କିଙ୍ଗ ଅବ୍ଦୁଲ୍ଲା ସ୍ପୋଟର୍ସ ସିଟି (ସୌଦି ଆରବ), ୨୨ା୮(ଏପି): ଆନ୍ଥୋନୀ ଜୋଶୁଆଙ୍କ ବିପକ୍ଷ ଏକ ରିମ୍ୟାଚ୍ରେ ବିଭାଜନ ନିଷ୍ପତ୍ତି ଜରିଆରେ ବିଜୟ ହାସଲ କରି ୟୁକ୍ରେନ୍ ବକ୍ସର ଓଲେକସାଣ୍ଡର ୟୁସିକ୍ ତାଙ୍କ ବିଶ୍ୱ ହେଭିଓ୍ବେଟ୍ ଟାଇଟଲ ବଜାୟ ରଖିଛନ୍ତି। ଗତବର୍ଷ ଏହି ଦୁଇ ବକ୍ସରଙ୍କ ମଧ୍ୟରେ ହୋଇଥିବା ଲଢ଼େଇ ତୁଳନାରେ ଏହି ମୁକାବିଲା ପ୍ରତିଦ୍ୱନ୍ଦ୍ୱିତାମୂଳକ ହୋଇଥିଲା। ୩୫ ବର୍ଷୀୟ ୟୁସିକ୍ ୟୁକ୍ରେନ୍ ଆର୍ମିର ଜଣେ ଯୋଦ୍ଧା। ସେ ୬ ମାସ ହେବ ନିଜ ପାଖରେ ଡବ୍ଲ୍ୟୁବିଏ, ଡବ୍ଲ୍ୟୁବିଓ ଏବଂ ଆଇବିଏଫ୍ ବେଲ୍ଟ ରଖିଛନ୍ତି। ଲଢ଼େଇ ପୂର୍ବରୁ ୟୁକ୍ରେନ୍ ରାଷ୍ଟ୍ରପତି ୟୁସିକ୍ଙ୍କ ନିକଟକୁ ବାର୍ତ୍ତା ପଠାଇ ତାଙ୍କୁ ଉତ୍ସାହିତ କରିଥିଲେ।
ଫାଇନାଲ ବେଲ ବେଳକୁ ଉଭୟ ବକ୍ସର କ୍ଳାନ୍ତ ଜଣାପଡୁଥିଲେ। ମୁକାବିଲା ପରେ ବ୍ରିଟିଶ୍ ପ୍ରଫେସନାଲ ଫାଇଟର ଜୋଶୁଆ ବିଭିନ୍ନ ପରିସ୍ଥିତିରେ ୟୁସିକ୍ଙ୍କ ଲଢୁଆ କୌଶଳର ପ୍ରଶଂସା କରିଥିଲେ। ଏହି ବିଜୟ ସହ ୟୁସିକ୍ ରିଙ୍ଗ୍ ମାଗାଜିନ୍ ବେଲ୍ଟ ହାସଲ କରିଛନ୍ତି। ୟୁକ୍ରେନ୍ର ଏହି ବକ୍ସର ଗୋଟିଏ ହେଭିଓ୍ବେଟ୍ ଟାଇଟଲ ଜିତିବାରେ ସମର୍ଥ ହୋଇ ପାରିନାହାନ୍ତି, ତାହା ହେଲା ଡବ୍ଲ୍ୟୁବିସି।
ଚଳିତବର୍ଷ ଟାଇସନ ଫ୍ୟୁରିଙ୍କ ଅବସର ପରେ ଏହା ଖାଲିପଡ଼ିଛି। ୟୁସିକ୍ କହିଛନ୍ତି, ଫ୍ୟୁରି ଅବସର ନେଇଥିବା ତାଙ୍କର ମନେ ହେଉନାହିଁ। ଟାଇସନ ଫ୍ୟୁରି ତାଙ୍କ ସହ ଲଢ଼େଇ କରିବାକୁ ଚାହାନ୍ତି ବୋଲି ତାଙ୍କର ଦୃଢ଼ ବିଶ୍ୱାସ। ଦୁଇଜଣ ଜଜ୍ ୟୁସିକ୍ଙ୍କ ସପକ୍ଷରେ ୧୧୫-୧୧୩ ଏବଂ ୧୧୬-୧୧୨ ପଏଣ୍ଟ ଦେଇଥିଲେ। ଅନ୍ୟ ଜଣେ ଜୋଶୁଆଙ୍କ ସପକ୍ଷରେ ୧୧୫-୧୧୩ ଦେଇଥିଲେ। ଜୋଶୁଆଙ୍କ ୨୭ଟି ଫାଇଟ୍ ମଧ୍ୟରୁ ଏହା ହେଉଛି ତାଙ୍କର ତୃତୀୟ ପରାଜୟ। ତାଙ୍କ କ୍ୟାରିୟର ବର୍ତ୍ତମାନ ଦୋଛକିରେ। ୟୁସିକ୍ଙ୍କ ପରବର୍ତ୍ତୀ କାର୍ଯ୍ୟକ୍ରମ ବର୍ତ୍ତମାନ ଫ୍ୟୁରିଙ୍କ ଉପରେ ନିର୍ଭର କରେ।
