ଅଲିଗଡ଼/ଲାହୋର,୨।୧: ଫେସବୁକ୍ରୁ ଆରମ୍ଭ ହୋଇଥିଲା ପ୍ରେମ ସମ୍ପର୍କ। ଦେଖୁଦେଖୁ ବର୍ଷେ କି ଦୁଇ ବର୍ଷ ନୁହେଁ ବରଂ ବିତିଯାଇଥିଲା ଅଢ଼େଇ ବର୍ଷ। ଏଣୁ ପ୍ରେମିକାକୁ ଥରେ ଆଖି ପୁରାଇ ଭେଟିବାକୁ ଇଚ୍ଛା କରିଥିଲେ ପ୍ରେମିକ। ହେଲେ ଏଥିରେ ବାଧା ସାଜିଥିଲା ଭାରତ-ପାକିସ୍ତାନ ମଧ୍ୟରେ ଥିବା ସୀମାରେଖା। ହେଲେ ସେ ନିଜ ନିଷ୍ପତ୍ତିରେ ଥିଲେ ଅଟଳ। ପ୍ରେମିକାଙ୍କୁ ଭେଟିବାକୁ ସୀମାଡେଇଁ ଆରପଟକୁ ଯାଇଥିଲେ। ହେଲେ ଭେଟିବା ତ ଦୂରର କଥା। ଏବେ ସେ ଜେଲରେ। କାହାଣୀଟି ହେଲା ଉତ୍ତରପ୍ରଦେଶର ୩୦ ବର୍ଷୀୟ ଯୁବକ ବାଦଲ ବାବୁଙ୍କର, ଯାହାକି ଏବେ ଚର୍ଚ୍ଚାରେ ରହିଛି।
ଅଲିଗଡ଼ ଜିଲାର ବାଦଲ ବାବୁ ପାକିସ୍ତାନ ମଣ୍ଡି ବାହାଉଦ୍ଦିନ ଜିଲାର ସାନା ରାଣୀଙ୍କ ପ୍ରେମରେ ପଡ଼ିଥିଲେ। ସୋସିଆଲ ମିଡିଆରୁ ଆରମ୍ଭ ହୋଇଥିବା ଏହି ସମ୍ପର୍କ ନିବିଡ଼ ହୋଇଥିଲା। ପରସ୍ପରକୁ ବେଶ ଭଲଭାବେ ଜାଣିବା ପରେ ବାଦଲ ତାଙ୍କୁ ଭେଟିବାକୁ ଇଚ୍ଛା ପ୍ରକାଶ କରିଥିଲେ। ଏଥିଲାଗି ସେ ବେଆଇନ ଭାବେ ପାକିସ୍ତାନ ଚାଲିଯାଇଥିଲେ। ହେଲେ ପାକିସ୍ତାନର ପଞ୍ଜାବ ପୋଲିସ ତାଙ୍କୁ ମଣ୍ଡି ବାହାଉଦ୍ଦିନ ସହରରୁ ଗିରଫ କରିଛି। କେବଳ ଏତିକି ନୁହେଁ ପୋଲିସ ସାନାଙ୍କୁ ଏନେଇ ପଚାରିବାରେ ସେ ବାଦଲଙ୍କୁ ବିବାହ କରିବାକୁ ଚାହାନ୍ତି ନାହିଁ ବୋଲି କହିଛନ୍ତି।
ନିଜର ବୟାନରେ ସାନା କହିଛନ୍ତି, ଫେସବୁକ୍ରୁ ବାଦଲ ବାବୁଙ୍କ ସହ ତାଙ୍କର ବନ୍ଧୁତା ହୋଇଥିଲା। ହେଲେ ସେ ତାଙ୍କୁ ବିବାହ କରିବାକୁ ଇଚ୍ଛୁକ ନୁହନ୍ତି।
ଗଣମାଧ୍ୟମ ରିପୋର୍ଟ ମୁତାବକ, ବାଦଲଙ୍କୁ ଡିସେମ୍ବର ୨୭ରେ ଗିରଫ କରାଯାଇଥିଲା। ସେ ପୋଲିସଙ୍କୁ ନିଜର କୌଣସି ବୈଧ ଯାତ୍ରା କାଗଜପତ୍ର ଦେଖାଇ ପାରି ନ ଥିଲେ। ପରେ ପାକିସ୍ତାନର ବିଦେଶୀ ନାଗରିକ ଅଧିନିୟମ,୧୯୪୬ର ଧାରା ୧୩ ଏବଂ ୧୪ ଅଧିନରେ ମାମଲା ରୁଜୁ କରାଯାଇଛି। ତାଙ୍କୁ କୋର୍ଟରେ ହାଜର କରାଯିବା ପରେ ୧୪ ଦିନର ନ୍ୟାୟିକ ହେପାଜତକୁ ପଠାଇ ଦିଆଯାଇଛି। ଏହାପର ଶୁଣାଣି ଜାନୁଆରୀ ୧୦ରେ କରାଯିବାକୁ ନିର୍ଦ୍ଦେଶ ରହିଛି।
ପାକିସ୍ତାନ ପୋଲିସ ଯାଞ୍ଚରୁ ଜାଣିବାକୁ ପାଇଛି ଯେ ବାଦଲ ବାବୁ ପୂର୍ବରୁ ଏକାଧିକ ଥର ସୀମା ପାର କରିବାକୁ ଚେଷ୍ଟା କରିଛନ୍ତି। ହେଲେ ସେ ବିଫଳ ହୋଇଥିଲେ। ଏବେ କିନ୍ତୁ ସେ ତାହା କରିବାରେ ସଫଳତା ପାଇଥିଲେ। ତେବେ ସେ ବାସ୍ତବରେ ପ୍ରେମିକାଙ୍କୁ ଭେଟିବାକୁ ଯାଇଥିଲେ ନା ଏହା ପଛରେ ଅନ୍ୟ କାରଣ ରହିଛି ତାହା ଜାଣିବାକୁ ପୋଲିସ ତଦନ୍ତକୁ ଆଗେଇଛି।
କହିରଖୁଛୁ, ଏହା ପ୍ରଥମ ଘଟଣା ନୁହେଁ ଯେଉଁଥିରେ ଭାରତର କୌଣସି ବ୍ୟକ୍ତି ପାକିସ୍ତାନ ସୀମା ଡେଇଁଛନ୍ତି। ପୂର୍ବରୁ ଅଞ୍ଜୁ ନାମକ ଜଣେ ଭାରତୀୟ ମହିଳା ପାକିସ୍ତାନରେ ଥିବା ପ୍ରେମିକଙ୍କୁ ଦେଖା କରିବାକୁ ଚାଲିଯାଇଥିଲେ। ଏବେ ସେ ଇସଲାମ ଧର୍ମ ଗ୍ରହଣ କରି ପ୍ରେମିକ ନସରୁଲ୍ଲାହଙ୍କ ହାତ ଧରିଛନ୍ତି।