ଡେରାଡୁନ୍,୨୩ା୫: ଉତ୍ତରାଖଣ୍ଡର ଡେରାଡୁନ୍ସ୍ଥିତ ଶ୍ରୀଗୁରୁ ରାମ ରାୟ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ଆଣ୍ଡ ହେଲ୍ଥ ସାଇନ୍ସରେ ଜଣେ ୨୬ ବର୍ଷୀୟ ଜୁନିୟର ଡାକ୍ତରଙ୍କ ଆତ୍ମହତ୍ୟାକୁ ନେଇ ଉତ୍ତେଜନା ଲାଗିରହିଛି। ଗତ ୧୭ ତାରିଖରେ ଉକ୍ତ ପେଡିଆଟ୍ରିକ୍ ଛାତ୍ରଙ୍କ ମୃତଦେହ ତାଙ୍କ ହଷ୍ଟେଲ ରୁମ୍ରୁ ମିଳିଥିଲା।
ପ୍ରଫେସରମାନେ ହଇରାଣ କରିବା ଏବଂ ଦୀର୍ଘ ସମୟ କାର୍ଯ୍ୟ କରିବାକୁ ବାଧ୍ୟ କରିବା ଜୁନିୟର ଡାକ୍ତରଙ୍କ ଆତ୍ମହତ୍ୟାର କାରଣ ବୋଲି ତାଙ୍କ ପରିବାର ଓ ବନ୍ଧୁମାନେ ଅଭିଯୋଗ କରିଛନ୍ତି। ତାଙ୍କର ଏକ ସନ୍ଦର୍ଭକୁ ଜଣେ ପ୍ରଫେସର ବାରମ୍ବାର ପ୍ରତ୍ୟାଖ୍ୟାନ କରିଦେଇଥିଲେ ବୋଲି ଅଭିଯୋଗ ହୋଇଛି। ପୁଅର ମୃତ୍ୟୁ ପାଇଁ ଜୁନିୟର ଡାକ୍ତରଙ୍କ ବାପା କଲେଜ ପରିଚାଳନା କମିଟି ଏବଂ ୩ ଜଣଙ୍କୁ ଦାୟୀ କରିଛନ୍ତି।
ତାଙ୍କ ଅଭିଯୋଗ ଆଧାରରେ ପୋଲିସ ପେଡିଆଟ୍ରିକ୍ ବିଭାଗ ମୁଖ୍ୟ ଡ. ଉତ୍କର୍ଷ ଶର୍ମା, ପ୍ରଫେସର ଆଶିଷ ସେଠୀ ଏବଂ ବିନ୍ଦୁ ଅଗ୍ରଓ୍ବାଲଙ୍କ ବିରୋଧରେ ଆଇପିସିର ଧାରା ୩୦୬ରେ ମାମଲା ରୁଜୁ କରିଛି।
ପୁଅ ଗତବର୍ଷ ଅକ୍ଟୋବରରେ କଲେଜରେ ଯୋଗଦେବା ପରେ ଉପରୋକ୍ତ ୩ ଜଣଙ୍କ ସମେତ ପରିଚାଳନା କମିଟି ତାଙ୍କୁ ହଇରାଣ କରିଆସୁଥିଲେ। ଏପରିକି ୧୦୪ ଡିଗ୍ରୀ ଜ୍ୱର ସତ୍ତ୍ୱେ ତାଙ୍କୁ ୩୬ ଘଣ୍ଟିଆ ଶିଫ୍ଟରେ କାର୍ଯ୍ୟ କରିବାକୁ ବାଧ୍ୟ କରାଯାଇଥିଲା। ଉତ୍କର୍ଷ ତାଙ୍କ ଥେସିସ୍କୁ ୨ ଥର ଖାରଜ କରିଦେବା ସହ ପାସ୍ କରିଦେବା ପାଇଁ ୫ ଲକ୍ଷ ଟଙ୍କା ଦାବି କରିଥିଲେ। ରୋଗୀଙ୍କ ଆଗରେ ସେ ପୁଅକୁ ଅପମାନିତ କରୁଥିଲେ। ବିନ୍ଦୁ ତାଙ୍କୁ ମାନସିକ ନିର୍ଯାତନା ଦେଉଥିଲେ ବୋଲି ଛାତ୍ରଙ୍କ ବାପା ଅଭିଯୋଗରେ ଦର୍ଶାଇଛନ୍ତି।