ବେଙ୍ଗାଲୁରୁ, ୬।୭: ଦୁଲିପ ଟ୍ରଫି କ୍ରିକେଟର ଏଠାରେ ଆରମ୍ଭ ହୋଇଥିବା ଦ୍ୱିତୀୟ ସେମିଫାଇନାଲରେ ଦକ୍ଷିଣାଞ୍ଚଳ ବୋଲରମାନେ ଚମତ୍କାର ବୋଲିଂ କରି ଉତ୍ତରାଞ୍ଚଳ ପ୍ରଥମ ଇନିଂସକୁ ୧୯୮ ରନରେ ସୀମିତ ରଖିଛନ୍ତି। ପଶ୍ଚିମାଞ୍ଚଳ ବୋଲିଂ ଆକ୍ରମଣର ନେତୃତ୍ୱ ନେଇଛନ୍ତି ବିଦ୍ୱାଥ କଭେରପ୍ପା। ଏହି ଡାହାଣହାତୀ ମିଡିୟମ ପେସର ୨୮ ରନ ବିନିମୟରେ ୫ ଉଇକେଟ ହାସଲ କରି ଉତ୍ତରାଞ୍ଚଳର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ। ଅନ୍ୟ ବୋଲରଙ୍କ ମଧ୍ୟରେ କେ.ଭି. ଶଶିକାନ୍ତ ୨ଟି ଏବଂ ବିଜୟ କୁମାର ବ୍ୟଶକ, ସାଇ କିଶୋର ଓ ଓ୍ବାଶିଂଟନ ସୁନ୍ଦର ଗୋଟିଏ ଲେଖାଏ ଉଇକେଟ ନେଇଥିଲେ। ଉତ୍ତରାଞ୍ଚଳ ପକ୍ଷରୁ ପ୍ରଭସିମରନ ସିଂ ସର୍ବାଧିକ ୪୯, ଅଙ୍କିତ କୁମାର ୩୩ ଓ ହର୍ଷିତ ରାଣା ୩୧ ରନ କରିଥିଲେ। ପଶ୍ଚିମାଞ୍ଚଳ ମଧ୍ୟ ପ୍ରଥମ ଇନିଂସରେ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ପ୍ରଥମ ଦିବସ ଖେଳ ଶେଷ ବେଳକୁ ୬୩ ରନ ମଧ୍ୟରେ ୪ ଉଇକେଟ ହରାଇଛି। ମୟଙ୍କ ଅଗ୍ରଓ୍ବାଲ ୩୭ ଓ ତିଲକ ବର୍ମା ୧୨ ରନରେ ଅପରାଜିତ ରହିଛନ୍ତି। ଆଉଟ ହୋଇଥିବା ୪ ଜଣ ଯାକ ବ୍ୟାଟର ଦୁଇଅଙ୍କ ସ୍ପର୍ଶ କରିପାରି ନ ଥିଲେ। ଉତ୍ତରାଞ୍ଚଳ ପକ୍ଷରୁ ବାଲ୍ତେଜ୍ ସିଂ ଓ ହର୍ଷିତ ରାଣା ୨ଟି ଲେଖାଏ ଉଇକେଟ ନେଇଛନ୍ତି।