ଫ୍ଲୋରିଡ଼ା,୭।୪: ରାଜ୍ୟ ସରକାରଙ୍କ ଘୋଷଣା ଅନୁଯାୟୀ ସାରା ରାଜ୍ୟରେ ପ୍ରଥମ ଥର ପାଇଁ ‘ଓଡ଼ିଆ ପକ୍ଷ’ ପାଳନ ହେବା ସମୟରେ ସୁଦୂର ଆମେରିକାରେ ପାଳନ କରାଯାଇଛି ଉତ୍କଳ ଦିବସ। ପ୍ରବାସୀ ଓଡ଼ିଆ ଅନୁଷ୍ଠାନ ‘ଫ୍ଲୋରିଆ’ ତରଫରୁ ଆମେରିକାର ଦକ୍ଷିଣ-ପୂର୍ବରେ ଅବସ୍ଥିତ‘ଫ୍ଲୋରିଡା’ ରାଜ୍ୟର ଟାମ୍ପା ସହରରେ ପାଳିତ ହୋଇଛି ଉତ୍କଳ ଦିବସ। ଓଡ଼ିଆ ଭାଷା, ସାହିତ୍ୟ, ଲୋକକଳା ଏବଂ ସଂସ୍କୃତିର ପ୍ରଚାର ପ୍ରସାର ହେଉଛି ଏହି କାର୍ଯ୍ୟକ୍ରମର ଆଭିମୁଖ୍ୟ। ଉତ୍ତର ପିଢିଙ୍କ ମନରେ ମା’, ମାଟି, ମାତୃଭାଷା ପ୍ରତି ଆଗ୍ରହ ସୃଷ୍ଟି କରାଇବା ହେଉଛି ଏହି କାର୍ଯ୍ୟକ୍ରମର ପ୍ରଧାନ ଉଦ୍ଦେଶ୍ୟ। ଏହି ଉତ୍ସବ ଉପଲକ୍ଷେ ଅନୁଷ୍ଠାନ ତରଫରୁ ପ୍ରଥମଥର ପାଇଁ ‘ବିଶ୍ୱମ୍ଭରା’ ନାମକ ଏକ ଇ ମାଗାଜିନ ପ୍ରକାଶ ପାଇଛି। ଏହି କାର୍ଯ୍ୟକ୍ରମର ଆରମ୍ଭ ‘ବନ୍ଦେ ଉତ୍କଳ ଜନନୀ’ ଗାନ କରାଯାଇ ଆରମ୍ଭ କରାଯାଇଥିଲା। ସାଂସ୍କୃତିକ କାର୍ଯ୍ୟକ୍ରମରେ ଶାସ୍ତ୍ରୀୟ ସଙ୍ଗିତ ସାଙ୍ଗକୁ ବିଭିନ୍ନ ଓଡ଼ିଆ ଆଧୁନିକ ସଙ୍ଗିତ ପରିବେଷଣ କରାଯାଇଥିଲା। ଶତାଧିକ ପ୍ରବାସୀ ଓଡ଼ିଆ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ପୂର୍ବତନ ଫ୍ଲୋରିଡା ଇଞ୍ଜିନିୟରିଂ ବୋର୍ଡ ସଦସ୍ୟ ଶ୍ରୀ ବିଜୟ କୁମାର ପାଣିଗ୍ରାହୀ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।
