ୱାଶିଂଟନ,୨୭ ।୨: ଆମେରିକା ସରକାରଙ୍କ ଜଣେ ବରିଷ୍ଠ ଅଦିକାରୀ କହିଛନ୍ତି, ଅନ୍ତରାଷ୍ଟ୍ରୀୟ ସ୍ତରରେ ଆଗାମୀ ଦିନରେ ଭାରତର ଭୂମିକା ବୃଦ୍ଧି ହେବ । ଏହାସହ ସେ କହିଛନ୍ତି, ଭାରତ ଓ ଆମେରିକା ପରସ୍ପରର ନିକଟତର ହେବେ । ଗତ ସପ୍ତାହରେ ସିଲିକନ ଭ୍ୟାଲିରେ ଭାରତୀୟ ମୂଳ ବାସିନ୍ଦାକୁ ସମ୍ବୋଧିତ କରି ଆମେରିକା ସରକାରଙ୍କ ଦକ୍ଷିଣ ଓ ମଧ୍ୟ ଏସିଆ ମାମଲାର ଡେପୁଟି ଆସିଷ୍ଟାଣ୍ଡ ସେକ୍ରେଟାରୀ ନୌସି ଇଜୋ ଜ୍ୟାକଶନ ଏହା କହିଛନ୍ତି । ସେ କହିଛନ୍ତି ଜି-୨୦ ଅଧ୍ୟକ୍ଷତା ମିଳିଥିବା ଭାରତକୁ ସବୁଦିଗରେ ବିକାଶ କରିବାରେ ସହାୟକ ହେବ ।
ସୂଚନାଯୋଗ୍ୟ, ଗତବର୍ଷ ଡିସେମ୍ବର ୧ରେ ଭାରତକୁ ଜି-୨୦ର ଅଧ୍ୟକ୍ଷ କରାଯାଇଥିଲା । ଜ୍ୟାକସନ କହିଛନ୍ତି, ଯେମିତି ଆମେ ଦେଖୁଛୁ ଭାରତ ଜି-୨୦ ଉପରେ ଅଧ୍ୟକ୍ଷତା କରୁଛି । ଆମେ ଜାଣୁ ଯେ ବିଶ୍ୱ ସ୍ତରରେ ଭାରତର ଭୂମିକା ବୃଦ୍ଧି ପାଇବ ଏବଂ ଏହା ସହିତ ଭାରତ-ଆମେରିକାର ସମ୍ପର୍କ ମଜଭୁତ ହେବ । ଏସୀୟ ଆମରିକୀୟମାନଙ୍କ ଉପରେ ରାଷ୍ଟ୍ରପତିଙ୍କ ପରାମର୍ଶଦାତା ଆୟୋଗର ସଦସ୍ୟ ଅଜୟ ଜୈନ ଭୁତୋରିଆ ଏହି କାର୍ଯ୍ୟକ୍ରମ ଆୟୋଜନ କରିଥିଲେ । ଏହି କାର୍ଯ୍ୟକ୍ରମରେ ଆମେରିକା ସରକାରଙ୍କ ଅନେକେ ଅଧିକାରୀ ଯୋଗ ଦେଇ ଭାରତ-ଆମେରିକା ସମ୍ପର୍କ, ଆମେରିକାରରେ ଭାରତୀୟ ମୂଳ ବାସିନ୍ଦାଙ୍କ ମହତ୍ୱ ବିଷୟରେ କହିଥିଲେ ଏବଂ ଲୋକଙ୍କ ପ୍ରଶ୍ନର ଉତ୍ତର ଦେଇଥିଲେ ।
