ଡେରାଡୁନ,୨୦ ।୯: ଉତ୍ତରାଖଣ୍ଡ କ୍ୟାବିନେଟରେ ଖୁବଶୀଘ୍ର ବଡ ଧରଣର ଅଦଳବଦଳ ହୋଇପାରେ । ରାଜ୍ୟରେ ନୂଆ ସରକାର ଗଠନ ହେବା ପରେ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କ କ୍ୟାବିନେଟରେ ଏହା ପ୍ରଥମ ଅଦଳବଦଳ ହେବ । ଯେଉଁଥିରେ ମନ୍ତ୍ରୀଙ୍କ ପୋର୍ଟଫୋଲିଓ ବଦଳି ପାରେ କିମ୍ବା କୌଣସି ବିଧାୟକଙ୍କୁ ମନ୍ତ୍ରଣାଳୟ ଦିଆଯାଇପାରେ । କାହାକୁ କେଉଁ ମନ୍ତ୍ରଣାଳୟ ମିଳିବ ତାହା ଏବେ ସ୍ପଷ୍ଟ ହୋଇ ନ ଥିବା ବେଳେ ଦିଲ୍ଲୀରେ ଭାରତୀୟ ଜନତା ପାର୍ଟି(ଭାଜପା) ହାଇକମାଣ୍ଡ ଏହା ଉପରେ ଖୁବଶୀଘ୍ର ନିଷ୍ପତ୍ତି ନେଇପାରନ୍ତି ।
ସମାଚାର ଏଜେନ୍ସି ଏଏନଆଇର ସୂଚନା ଅନୁଯାୟୀ, ରାଜ୍ୟ କ୍ୟାବିନେଟରେ ଖୁବଶୀଘ୍ର ଅଦଳବଦଳ ହେବ । ଭାଜପା ହାଇକମାଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କୁ ମନ୍ତ୍ରୀ ଓ ବିଧାୟକଙ୍କ ଏକ ଗୋପନୀୟ ରିପୋର୍ଟ ମାଗିଛନ୍ତି । ମୁଖ୍ୟମନ୍ତ୍ରୀ ଧାମି ବି ଏବେ ଦିଲ୍ଲୀ ଗସ୍ତରେ ଅଛନ୍ତି । ସେ ମଙ୍ଗଳବାର ଦିଲ୍ଲୀରେ ଥିବା ଭାଜପା ମୁଖ୍ୟାଳୟରେ ପହଞ୍ଚିଛନ୍ତି । ୨୦୨୨ ବିଧାନସଭା ନିର୍ବାଚନରେ ପୁଷ୍କର ସିଂ ଧାମି ଖଟିନା ଆସନରୁ ନିର୍ବାଚନ ହାରି ଯାଇଥିଲେ । ହେଲେ ଦଳ ତାଙ୍କ ଉପରେ ଭରସା କରି ତାଙ୍କୁ ବିଧାୟକ ଦଳର ନେତା ନିର୍ବାଚିତ କରିଥିଲା । ଧାମି ୨୪ ମାର୍ଚ୍ଚ ୨୦୨୨ରେ ଉତ୍ତରାଖଣ୍ଡର ୧୨ତମ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ।