ମହାମାରୀ କରୋନା ପୁଣିଥରେ ସମଗ୍ର ବିଶ୍ୱରେ ତାର କାୟା ବିସ୍ତାର କରିବାରେ ଲାଗିଛି। ପୂର୍ବଭଳି ସାମାଜିକ ଦୂରତା ଏବଂ ମାସ୍କର ଆବଶ୍ୟକତା ପଡ଼ୁଛି। ଅଧିକାଂଶ ଲୋକ ଅଛନ୍ତି ଯେଉଁମାନେ କରୋନା ଭୟରେ ସବୁବେଳେ ମାସ୍କ ଲଗାଇବା ସହ ସାମାଜିକ ଦୂରତା ମଧ୍ୟ ବଜାୟ ରଖୁଛନ୍ତି। ମାତ୍ର ଏମିତି ବି କିଛି ଲୋକ ଅଛନ୍ତି ଯେଉଁମାନେ ମାସ୍କ ଲଗାଇବାକୁ ଉଚିତ୍ ମନେ କରୁ ନାହାନ୍ତି। ଖାଲି ସେତିକି ନୁହେଁ, ନିଜର ଅବହେଳା ପାଇଁ ସେମାନେ ଅନ୍ୟର ଜୀବନକୁ ମଧ୍ୟ ବିପଦରେ ପକାଉଛନ୍ତି। ଏମିତି ଏକ ଘଟଣା ଏବେ ଟିକ୍ ଟକ୍ ଭିଡିଓ ମାଧ୍ୟମରେ ସାମ୍ନାକୁ ଆସିଛି।
ଏହି ଭିଡିଓକୁ ଆମେରିକାର ବୋଲି ଜଣାପଡ଼ିଛି। ଭିଡିଓରେ ଦେଖିବାକୁ ମିଳୁଛି ଯେ, ଏକ ଦମ୍ପତି ରେଷ୍ଟୁରାଣ୍ଟରେ ପ୍ରବେଶ କରୁଛନ୍ତି। ଜଣେ ଓ୍ବେଟର ଆସି ସେମାନଙ୍କୁ ମାସ୍କ ପିନ୍ଧିବାକୁ କହୁଛନ୍ତି। ମାତ୍ର ମହିଳା ଗ୍ରାହକଜଣଙ୍କ ତାଙ୍କ ସହ ଯୁକ୍ତିତର୍କ କରୁଛନ୍ତି। ଶେଷରେ ଓ୍ବେଟର ଅନୁରୋଧ କରି କହୁଛନ୍ତି, ଦୟାକରି ମାସ୍କ ପିନ୍ଧି ଦିଅନ୍ତୁ। କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ହେଲେ ମହିଳାଜଣଙ୍କ ଲିପ୍ଷ୍ଟିକ୍ ଲଗାଇଥିବାରୁ ମାସ୍କ ପିନ୍ଧିବାକୁ ମନା କରିଦେଲେ। ମାସ୍କ ଲଗାଇଲେ ତାଙ୍କର ଲିପ୍ଷ୍ଟିକ୍ ଖରାପ ହୋଇଯିବ ବୋଲି ସେ କହୁଛନ୍ତି। ଏ ନେଇ ଉଭୟଙ୍କ ମଧ୍ୟରେ ଅନେକ ସମୟ ପର୍ଯ୍ୟନ୍ତ ଯୁକ୍ତତର୍କ ହେଉଛି। ଶେଷରେ ହୋଟେଲର ମ୍ୟାନେଜର ମଧ୍ୟ ଆସି ତାଙ୍କୁ ବୁଝାଇବାକୁ ଚେଷ୍ଟା କରୁଛନ୍ତି।
ଶେଷରେ ଓ୍ବେଟର ଜଣଙ୍କ ରାଗିଯାଇ ନିଜର ଆପ୍ରୋନ ବାହାର କରି କହୁଛନ୍ତି, ଆପଣଙ୍କ ପରି ଲୋକମାନେ ଅନ୍ୟର ଚାକିରିକୁ ଅସୁବିଧାରେ ପକାଉଛନ୍ତି। ସେ ମ୍ୟାଜେରଙ୍କୁ ନିଜର ଆପ୍ରୋନ ଦେଇ ସେଠାରୁ ଚାଲିଯାଉଛନ୍ତି। ଶେଷରେ ଉକ୍ତ ମହିଳା ଜଣଙ୍କ ନିଜର ଭୁଲ ବୁଝିପାରି ମାସ୍କ ଲଗାଉଛନ୍ତି। ଏହି ଭିଡିଓକୁ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମରେ ମଧ୍ୟ ଶେୟାର କରାଯାଇଛି।
