ଡେରାଡୁନ,୨୬।୧: ଟିମ୍ ଇଣ୍ଡିଆର ଉଇକେଟ କିପର ତଥା ବ୍ୟାଟ୍ସମ୍ୟାନ ରିଷଭ ପନ୍ତ ଗତ ଡିସେମ୍ବରରେ ଏକ ସଡ଼କ ଦୁର୍ଘଟଣାରେ ଗୁରୁତର ଆହତ ହୋଇଥିଲେ। ସେହି ସମୟରେ ଜଣେ ବସ୍ ଡ୍ରାଇଭର ଓ କଣ୍ଡକ୍ଟର ଦେବଦୂତ ସାଜିି ରିଷଭ ପନ୍ତଙ୍କ ଜୀବନ ରକ୍ଷା କରିଥିଲେ। ଏଥିସହ ଗୁରୁତର ଭାବେ ତାଙ୍କୁ ଉଦ୍ଧାର କରି ଡେରାଡୁନର ମ୍ୟାକ୍ସ ହସ୍ପିଟାଲରେ ଚିକିତ୍ସା କରାଇଥିଲେ। ତେବେ ତାଙ୍କର ଏହି ମହାନ୍ କାର୍ଯ୍ୟ ପାଇଁ ଗୁରୁବାର ସାଧାରଣତନ୍ତ୍ର ଦିବସ ଅବସରରେ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ବସ୍ ଡ୍ରାଇଭର ସୁଶୀଲ କୁମାର ଓ କଣ୍ଡକ୍ଟର ପରମଜୀତଙ୍କୁ ସମ୍ମାନିତ କରିଛନ୍ତି। ସୁଶୀଲଙ୍କ ସ୍ତ୍ରୀ ଋତୁ ଏବଂ ପରମଜୀତଙ୍କ ବାପା ସୁରେଶ କୁମାର ଏହି ସମ୍ମାନ ଗ୍ରହଣ କରିଥିଲେ। ଏଥିସହ ମୁଖ୍ୟମନ୍ତ୍ରୀ ଧାମି ରଜତ କୁମାର ଓ ନୀଶୁ କୁମାରଙ୍କୁ ମଧ୍ୟ ସମ୍ମାନିତ କରିଛନ୍ତି। ଦୁର୍ଘଟଣା ଦିନ ଏହି ଦୁଇ ଜଣଙ୍କ ଭୂମିକା ମଧ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିଥିଲା। ସୂଚନାଯୋଗ୍ୟ, ରିଷଭ ପନ୍ତ ଉତ୍ତରାଖଣ୍ଡର ରୁର୍କୀ ଯାଉଥିବା ବେଳେ ଦିଲ୍ଲୀ-ଡେରାଡୁନର ରାଜରାସ୍ତାରେ ତାଙ୍କ କାର ଡିଭାଇଡରରେ ପିଟି ହୋଇଯାଇଥିଲା। ଏହାପରେ ତାଙ୍କ କାରରେ ନିଆଁ ଲାଗିଯାଇଥିଲା। ସେହି ସମୟରେ ସୁଶୀଲ କୁମାର ଓ ପରମଜୀତ ତାଙ୍କୁ କାର୍ରୁ ବାହାରିବାକୁ ସାହାଯ୍ୟ କରିଥିଲେ। ସେହିପରି ରଜତ ଓ ନୀଶୁ ରିଷଭଙ୍କ ସମସ୍ତ ଜିନିଷ ଓ ଟଙ୍କାକୁ ଜଳୁଥିବାର କାର୍ରୁ ବାହାର କରିଥିଲେ। ଏହାପରେ ସେମାନେ ପନ୍ତଙ୍କ ସମସ୍ତ ଜିନିଷକୁ ପୋଲିସକୁ ହସ୍ତାନ୍ତର କରିଥିଲେ। ପନ୍ତଙ୍କୁ ଗୁରୁତର ଭାବେ ଉଦ୍ଧାର କରି ପ୍ରଥମେ ଡେରାଡୁନର ମ୍ୟାକ୍ସ ହସ୍ପିଟାଲ ଓ ପରେ ମୁମ୍ବାଇ ସ୍ଥିତ କୋକିଲା ବେନ ହସ୍ପିଟାଲକୁ ତାଙ୍କୁ ସ୍ଥାନାନ୍ତରିତ କରାଯାଇଥିଲା। ଯେଉଁଠାରେ ତାଙ୍କର ଚଳିତ ମାସରେ ସର୍ଜରୀ ହୋଇଛି।
