ପରିଷ୍କାର ପରିଚ୍ଛନ୍ନ ରହିବା ଏକ ସୁସ୍ଥ ଜୀବନର ମୂଳ କଥା। ବିଶେଷକରି ଖାଦ୍ୟ ଗ୍ରହଣ କରିବା ପୂର୍ବରୁ ହାତ ସଫା କରିବା ନିହାତି ଆବଶ୍ୟକ। ବର୍ତ୍ତମାନ କରୋନା ମହାମାରୀ ଆସିବା ପରଠୁ ସମସ୍ତେ ଏଥିପ୍ରତି ବିଶେଷ ସଜାଗ ରହୁଛନ୍ତି। ହେଲେ ସଂକ୍ରମଣ ଭୟରେ ବାରମ୍ବାର ହ୍ୟାଣ୍ଡଓ୍ବାଶ୍ କିମ୍ବା ସାନିଟାଇଜର୍ ବ୍ୟବହାର କରିବା ଦ୍ୱାରା ବିଭିନ୍ନ ତ୍ୱଚାଜନିତ ସମସ୍ୟା ଦେଖିବାକୁ ମିଳୁଛି। ଏମିତିରେ କେଉଁ ସବୁ ଦିଗ ପ୍ରତି ଧ୍ୟାନ ଦେଲେ ଜୀବାଣୁମୁକ୍ତ ରହିବା ସହ ତ୍ୱଚା ମଧ୍ୟ କୋମଳ ରହିବ ଜାଣି ରଖନ୍ତୁ …
ହାତକୁ ବାରମ୍ବାର ଧୋଇବା କିମ୍ବା ଅଧିକ ସାନିଟାଇଜର ଲଗାଇବା ଦ୍ୱାରା ଚର୍ମ ଡ୍ରାଏ ହୋଇଯାଏ। କେବଳ ଏତିକି ନୁହେଁ, କେତେକ ସାନିଟାଇଜରରେ ମିଶୁଥିବା କେମିକାଲ୍ସ, ଆର୍ଟିଫିସିଆଲ୍ ଫ୍ରାଗ୍ନାନ୍ସ, କଲର ଆଦି ହାତର ଚର୍ମକୁ ଡ୍ରାଏ କରିଦିଏ। ଫଳସ୍ବରୂପ ହାତର ତ୍ୱଚା ଶୁଖି ଜାକି ହୋଇଯିବା ଭଳି ଦେଖାଯାଏ। ଏଭଳି ସମସ୍ୟା ଉପୁଜୁଥିଲେ ମଶ୍ଚରାଇଜର୍ଯୁକ୍ତ ସାବୁନ ବା ହାଣ୍ଡ ଓ୍ବାଶ୍ ବ୍ୟବହାର କରନ୍ତୁ। ହାତ ଧୋଇବା ପରେ ଏହାକୁ ପୋଛି ଭେସ୍ଲିନ କିମ୍ବା ମଶ୍ଚରାଇଜର୍ ଆଦି ଲଗାନ୍ତୁ। ଏଥିପାଇଁ ହ୍ୟାଣ୍ଡ କ୍ରିମ୍ ମଧ୍ୟ ବେଶ୍ ଉପଯୋଗୀ।
ହାତର ଡ୍ରାଏନେସ୍ ଦୂର କରି ହାତକୁ ନରମ ଏବଂ ମୁଲାୟମ ରଖିବା ଲାଗି ଅଳ୍ପ ନଡ଼ିଆ ତେଲ ନେଇ ଦୁଇ ପାପୁଲିରେ ଲଗାଇ ଧୀରେ ଧୀରେ ମସାଜ କରନ୍ତୁ। ଏହା ଏକ ପ୍ରାକୃତିକ ମଶ୍ଚରାଇଜର ଭାବେ କାର୍ଯ୍ୟ କରିଥାଏ।
ଏସବୁ ବ୍ୟବହାର ଦ୍ୱାରା ମଧ୍ୟ କୌଣସି ଲାଭ ହେଉ ନାହିଁ ଏବଂ ହାତ ଡ୍ରାଏ ହୋଇ କୌଣସି ଦାଗ ବା ପ୍ୟାଚେସ୍ ଦେଖାଯାଉଛି ତେବେ ତାହା ଏଗ୍ଜିମା ଭଳି ସମସ୍ୟା ସୃଷ୍ଟି କରିବାର ଆଶଙ୍କା ରହିଛି। ତେଣୁ ଅବହେଳା ନ କରି ତୁରନ୍ତ କୌଣସି ସ୍କିନ୍ ଡାକ୍ତରଙ୍କ ପରାମର୍ଶ ନେଇ ଏହାର ଚିକିତ୍ସା କରାଇ ନିଅନ୍ତୁ।
ଶୀତଦିନେ ସ୍କିନ୍ ଡ୍ରାଏ ହେବା ଏକ ସାଧାରଣ ସମସ୍ୟା। ଏମିତିରେ ବାରମ୍ବାର ହ୍ୟାଣ୍ଡ ଓ୍ବାଶ୍ କରିବା କିମ୍ବା ସାନିଟାଇଜର୍ ବ୍ୟବହାର କରିବା ଦ୍ୱାରା ଏହି ସମସ୍ୟା ଅଧିକ ହୋଇପାରେ। ତେଣୁ ଏପରି ନ ହେବା ଲାଗି ସୁରକ୍ଷା ଦୃଷ୍ଟିରୁ ବିକଳ୍ପ ଭାବେ ଆପଣ ଗ୍ଲୋବ୍ସ ବ୍ୟବହାର କରିପାରିବେ।