚାଲିଥିବା ୟୁଏସ ଓପନ ଗ୍ରାଣ୍ଡସ୍ଲାମ ଟେନିସର ପୁରୁଷ ସିଙ୍ଗଲ୍ସ ପ୍ରଥମ ରାଉଣ୍ଡରେ ସେ ଆମେରିକାର ବ୍ରାଡ୍ଲି କ୍ଲାନ୍ଙ୍କୁ ପରାସ୍ତ କରିଛନ୍ତି। ଦ୍ୱିତୀୟ ରାଉଣ୍ଡରେ ନାଗାଲ ବିଶ୍ୱର ୩ ନମ୍ବର ଖେଳାଳି ଡୋମିନିକ୍ ଥିମ୍ଙ୍କୁ ଭେଟିବେ।
ଗତବର୍ଷ ଫ୍ଲୁସିଙ୍ଗ୍ ମାଡୋସରେ ରୋଜର ଫେଡରରଙ୍କୁ ଏକ ସେଟ୍ରେ ପଛରେ ପକାଇ ଦେଇଥିବା ନାଗାଲ ଚଳିତ ବର୍ଷ ଚମତ୍କାର ପ୍ରଦର୍ଶନ କରି ସ୍ଥାନୀୟ ପ୍ରତିଦ୍ୱନ୍ଦ୍ୱୀ କ୍ଲାନ୍ଙ୍କୁ ୬-୧, ୬-୩, ୩-୬, ୬-୧ ସେଟ୍ରେ ପରାସ୍ତ କରିଛନ୍ତି। ମଙ୍ଗଳବାର ରାତିରେ ଏହି ମ୍ୟାଚଟି ୨ ଘଣ୍ଟା ୧୨ ମିନିଟ ଧରି ଚାଲିଥିଲା। ପୂର୍ବରୁ ଭାରତର ସୋମଦେବ ଦେବବର୍ମନ ଗ୍ରାଣ୍ଡସ୍ଲାମ ଟୁର୍ନାମେଣ୍ଟର ମୁଖ୍ୟ ଡ୍ରରେ ପ୍ରବେଶ କରି ଗୋଟିଏ ରାଉଣ୍ଡ ଜିତିବାକୁ ସକ୍ଷମ ହୋଇଥିଲେ। ୨୦୧୩ରେ ସେ ଏହି ୟୁଏସ ଓପନର ଫାଇନାଲରେ ସ୍ଲୋଭାକିଆର ଲୁକାସ ଲାକୋଙ୍କୁ ଏକ କଡ଼ା ମୁକାବିଲାରେ ପରାସ୍ତ କରିଥିଲେ। ”୨୦୧୩ରେ ମୁଁ ଏହି ପ୍ରତିଯୋଗିତାର ଜୁନିୟର ବିଭାଗ ପାଇଁ ଯୋଗ୍ୟତା ଅର୍ଜନ କରିଥିଲି। ଏଥର ସିନିୟର ପାଇଁ ଯୋଗ୍ୟତା ପାଇବା ଏବଂ ପ୍ରଥମ ରାଉଣ୍ଡ ଜିତିବା ମୋ ପାଇଁ ବହୁତ କିଛି। ମୁଁ ଏଠାରେ ଖେଳକୁ ଉପଭୋଗ କରିଥାଏ ଏବଂ ଅନେକଥର ଭାଗ୍ୟ ମୋତେ ସାଥ୍ ଦେଇଛି“ ବୋଲି ନାଗାଲ ପ୍ରକାଶ କରିଛନ୍ତି। ୨୦୧୭ ଜାନୁୟାରୀରେ ଅବସର ନେଇଥିବା ସୋମଦେବ ୨୦୧୩ରେ ଅଷ୍ଟ୍ରେଲିଆନ ଓପନ, ଫ୍ରେଞ୍ଚ୍ ଓପନ ଓ ୟୁଏସ ଓପନର ପ୍ରଥମ ରାଉଣ୍ଡ ମ୍ୟାଚ ଜିତିଥିଲେ। ଏହା ବ୍ୟତୀତ ସେ ୨୦୧୧ରେ ଓ୍ବିମ୍ବେଲଡନ ଗ୍ରାଣ୍ଡସ୍ଲାମରେ ମଧ୍ୟ ଦ୍ୱିତୀୟ ରାଉଣ୍ଡ ମ୍ୟାଚ ଖେଳିଥିଲେ। ସୋମଦେବଙ୍କ ପରେ ୟୁକି ଭାମ୍ବ୍ରି, ରାମକୁମାର ରାମନାଥନ ଓ ପ୍ରଜନେଶ ଗୁଣେଶ୍ୱରନଙ୍କ ପରି ଅନେକ ପ୍ରତିଭାବାନ ଖେଳାଳି ଆସିଛନ୍ତି। ମାତ୍ର କେହି ଗ୍ରାଣ୍ଡସ୍ଲାମର ମୁଖ୍ୟ ଡ୍ର’ରେ ପ୍ରବେଶ କରିପାରି ନାହାନ୍ତି। ସାକେଥ ମାୟନେନି ୨୦୧୬ରେ ୟୁଏସ ଓପନ ପ୍ରଥମ ରାଉଣ୍ଡ ଖେଳିଥିଲେ ହେଁ ପ୍ରଥମ ରାଉଣ୍ଡରେ ଚେକ୍ ରିପବ୍ଲିକର ଜିରି ଭେସଲିଙ୍କଠାରୁ ହାରି ଯାଇଥିଲେ।
