ନୂଆଦିଲ୍ଲୀ,୮।୧୨: ବ୍ରିଟେନରେ ମଙ୍ଗଳବାରଠାରୁ ଲୋକଙ୍କୁ ଫାଇଜର ଏବଂ ବାୟୋଏନ୍ଟେକ୍ ଦ୍ୱାରା ପ୍ରସ୍ତୁତ ହୋଇଥିବା କରୋନା ପ୍ରତିଷେଧକ ଟିକା ଦିଆଯିବା ଆରମ୍ଭ ହୋଇଛି। ପ୍ରଥମ ଟିକା ୯୦ ବର୍ଷ ବୟସ୍କା ମହିଳା ମାଗରିଟ୍ କିନାନ୍ଙ୍କୁ ଦିଆଯାଇଛି। ଫାଇଜର ଏବଂ ବାୟୋଏନ୍ଟେକ୍ ଦ୍ୱାରା ପ୍ରସ୍ତୁତ ଟିକା ନେବାରେ ସେ ଦୁନିଆର ପ୍ରଥମ ମହିଳା। ସେହିପରି ୮୭ ବର୍ଷ ବୟସ୍କ ଭାରତୀୟ ବଂଶୋଦ୍ଭବ ହାରି ଶୁକ୍ଳାଙ୍କୁ ମଧ୍ୟ ଟିକା ଦିଆଯାଇଛି। ଦେଶର ୫୦ଟି ହସ୍ପିଟାଲରେ ଟିକାରଣ କାର୍ଯ୍ୟ ଆରମ୍ଭ ହୋଇଛି। ମୋଟ ୮ ଲକ୍ଷ ଟିକା ଲୋକଙ୍କୁ ଦିଆଯିବ। ଟିକାକରଣ କାର୍ଯ୍ୟ ପାଇଁ ସରକାରଙ୍କ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାମଡ଼ି କରାଯାଇଛି। ସରକାରଙ୍କ ପକ୍ଷରୁ ସ୍ବୀକୃତି ପାଇବା ପରେ ଫାଇଜର ଏବଂ ବାୟୋଏନ୍ଟେକ୍ ଦ୍ୱାରା ପ୍ରସ୍ତୁତ ଟିକା ଦିଆଯିବା ଲାଗି ଯୋଜନାବଦ୍ଧ ଭାବେ କାର୍ଯ୍ୟ ଆରମ୍ଭ ହୋଇଥିବା କୁହାଯାଉଛି। ଏହା ଦ୍ୱାରା ପ୍ରଥମ ପାଶ୍ଚାତ୍ୟ ଦେଶ ଭାବେ ବ୍ରିଟେନ୍ରେ କରୋନା ଟିକା ଉପଲବ୍ଧ ହୋଇଛି। ଫାଇଜର ଟିକା କରୋନା ଭୁତାଣୁ ବିରୋଧରେ ୯୫ ପ୍ରତିଶତରୁ ଅଧିକ ସୁରକ୍ଷା ପ୍ରଦାନ କରିବାକୁ ସକ୍ଷମ ହେଉଥିବା ପ୍ରସ୍ତୁତକାରୀ କମ୍ପାନୀ ପକ୍ଷରୁ କୁହାଯାଇଛି। ବ୍ରିଟେନ୍ରେ ଟିକା ଉପଲବ୍ଧ ପାଇଁ ଜର୍ମାନୀର ବାୟୋଫାର୍ମାସ୍ୟୁଟିକାଲ କମ୍ପାନୀ ବାୟୋଏନ୍ଟେକ୍ ଏହାର ଆମେରିକା ସହଯୋଗୀ ଫାଇଜର ପକ୍ଷରୁ ୟୁରୋପୀୟ ମହାସଂଘ ସମ୍ମୁଖରେ ଟିକା ପଞ୍ଜିକରଣ ପାଇଁ ଔପଚାରିକ ଭାବେ ଆବେଦନ କରାଯାଇଥିଲା। ପରେ ଏହାକୁ ମଞ୍ଜୁରୀ ମିଳିଥିଲା। ବ୍ରିଟେନ୍ର ମେଡିସିନ୍ ଏବଂ ହେଲଥ୍ କେୟାର ପ୍ରଡକ୍ଟ ରେଗୁଲେଟାରୀ ଏଜେନ୍ସି ଏହି ଟିକାର ଗୁଣବତ୍ତା ଆକଳନ ଲାଗି ମଞ୍ଜୁରୀ ଦେଇଥିଲେ। ଏହାପରେ ୟୁରୋପୀୟ ମହାସଂଘର ସ୍କଟଲାଣ୍ଡ୍, ଓ୍ବାଲେସ୍ ଏବଂ ଉତ୍ତର ଅୟାରଲାଣ୍ଡରେ ମଧ୍ୟ ଟିକାକରଣ କରାଯିବ।