ନୂଆଦିଲ୍ଲୀ,୧୭।୧୧: ଭାରତୀୟ ବୋଲର୍ ଜସପ୍ରିତ ବୁମ୍ରା ନିଜର ସ୍ବତନ୍ତ୍ର ବୋଲିଂ ଶୈଳୀକୁ ନେଇ ସାରା ବିଶ୍ୱରେ ପରିଚିତ। ତାଙ୍କ ସାମ୍ନାରେ ବଡ଼ ବଡ଼ ବ୍ୟାଟ୍ସମ୍ୟାନ ଅଧିକ ସମୟ ତିଷ୍ଟି ପାରନ୍ତି ନାହିଁ। ହେଲେ ଅଷ୍ଟ୍ରେଲିଆର ଏଭଳି ଜଣେ ବ୍ୟାଟ୍ସମ୍ୟାନ୍ ଅଛନ୍ତି ଯିଏ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ପୂର୍ବରୁ ବୁମ୍ରାଙ୍କୁ ନେଇ ଭୟଭୀତ ନାହାନ୍ତି। କାରଣ ସେ ବେଶ ଆରାମରେ ତାଙ୍କୁ ଖେଳିପାରନ୍ତି। କେବଳ ଏତିକି ନୁହେଁ ବୁମ୍ରା ଆଜିଯାଏ ତାଙ୍କୁ ଟେଷ୍ଟରେ ଆଉଟ୍ କରିପାରିନାହାନ୍ତି। ଆମେ କହୁଛୁ ଅଷ୍ଟ୍ରେଲିଆର ଓପନର ଉସ୍ମାନ ଖ୍ବାଜାଙ୍କ ବିଷୟରେ। ବର୍ଡର ଗାଭାସ୍କର ଟ୍ରଫି ଆରମ୍ଭ ହେବା ପୂର୍ବରୁ ସେ କହିଛନ୍ତି ଯେ ବୁମ୍ରାଙ୍କୁ ଖେଳିବା ବହୁତ ସହଜ। ହେଲେ ସେ ଭାରତୀୟ ଟିମ୍ରୁ ବାଦ୍ ପଡ଼ିଥିବା ଜଣେ ବୋଲରଙ୍କ ନାମ କହିଛନ୍ତି ଯାହାକୁ ସେ ବହୁତ ଡ଼ରିଥାନ୍ତି।
ଭାରତ-ଅଷ୍ଟ୍ରେଲିଆ ମଧ୍ୟରେ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଆରମ୍ଭ ହେବାକୁ ଆଉ ଦିନ କେଇଟା ବାକି। ନଭେମ୍ବର ୨୨ରେ ପ୍ରଥମ ମ୍ୟାଚ୍ ଖେଳାଯିବ। ହେଲେ ଏହା ପୂର୍ବରୁ ଉସ୍ମାନ ଚକିତ କଲା ଭଳି ବୟାନ ଦେଇଛନ୍ତି। ସେ କହିଛନ୍ତି ଯେ, ପ୍ରାରମ୍ଭରୁ ବୁମ୍ରାଙ୍କୁ ଖେଳିବା ସହଜ ହୋଇ ନ ଥାଏ। ହେଲେ କିଛି ସମୟ ଖେଳିବା ପରେ ଅଭ୍ୟାସରେ ପରିଣତ ହୋଇଯାଏ। ’ତେବେ ସେ ଟେଷ୍ଟରେ ବୁମ୍ରାଙ୍କ ୧୫୫ ବଲ୍ ଖେଳିଥିବା ବେଳେ ଗୋଟିଏ ଥର ଆଉଟ୍ ହୋଇନାହାନ୍ତି। ଏଥିରେ ସେ ୪୩ ରନ୍ ମଧ୍ୟ କରିଛନ୍ତି। ଯଦି ଏଭଳି ଚାଲୁ ରହେ ତେବେ ଭାରତୀୟ ଦଳ ଅଡ଼ୁଆରେ ପଡ଼ିପାରେ।
ତେବେ ଉସମାନ୍ ମହମ୍ମଦ ଶାମୀଙ୍କୁ ଡରୁଥିବା କହିଛନ୍ତି। କାରଣ ସେ ଘାତକ ବୋଲିଂ କରନ୍ତି। ଏଯାବତ ସେ ୨୯୬ ବଲ୍ ଖେଳିଥିବା ବେଳେ ୨୪୨ ଡଟ୍ ବଲ୍ ରହିଛି। ସେହିଭଳି ୧୦୯ ରନ୍ କରିବା ସହ ୨ ଥର ଉଇକେଟ ମଧ୍ୟ ହରାଇଛନ୍ତି।
