ଭୂତାଣୁର ନୂଆ ରୂପ ଆତଙ୍କ ସୃଷ୍ଟି କରିଛି ଦେଶ ଓ ବିଶ୍ୱରେ। ସଂକ୍ରମଣର ବର୍ଷକ ପରେ ମହାମାରୀ ମୁକାବିଲା ପାଇଁ ହାତରେ ଭାକ୍ସିନ ଅଛି ବୋଲି କେତେକାଂଶରେ ଆଶ୍ୱସ୍ତି ମିଳୁଥିଲା। ହେଲେ ଭାଇରସ୍ର ଦ୍ରୁତଗତିକୁ ରୋକି ନ ପାରିବା ଭାରତର ନେତୃବୃନ୍ଦଙ୍କ ଦୁର୍ବଳ ରାଜନୈତିକ ଇଚ୍ଛାଶକ୍ତି ଓ ବିଫଳତାକୁ ହିଁ ସୂଚାଉଛି। ଓଡ଼ିଶା, ମହାରାଷ୍ଟ୍ର, ରାଜସ୍ଥାନ ସମେତ ଅନେକ ରାଜ୍ୟ କେନ୍ଦ୍ର ସରକାରଙ୍କୁ ଟିକା ମାଗୁଛନ୍ତି। କେନ୍ଦ୍ର କହୁଛି ଭାକ୍ସିନ ଅଛି, ଦିଆଯାଉଛି ଆହୁରି ଦିଆଯିବ। କିନ୍ତୁ ପରିସଂଖ୍ୟାନ ଓଲଟା କଥା ଦର୍ଶାଉଛି। ଯାହା ବି ମିଳୁଛି ତାହା ସମୁଦ୍ରକୁ ଶଙ୍ଖେ। ୨୫ ଲକ୍ଷ ଡୋଜ୍ ଟିକା ମାଗିଲେ କେନ୍ଦ୍ର ୨.୫ ଲକ୍ଷ ଦେଉଛି। ମହାରାଷ୍ଟ୍ର, ଓଡ଼ିଶା ଓ ରାଜସ୍ଥାନରେ ଥିବା ଟିକା ଆଉ ଦୁଇଦିନ ଯିବ। ସେହିପରି ପଞ୍ଜାବ ପାଖରେ ଥିବା ଭାକ୍ସିନ ୫ ଦିନ ଏବଂ ଦିଲ୍ଲୀର ଟିକା ସପ୍ତାହେ ମଧ୍ୟରେ ଶେଷ ହୋଇଯିବ। ଏହା ହେଉଛି ‘ଟିକା ଉତ୍ସବ’ର ଅସଲ ଚିତ୍ର।
ସେପଟେ ଡବଲ ଡୋଜ୍ ପରେ ବି ଅନେକଙ୍କୁ କରୋନା ମାଡ଼ିବସୁଛି। ନିର୍ବାଚନୀ ସଭା, ଧର୍ମପୀଠ, ରେଳ ଷ୍ଟେଶନ, କୁମ୍ଭମେଳା, ହୋଲି ଆଦିକୁ ଦେଶରେ ସଂକ୍ରମଣ ବୃଦ୍ଧି ପାଇଁ ଦାୟୀ କରାଯାଉଛି। ସରକାର ଏସବୁରେ ଆଦୌ ଅଙ୍କୁଶ ଲଗାଇପାରି ନାହାନ୍ତି ବୋଲି ଅଧିକାଂଶ ଲୋକ କହୁଛନ୍ତି। ଓଡ଼ିଶା ପାଇଁ ପଡ଼ୋଶୀ ଛତିଶଗଡ଼ ଓ ଆନ୍ଧ୍ର ପ୍ରଦେଶ ବିପଦ ସାଜିଥିବାବେଳେ ଦେଶର ଆର୍ଥିକ ରାଜଧାନୀ ମୁମ୍ବାଇ ଭାଇରସ୍ ବିସ୍ତାରର ହଟ୍ସ୍ପଟ ପାଲଟିଛି। ସରକାର ମାନନ୍ତୁ କି ନ ମାନନ୍ତୁ ରେଲଓ୍ବେ ସ୍ବୀକାର କରୁ କି ନ କରୁ; ମୁମ୍ବାଇ ସମେତ ଦିଲ୍ଲୀ, ଚେନ୍ନାଇ ଓ ଅନ୍ୟ ବଡ଼ ସହରଗୁଡ଼ିକରୁ ଗଁା ମୁହଁା ହେବାରେ ଲାଗିଛନ୍ତି ପ୍ରବାସୀ। ହଜାର ହଜାର ଶ୍ରମିକ ଘରକୁ ଫେରୁଛନ୍ତି, ଯାହାଙ୍କ ବିକଳ ଚିତ୍ର ଗଣମାଧ୍ୟମରେ ପ୍ରକାଶ ପାଉଛି। ଠିକ୍ ଏଭଳି ଦୃଶ୍ୟ ଦେଖିବାକୁ ମିଳିଥିଲା ବର୍ଷକ ତଳେ। ସେଇଠୁ ଆରମ୍ଭ ହୋଇଥିଲା ନଇଁପଡ଼ିଥିବା ଭାରତୀୟ ଅର୍ଥନୀତିର ସବୁଠୁ ଖରାପ ସମୟ। ଏବେ ପୁଣିଥରେ ସମାନ ଦୃଶ୍ୟ ବିଚଳିତ କରିଦେଉଛି ଦେଶବାସୀଙ୍କୁ। ହାତରେ ଦୁଇ ଦୁଇଟି ଟିକା ଥାଇ ମଧ୍ୟ ଭାରତର ଅର୍ଥନୀତି ଅଣ୍ଟା ସଳଖି ଛିଡ଼ାହେବାକୁ ଅକ୍ଷମ। ପୂର୍ବ ଆର୍ଥିକ କ୍ଷତ ନ ଶୁଖୁଣୁ ପୁଣି ଦୁର୍ଗତିର ଆତଙ୍କ। କେଉଁଠି ଚାକିରି ଚାଲିଯିବାର ଭୟ ତ ପୁଣି କେଉଁଠାରେ ଦେଖାଦେଲାଣି ଶ୍ରମଶକ୍ତିର ଘୋର ଅଭାବ। ଏସବୁ ଭିତରେ ଅର୍ଥନୀତିଜ୍ଞ ସତର୍କ କରାଉଛନ୍ତି ‘ଆଗକୁ ଆହୁରି ସଙ୍କଟ’।