ରାଉରକେଲା ଅଫିସ୍,୨୮ା୫: ରାଉରକେଲା ବିର୍ସା ମୁଣ୍ଡା ଆନ୍ତର୍ଜାତୀୟ ହକି ଷ୍ଟାଡିୟମରେ ତ୍ରୟୋଦଶ ଉପକନିଷ୍ଠ ପୁରୁଷ ଜାତୀୟ ହକି ଚାମ୍ପିୟନଶିପ୍ର ଦଶମ ଦିନରେ ୨ଟି ସେମିଫାଇନାଲ ମ୍ୟାଚ୍ ଖେଳାଯାଇଛି। ପ୍ରଥମ ମ୍ୟାଚ୍ ଉତ୍ତରପ୍ରଦେଶ ଓ ହରିୟାନା ମଧ୍ୟରେ ଖେଳାଯାଇଥିଲା। ଏଥିରେ ଉତ୍ତର ପ୍ରଦେଶ ଦଳ ହରିୟାନାକୁ ୭-୦ ଗୋଲରେ ପରାସ୍ତ କରି ଫାଇନାଲରେ ପ୍ରବେଶ କରିଛି। ପ୍ରଥମ ସେମିଫାଇନାଲରେ ଉତ୍ତରପ୍ରଦେଶ ଦଳ ଖେଳ ଆରମ୍ଭରୁ ଆକ୍ରାମକ ଖେଳ ପ୍ରଦର୍ଶନ କରିଥିଲା। ଦଳ ପକ୍ଷରୁ ଉଜଲ ପାଲ ୪ ଓ ୩୪ ମିନିଟ୍ରେ ୨ଟି ଗୋଲ ଦେଇଥିବାବେଳେ କେତନ କୋଶୱା ୧୪, ୩୩ ମିନିଟ୍ରେ ହରିୟାନା ବିପକ୍ଷରେ ୨ଟି ଗୋଲ କରି ଦଳକୁ ଆଗୁଆ ରଖିଥିଲେ। ପରେ ରାହୁଲ ଯାଦବ ଖେଳର ଦ୍ୱିତୀୟ ପର୍ଯ୍ୟାୟର ୧୭ ମିନିଟ୍ରେ ଗୋଟିଏ ଗୋଲ କରିଥିଲେ। ଶେଷରେ ରାହୁଲ ରାଜବର ଖେଳର ୩୮ ଓ ୫୧ ମିନିଟରେ ଦୁଇଟି ଗୋଲ ମାରି ଦଳକୁ ବିଜୟୀ କରିଥିଲେ। ଏହାପୂର୍ବରୁ ଉତ୍ତରପ୍ରଦେଶ ଦଳ ଚଣ୍ଡିଗଡକୁ ୭-୦ ଗୋଲରେ ପରାସ୍ତ କରି ପ୍ରଥମ ଟିମ୍ ଭାବେ ସେମିଫାଇନାଲରେ ପ୍ରବେଶ କରିଥିଲା। ସେହିପରି ପ୍ରତିଯୋଗିତାର ଦ୍ୱିତୀୟ ସେମିଫାଇନାଲ ମ୍ୟାଚ୍ ଓଡିଶା ଓ ମଧ୍ୟପ୍ରଦେଶ ମଧ୍ୟରେ ଖେଳାଯାଇଥିଲା। ଏଥିରେ ଓଡିଶା ଦଳ ୩-୧ ଗୋଲରେ ମଧ୍ୟପ୍ରଦେଶ ଦଳକୁ ପରାସ୍ତ କରିଥିଲା। ଓଡିଶା ଦଳ ପକ୍ଷରୁ ପ୍ରଦୀପ ମଣ୍ଡଳ ଖେଳର ପ୍ରଥମ କ୍ୱାର୍ଟରର ୯ ମିନିଟରେ ପ୍ରଥମ ଗୋଲ କରିଥିଲେ। ଖେଳର ଦ୍ୱିତୀୟ ପର୍ଯ୍ୟାୟରେ ଦୀପକ ପ୍ରଧାନ ୧୯ ମିନିଟ ଓ ୪ର୍ଥ କ୍ୱାର୍ଟରର ୫୭ ମିନିଟ୍ରେ ଦୁଇଟି ଗୋଲ କରି ଦଳକୁ ବିଜୟୀ କରିଥିଲେ। ମଧ୍ୟପ୍ରଦେଶ ଦଳ ପକ୍ଷରୁ ଆସିର ଆଦିଲ ଖାନ ଓଡିଶା ବିପକ୍ଷରେ ଗୋଟିଏ ଗୋଲ କରିଥିଲେ। ପ୍ରତିଯୋଗିତାର ଫାଇନାଲ ମ୍ୟାଚ୍ ରବିବାର ଉତ୍ତରପ୍ରଦେଶ ଓ ଓଡିଶା ମଧ୍ୟରେ ହେବ ବୋଲି ସୂଚନା ମିଳିଛି।
