ଅହମଦାବାଦ: ଗଣେଶ ପୂଜା ପାଇଁ ଏବେଠାରୁ ମୂର୍ତ୍ତି ତିଆରି ଆରମ୍ଭ ହୋଇଗଲାଣି। ବିଭିନ୍ନ ସହରରେ ଭିନ୍ନ ଭିନ୍ନ ଶୈଳୀରେ ଗଜାନନ ମୂର୍ତ୍ତି ନିର୍ମାଣ ଚାଲିଛି। ଏହି କ୍ରମରେ ଏକ ସ୍ବତନ୍ତ୍ର ଧରଣର ମୂର୍ତ୍ତି ତିଆରି କରି ଏବେ ଚର୍ଚ୍ଚିତ ହୋଇଛନ୍ତି ଗୁଜରାଟର କରିଗର ଦକ୍ଷ ଜାଙ୍ଗିଡ। କୋଭିଡ୍ ଭାକ୍ସିନ୍ ଏବଂ ସିରିଞ୍ଜ ସହିତ ମାସ୍କ ଧରିଥିବା ଏକ ଇକୋ ଫ୍ରେଣ୍ଡଲି ଗଣେଶ ମୂର୍ତ୍ତି ତିଆରି କରି ସେ ସଚେତନତାର ବାର୍ତ୍ତା ଦେଇଛନ୍ତି। ଦକ୍ଷ ଜାଙ୍ଗିଡଙ୍କ ଗଣେଶ ମୂର୍ତ୍ତିକୁ ନେଇ ଏବେଠାରୁ ଚର୍ଚ୍ଚା ଆରମ୍ଭ ହୋଇଛି। କାହିଁକି ନା ତାଙ୍କର ମୂର୍ତ୍ତିରେ ରହିଛି କୋଭିଡ୍ ସଚେତନତା ବାର୍ତ୍ତାର ଏକ ସ୍ବତନ୍ତ୍ର ଷ୍ଟାଇଲ୍। ଗଣେଶଙ୍କ ମାଧ୍ୟମରେ ସେ ଟିକାକରଣ ସହିତ ତୃତୀୟ ଲହର ପ୍ରତି ସତର୍କ ରହିବା ନିମନ୍ତେ ସଚେତନ କରାଇଛନ୍ତି। ଏଥିପାଇଁ ସେ ଏଭଳି ମୂର୍ତ୍ତି ତିଆରି କରିଛନ୍ତି; ଯେଉଁଥିରେ ଗଣେଶ ଭଗବାନ ଏକ କୋଭିଡ୍ ଭାକ୍ସିନ୍ ଶିଶି ଉପରେ ବସିଛନ୍ତି ଏବଂ ତାଙ୍କ ପାଖରେ ସିରିଞ୍ଜ ମଧ୍ୟ ରହିଛି। ଖାଲି ସେତିକି ନୁହେଁ, ଗଣେଶ ଗୋଟିଏ ହାତରେ ମାସ୍କ ମଧ୍ୟ ଧରିଛନ୍ତି। ଏଭଳି ଏକ ଇକୋ ଫ୍ରେଣ୍ଡ୍ଲି ମୂର୍ତ୍ତି ତିଆରି କରିବା ପଛରେ ତାଙ୍କର ଉଦ୍ଦେଶ୍ୟ ହେଉଛି ଲୋକଙ୍କୁ ସଚେତନ କରିବା। ସମସ୍ତେ ଟିକା ନେବାର ଆବଶ୍ୟକତା ରହିଛି। ଏହାଛଡ଼ା ତୃତୀୟ ଲହର ରୋକିବା ନିମନ୍ତେ ମାସ୍କ ମଧ୍ୟ ବ୍ୟବହାର କରିବା ଜରୁରୀ। ଏହା ବ୍ୟତୀତ ମୂର୍ତ୍ତି ପାଖରେ କୋଭିଡ୍ ଯୋଦ୍ଧାଙ୍କୁ ମଧ୍ୟ ସ୍ଥାନ ଦେଇଛନ୍ତି କାରିଗର। ଏଭଳି ଏକ ମୂର୍ତ୍ତି ମାଧ୍ୟମରେ ସେ ଲୋକଙ୍କୁ ସୁରକ୍ଷିତ ରହିବା ପାଇଁ ଭାକ୍ସିନ୍ ନେବା ସହିତ ତୃତୀୟ ଲହର ନିମନ୍ତେ ଆଗୁଆ ସତର୍କ ରହିବା ଲାଗି ସଚେତନ କରାଇଛନ୍ତି। ତାଙ୍କ ମୂର୍ତ୍ତିର ଉଚ୍ଚତା ହେଉଛି ୨.୫ ଫୁଟ। ଜାଙ୍ଗିଡଙ୍କୁ ଏହି ମୂର୍ତ୍ତି ତିଆରି କରିବା ପାଇଁ ଦୁଇଦିନ ସମୟ ଲାଗିଛି ଏବଂ ତାଙ୍କୁ ଏହି କାମରେ ଅନ୍ୟ ୪ଜଣ କାରିଗର ସାହାଯ୍ୟ କରିଛନ୍ତି।