ସମ୍ବଲପୁର,୨୨ା୭(ଭବାନୀ ଶଙ୍କର ଭୋଇ ):ସମ୍ବଲପୁର ଭାଜପା ଜିଲା ସଭାପତି ଗିରୀଶ ପଟେଲଙ୍କ ଜନ୍ମଦିନ ଅବସରରେ ରବିବାର ନୟାପଡାରେ ଉଦ୍ଘାଟିତ ହୋଇଛି ଜିଲା ସଭାପତିଙ୍କ ଦଳୀୟ କାର୍ଯ୍ୟାଳୟ। ଏହି କାର୍ଯ୍ୟକ୍ରମରେ ସମ୍ବଲପୁର ବିଧାନ ସଭା କ୍ଷେତ୍ର ଅଧୀନ ବହୁ ପଦାଧିକାରୀ ଓ ଦଳୀୟ ନେତୃବୃନ୍ଦ ଉପସ୍ଥିତ ଥିଲେ। ଗତ ସାଧାରଣ ନିର୍ବାଚନରେ ଜିଲା ସଭାପତି ପଟେଲ ଦଳବିରୋଧୀ କାର୍ଯ୍ୟ କରୁଥିବା ନେଇ ଜୟନାରାୟଣ ମିଶ୍ରଙ୍କ ସମର୍ଥକ ଅଭିଯୋଗ କରିଥିଲେ। ଏପରିକି କଚେରୀ ରୋଡସ୍ଥିତ ଭାଜପା କାର୍ଯ୍ୟାଳୟରେ ଥିବା ଜିଲା ସଭାପତିଙ୍କ କେଠାରିରେ ସେମାନେ ତାଲା ପକାଇ ଦେଇଥିଲେ। ତେବେ ଏବେ ଜିଲା ସଭାପତି ପଟେଲ ନୂଆ ଦଳୀୟ କାର୍ଯ୍ୟାଳୟ ଖୋଲିବାକୁ ନେଇ ଭାଜପା ରାଜନୀତି ଗୋଳମାଳିଆ ହୋଇଯାଇଥିବା ରାଜନୈତିକ ମହଲରେ ଚର୍ଚ୍ଚା ହେଉଛି।
ରବିବାର ଜିଲା ସଭାପତିଙ୍କ କାର୍ଯ୍ୟାଳୟ ଖୋଲିବା କାର୍ଯ୍ୟକ୍ରମରେ ସାକ୍ଷୀଗୋପୀନାଥ ମଣ୍ଡଳ ସଭାପତି ସରୋଜ ଘଡେଇ, ବୀର ବିର୍ସାମୁଣ୍ଡା ମଣ୍ଡଳ ସଭାପତି ଗିରିଜାଶଙ୍କର ସାହୁ, ବୁର୍ଲା ମଣ୍ଡଳ ସଭାପତି ଜୟନ୍ତ ଦାଶ, ହୀରାକୁଦ ମଣ୍ଡଳ ସଭାପତି ନାରାୟଣ ପଣ୍ଡା ପ୍ରମୁଖ ଯୋଗ ଦେଇଥିଲେ। ଜିଲା ସଭାପତି ପଟେଲ ସମସ୍ତଙ୍କୁ ମିଠା ଖୁଆଇଥିଲେ।
କିଛିଦିନ ପୂର୍ବରୁ କଚେରି ରୋଡ୍ସ୍ଥିତ ଭାଜପା କାର୍ଯ୍ୟାଳୟରେ ଜୟନାରାୟଣ ମିଶ୍ରଙ୍କ ସମର୍ଥକ ଜିଲା ସଭାପତିଙ୍କ କେଠାରିରେ ତାଲା ପକାଇବା ପରେ ଭାଜପାରେ ସବୁକିଛି ଠିକ୍ଠାକ ଚାଲି ନ ଥିବା ଜଣାପଡିଥିଲା। ଜିଲା ସଭାପତି ଗତ ସାଧାରଣ ନିର୍ବାଚନରେ ଦଳବିରୋଧୀ କାର୍ଯ୍ୟ କରୁଥିବା ଅଭିଯୋଗ କରି ଜୟନାରାୟଣଙ୍କ ସମର୍ଥକମାନେ ତାଙ୍କୁ ପଦରୁ ହଟାଇବା ପାଇଁ ରାଜ୍ୟ ସଭାପତିଙ୍କୁ ଲିଖିତଭାବେ ଜଣାଇଥିଲେ। ଏହାପରେ ବି ଜିଲା ସଭାପତି ପଟେଲଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଗଲା ନାହିଁ। ଅନ୍ୟପକ୍ଷରେ ଜୟନାରାୟଣଙ୍କ ଅନେକ ସମର୍ଥକ ରବିବାର ଜିଲା ସଭାପତିଙ୍କ କାର୍ଯ୍ୟାଳୟ ଉଦ୍ଘାଟନ ଉତ୍ସବରେ ସାମିଲ ହେବା ଚର୍ଚ୍ଚାର ବିଷୟ ପାଲଟିଛି। ତେବେ ଜିଲା ସଭାପତି ଏବଂ ସମ୍ବଲପୁର ବିଧାୟକଙ୍କ ମଧ୍ୟରେ ଫାଟ ଜଳଜଳ ଦିଶୁଥିବା ବେଳେ ରାଜ୍ୟ ନେତୃତ୍ୱ ଚୁପ୍ ରହିବା ଆଗାମୀ ଦିନରେ ଏଠାରେ ଭାଜପାର ସ୍ଥିତିକୁ ଦୁର୍ବଳ କରିବ ବୋଲି ରାଜନୈତିକ ସମୀକ୍ଷକ ମତ ଦେଉଛନ୍ତି।