![](https://www.dharitri.com/wp-content/uploads/2024/04/5-134-1568x882.jpg)
କଟକ, ୨୮ା୪(ଶିଳ୍ପା ପ୍ରିୟଦର୍ଶିନୀ)ବାରବାଟୀ-କଟକ କଂଗ୍ରେସ ପକ୍ଷରୁ କଂଗ୍ରେସ ସମାବେଶ କଟକସ୍ଥିତ ଖ୍ରୀଷ୍ଟିଆନ୍ ପଡିଆଠାରେ ଶନିବାର ଅନୁଷ୍ଠିତ ହୋଇଯାଇଛି। ବରିଷ୍ଠ କଂଗ୍ରେସ ନେତା ଇଂ. ମହମ୍ମଦ ମୋକିମଙ୍କ ନେତୃତ୍ୱରେ ଆୟୋଜିତ ସମାବେଶରେ ଏଆଇସିସିର ସାଧାରଣ ସମ୍ପାଦକ ଅଜୟ କୁମାର, କଟକ ନଗର ସଭାପତି ସୁରେଶ ମହାପାତ୍ର, ସୋଫିଆ ଫିର୍ଦୋସ, ପୂର୍ବତନ ମନ୍ତ୍ରୀ ବିଜୟଲକ୍ଷ୍ମୀ ସାହୁ, ପୂର୍ବତନ ନଗର ସଭାପତି ଗିରିବାଳା ବେହେରା ଯୋଗଦେଇଥିଲେ। ମହମ୍ମଦ ମୋକିମଙ୍କ ଝିଅ ସୋଫିଆ ଫିରଦୋସ୍ ନିର୍ବାଚନ ଲଢ଼ିବା ପାଇଁ କର୍ମୀମାନେ ପ୍ରସ୍ତାବ ଦେଇଥିଲେ। ଏଠାରେ ନିର୍ବାଚନ ସମ୍ପର୍କରେ ସମସ୍ତ କର୍ମୀଙ୍କ ସହ ଆଲୋଚନା ହୋଇଥିଲା। ଏହି ସମାବେଶରେ ଅଜୟ କହିଛନ୍ତି, ଭାଜପା ଓ ବିଜେଡି କଳହ କରିବାର ପ୍ରଥା ରହିଛି। ବିରୋଧୀ ଦଳକୁ ହଟାଇଲେ ଦୁର୍ନୀତି ହଟିବ। ସମସ୍ତେ ମିଶି ସୋଫିଆଙ୍କୁ ଆପଣାଇ ବିପୁଳ ମାତ୍ରାରେ ସହମତି ଦେବା ହିଁ ଦୁର୍ନୀତିକୁ ମାତ୍ ଦେବା ସହ ସମାନ ହେବ। କଂଗ୍ରେସର ଗ୍ୟାରେଣ୍ଟି ସମ୍ପର୍କରେ ଜନସାଧାରଣ କହିବେ। ଅପରପକ୍ଷରେ ମୋକିମ କହିଛନ୍ତି, ଲୋକଙ୍କ ହିତ ପାଇଁ କଂଗ୍ରେସ କାମ କରିଆସିଛି। ଦୀର୍ଘବର୍ଷ ଧରି ପଡି ରହିଥିବା ଅଧୁରା କାମକୁ ଗତ ୫ବର୍ଷ ମଧ୍ୟରେ କଂଗ୍ରେସ କାର୍ଯ୍ୟକାରୀ କରିଛି। କଟକଚଣ୍ଡୀ ମନ୍ଦିର ସମ୍ପ୍ରସାରଣ କାର୍ଯ୍ୟ ପାଇଁ ପ୍ରସ୍ତାବ ଦେଇଥିଲି। ଏଥିପାଇଁ ଅର୍ଥ ଅନୁମୋଦନ ହୋଇ କାମ ଆରମ୍ଭ ହୋଇଛି। ତେବେ ସମସ୍ତ କାର୍ଯ୍ୟକୁ ତର୍ଜମା କରି ଜନସାଧାରଣ ଭୋଟ୍ ମାଧ୍ୟମରେ ସେମାନଙ୍କ ମତ ଜଣାଇବେ। ସୋଫିଆ କହିଛନ୍ତି, ୧୯ ବର୍ଷ ମଧ୍ୟରେ ଯେଉଁ କାର୍ଯ୍ୟ ନ ହୋଇପାରିଛି ତାହା ଗତ ୫ବର୍ଷରେ କଂଗ୍ରେସ କରିପାରିଛି। ମୋତେ ଭଲପାଇବା ଓ ଆଶୀର୍ବାଦ ଦେଇଥିବାରୁ ସମସ୍ତଙ୍କୁ କୃତଜ୍ଞତା ଜ୍ଞାପନ କରୁଛି। ଏହି ସମାବେଶରେ କର୍ପୋରେଟର ସନ୍ତୋଷ ଭୋଳ, ଲିଜାରାଣୀ ମହାପାତ୍ର, ଜେ. କାମେଶ୍ୱର ରାଓ, ଜନାର୍ଦ୍ଦନ ପରିଡା, ପୂର୍ବତନ କର୍ପୋରେଟର କେଦାର ପୃଷ୍ଟି, ଜିଲା ମହିଳା ସଭାପତି ଅମ୍ରିତା ଦାସ, ବରିଷ୍ଠ ନେତ୍ରୀ ଶୈଳଭାମା ଜେନା, ଚାରୁଲତା ସାହୁଙ୍କ ସମେତ ଶତାଧିକ କର୍ମୀ ଯୋଗଦେଇଥିଲେ।