ଲକ୍ଷ୍ନୌ, ୨୪।୧୦: ଉତ୍ତରପ୍ରଦେଶର ମୁଜାଫରନଗର ଜିଲାର ପରିବାର କୋର୍ଟ ଏକ ବଡ଼ ରାୟ ଶୁଣାଇଛନ୍ତି। ସ୍ତ୍ରୀ ସ୍ବାମୀଙ୍କୁ ଭରଣପୋଷଣ ପାଇଁ ଟଙ୍କା ଦେବେ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି। ଏହା ଏକ ଭିନ୍ନ ମାମଲା।
ଖତୌଲି ତହସିଲ ଅଞ୍ଚଳରେ ରହୁଥିବା କିଶୋର ଲାଲ ସୋହଙ୍କାରଙ୍କର ୩୦ ବର୍ଷ ପୂର୍ବେ କାନପୁରର ମୁନ୍ନି ଦେବୀଙ୍କ ସହ ବିବାହ ହୋଇଥିଲା। ବିବାହର କିଛି ମାସ ପରେ ଉଭୟଙ୍କ ମଧ୍ୟରେ ବିବାଦ ଲାଗିରହିଲା। ପରେ ଉଭୟ ପରସ୍ପରଠାରୁ ଅଲଗା ହେବା ପାଇଁ ନିଷ୍ପତ୍ତି ନେଲେ। ସେମାନେ ଅଲଗା ହେବା ଇତିମଧ୍ୟରେ ପ୍ରାୟ ୧୦ ବର୍ଷ ବିତିଯାଇଛି।
ତେବେ ସ୍ବାମୀଙ୍କଠାରୁ ଅଲଗା ହେବା ପରେ ମୁନ୍ନି ଦେବୀ କାନପୁରର ଭାରତୀୟ ସେନା ବିଭାଗର ଚତୁର୍ଥ ଶ୍ରେଣୀ କର୍ମଚାରୀଭାବେ କାମ କରିଥିଲେ। କିଛି ମାସ ତଳେ ସେ ଅବସର ନେଲେ। ପରେ ୧୨ ହଜାର ଟଙ୍କା ପେନ୍ସନ ପାଇ ସେଥିରେ ନିଜର ଗୁରୁରାଟ ମେଣ୍ଟାଇଆସୁଥିଲେ।
ସେହିପରି କିଶୋରୀ ଲାଲ ଚା’ ବିକି ପେଟ ପୋଷୁଥିଲେ। କିନ୍ତୁ ୭ ବର୍ଷ ପୂର୍ବେ ସେ ମୁଜାଫରନଗର ପରିବାର କୋର୍ଟରେ ନିଜର ରକ୍ଷଣାବେକ୍ଷଣ ପାଇଁ ଏକ ମାମଲା ଦାୟର କରିଥିଲେ। ତେବେ ଗତ ମଙ୍ଗଳବାର ପରିବାର କୋର୍ଟ ମୁନ୍ନି ଦେବୀ ତାଙ୍କ ସ୍ବାମୀ କିଶୋରୀ ଲାଲଙ୍କୁ ପ୍ରତି ମାସରେ ଭରଣପୋଷଣ ପାଇଁ ୨ ହଜାର ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି। ହେଲେ କୋର୍ଟଙ୍କ ଏପରି ନିଷ୍ପତ୍ତିରେ କିଶୋରୀ ଲାଲ ଆଦୌ ହେଲେ ସନ୍ତୁଷ୍ଟ ନାହାନ୍ତି। ସେ କୁହନ୍ତି, ୯ ବର୍ଷ ହେବ ମୁଁ କେସ୍ ଲଢ଼ିଆସୁଥିଲି। ଏଥିପାଇଁ ଲୋକଙ୍କଠାରୁ ବହୁତ ଧାର ଉଧାର ମଧ୍ୟ କରିଛି। ହେଲେ ଏବେ ମାତ୍ର ୨ ହଜାର ଟଙ୍କା ରକ୍ଷଣାବେକ୍ଷଣ ଟଙ୍କା ମିଳିବ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି। ଏକ ତୃତୀୟାଂଶ ଭତ୍ତା ମିଳିବା କଥା ବୋଲି ସେ କହିଛନ୍ତି।
