ନୂଆଦିଲ୍ଲୀ,୩୦।୧୦(ପି.ଟି.): ଯୁବପିଢ଼ିଙ୍କୁ କଟ୍ଟରପନ୍ଥୀ କରିବା ସହ ସମାଜରେ ଉତ୍ତେଜନା ସୃଷ୍ଟି ଲାଗି ବିଭିନ୍ନ ଆତଙ୍କବାଦୀ ସଂଗଠନ ନୂଆ ପ୍ରଯୁକ୍ତିର ଉପଯୋଗ କରୁଛନ୍ତି। ଏହାର ମୁକାବିଲା ପାଇଁ ବୈଶ୍ୱିକ ସ୍ତରରେ ମିଳିତ ଉଦ୍ୟମ ଆବଶ୍ୟକ ବୋଲି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ ଶନିବାର କହିଛନ୍ତି। ଦିଲ୍ଲୀରେ ଜାତିସଂଘ ସୁରକ୍ଷା ପରିଷଦ ଆତଙ୍କବାଦ ନିରୋଧୀ କମିଟି ବୈଠକରେ ବାର୍ତ୍ତା ଦେଇ ଗୁଟେରେସ୍ କହିଛନ୍ତି, ମାନବ ସମାଜର ବିକାଶରେ ନୂଆ ପ୍ରଯୁକ୍ତିର ଅତୁଳନୀୟ ଶକ୍ତି ରହିଛି। ଅଥଚ ଦୁଃଖର ବିଷୟ ତାହା ଆତଙ୍କବାଦୀମାନଙ୍କ ହାତରେ ପଡ଼ିଛି। ସେମାନେ ଏହାକୁ ବ୍ୟବହାର କରିବା ଚିନ୍ତାଜନକ। ଏହି ପ୍ରଯୁକ୍ତି ବଳରେ ସେମାନେ ଭୁଲ୍ ସୂଚନା ପ୍ରସାରଣ କରିବା ସହ ଯୁବକମାନଙ୍କୁ ଉଗ୍ର କରାଉଛନ୍ତି ବୋଲି ଜାତିସଂଘ ମୁଖ୍ୟ କହିଛନ୍ତି। ଦିଲ୍ଲୀରେ ଅନୁଷ୍ଠିତ ଏହି ବୈଠକରେ ଜାତିସଂଘ ସୁରକ୍ଷା ପରିଷଦର ସମସ୍ତ ୧୫ ସଦସ୍ୟ ରାଷ୍ଟ୍ରର ପ୍ରତିନିଧି ଯୋଗ ଦେଇଛନ୍ତି। ଗୁଟେରେସ୍ ପଠାଇଥିବା ବାର୍ତ୍ତାକୁ ଜାତିସଂଘର ଜଣେ କାର୍ଯ୍ୟକର୍ତ୍ତା ପାଠ କରିଥିଲେ।
ଆତଙ୍କବାଦୀଙ୍କ ଦ୍ୱାରା ଏନ୍କ୍ରିପ୍ଟେଡ୍ ମେସେଜିଂ ଏବଂ କ୍ରିପ୍ଟୋ କରେନ୍ସି ବ୍ୟବହାରକୁ ଯଥାସମ୍ଭବ ବନ୍ଦ କରିବା ଲାଗି ବିଶ୍ୱସ୍ତରରେ ବଳିଷ୍ଠ ଉଦ୍ୟମ ହେବା ଆବଶ୍ୟକ ବୋଲି ଶନିବାର ଭାରତ କହିଛି। ଆତଙ୍କବାଦୀ ସଂଗଠନଗୁଡ଼ିକର ଟୁଲ୍କିଟ୍ରେ ସୋସିଆଲ ମିଡିଆ ପ୍ଲାଟ୍ଫର୍ମ ଶକ୍ତିଶାଳୀ ଉପକରଣରେ ପରିଣତ ହେବା ନେଇ ଭାରତର ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ସତର୍କ କରାଇଛନ୍ତି। ଜାତିସଂଘ ସୁରକ୍ଷା ପରିଷଦ ଆତଙ୍କବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ବିଫଳ ହୋଇଥିବା ଶୁକ୍ରବାର ଜୟଶଙ୍କର କହିଥିଲେ।
ସେହିପରି ୟୁଏନ୍ଏସ୍ସି ଆତଙ୍କବାଦୀ ନିରୋଧୀ କମିଟିରେ ଉଦ୍ବୋଧନ ଦେଇ ବ୍ରିଟିଶ ବହିର୍ବ୍ୟାପାର ସଚିବ ଜେମ୍ସ କ୍ଲେଭର୍ଲି କହିଛନ୍ତି, ଆତଙ୍କବାଦୀଙ୍କୁ ପାଣ୍ଠି ଯୋଗାଣ ଏବଂ ଉନ୍ନ ପ୍ରଯୁକ୍ତି ବ୍ୟବହାର ବନ୍ଦ କରିବା ଦିଗରେ ଅନ୍ତର୍ଜାତୀୟ ସମୁଦାୟ ଏକାଠି କାର୍ଯ୍ୟ କରିବା ଜରୁରୀ। ଅନ୍ତର୍ଜାତୀୟ ସ୍ତରରେ ଆତଙ୍କବାଦୀ ନିଯୁକ୍ତି ଲାଗି ଅନ୍ଲାଇନରେ ପ୍ରଚାର କରାଯାଉଛି। ଏହାକୁ ପ୍ରତିହତ କରିବା ଲାଗି କ୍ଲେଭର୍ଲି ଜାତିସଂଘର ସଦସ୍ୟ ରାଷ୍ଟ୍ରଗୁଡ଼ିକୁ ଆହ୍ବାନ ଦେଇଛନ୍ତି।