![](https://www.dharitri.com/wp-content/uploads/2024/02/baiden-1.jpg)
ଆରମ୍ଭ ହୋଇଛି ଭ୍ୟାଲେଣ୍ଟାଇନ୍ ସପ୍ତାହ। ଏହି ସମୟରେ ଅନେକେ ନିଜର ସାଥୀଙ୍କ ମନ ଜିଣିବାକୁ ଚେଷ୍ଟା କରୁଛନ୍ତି। ବୁଧବାର ପ୍ରଥମ ଦିନ ରୋଜ୍ ଡେ’ ଶେଷ ହୋଇଥିବା ବେଳେ ଆଜି(ଗୁରୁବାର) ହେଉଛି ପ୍ରପୋଜ୍ ଡେ’। ଏହି ସ୍ବତନ୍ତ୍ର ଦିନରେ ଜଣେ ପ୍ରତିଷ୍ଠିତ ରାଜନେତାଙ୍କ ପ୍ରେମକାହାଣୀ ବିଷୟରେ ଆମେ ଆପଣଙ୍କୁ କହିବୁ। ସେଇଟି ହେଲା ଆମେରିକୀୟ ରାଷ୍ଟ୍ରପତି ଜୋ ବାଇଡେନ୍ଙ୍କର।
ବିଶ୍ୱର ଶକ୍ତିଶାଳୀ ଦେଶ ଆମେରିକାର ୪୬ତମ ରାଷ୍ଟ୍ରପତି ହେଉଛନ୍ତି ବାଇଡେନ୍। ଫାଷ୍ଟଲେଡି ଜିଲ୍ ବାଇଡେନ୍ଙ୍କ ସହ ତାଙ୍କର ପ୍ରେମ ଫିଲ୍ମର କାହାଣୀଠାରୁ କମ୍ ନୁହେଁ। ଆଜି ସେ ଦୁନିଆର ଶକ୍ତିଶାଳୀ ଦେଶର ରାଷ୍ଟ୍ରପତି ଆସନରେ ବିରାଜମାନ ହୋଇଛନ୍ତି ସତ, ହେଲେ ଜିଲଙ୍କ ହୃଦୟ ଜିତିବା ଲାଗି ତାଙ୍କୁ ଥରେ କି ଦୁଇଥର ନୁହେଁ , ୫ ଥର ପ୍ରପୋଜ୍ କରିବାକୁ ପଡ଼ିଥିଲା।
୧୯୭୫ରେ ଜିଲଙ୍କୁ ଭେଟିଥିଲେ ବାଇଡେନ୍। ପ୍ରଥମ ଦେଖା ପରେ ଉଭୟଙ୍କ ସମ୍ପର୍କ ପ୍ରେମରେ ପରିଣତ ହେବ ବୋଲି କେହି ଚିନ୍ତା କରି ନ ଥିଲେ। ନ୍ୟୁୟର୍କର ଲୋଟସ୍ କ୍ଲବରେ ଜିଲ୍ ବାଇଡେନ୍ଙ୍କୁ ନିଜ ବିଷୟରେ କହିଥିଲେ। ପରେ ଦୁହେଁ ଡେଟ୍ କରିବା ଆରମ୍ଭ କରିଥିଲେ।
ରାଷ୍ଟ୍ରପତି ବାଇଡେନ୍ ଜିଲ୍ଙ୍କୁ ନେଇ ବାହାରକୁ ନେଇ ବୁଲି ଯାଉଥିବା ବେଳେ ତାଙ୍କୁ ପ୍ରେମିକା ବୋଲି ମାନି ସାରିଥିଲେ। ସେତେବେଳେ ଏକାକି ଥିବାରୁ ତାଙ୍କୁ ପିଲାମାନେ ପ୍ରପୋଜ୍ କରିବାକୁ କହିଥିଲେ। ଏହାପରେ ବାଇଡେନ୍ ଜିଲ୍ଙ୍କୁ ବିବାହ ପ୍ରସ୍ତାବ ଦେଇଥିଲେ। ପୂର୍ବରୁ ବୈବାହିକ ବିଚ୍ଛେଦ ପାଇଥିବା ଜିଲ୍ ପ୍ରେମରୁ ବିଶ୍ୱାସ ହରାଇଥିଲେ। ଏଣୁ ବାଇଡେନ୍ଙ୍କୁ ପାଞ୍ଚଥର ତାଙ୍କୁ ପ୍ରପୋଜ କରିବାକୁ ପଡ଼ିଥିଲା। ୧୯୭୭ରେ ହଁ ଭରିବା ପରେ ଦୁହେଁ ବିବାହ କରିଥିଲେ। ୧୯୮୧ରେ ଉଭୟଙ୍କ ଝିଅ ଜନ୍ମ ହୋଇଥିଲା।
ତେବେ ବାଇଡେନ୍ ଜିଲଙ୍କୁ ଦ୍ୱିତୀୟ ବିବାହ କରିଥିଲେ। ତାଙ୍କ ପ୍ରଥମ ପତ୍ନୀଙ୍କ ନାମ ନିଲିୟା ଥିଲା। ୧୯୭୨ରେ ଏକ କାର୍ ଦୁର୍ଘଟଣାରେ ତାଙ୍କର ମୃତ୍ୟୁ ଘଟିଥିଲା। ଏହି ଦୁର୍ଘଟଣାରେ ବର୍ଷକର ଝିଅ ନାଓମି ମଧ୍ୟ ପ୍ରାଣ ହରାଇଥିଲେ। ଏହାପରେ ସେ ଏକାକି ଦୁଇ ପୁଅଙ୍କ ଲାଳନପାଳନ କରୁଥିଲେ। ଜିଲ୍ ତାଙ୍କ ଜୀବନକୁ ଆସିବା ପରେ ସେ ପୁଣିଥରେ ପ୍ରେମରେ ପଡ଼ିଥିଲେ।
ଜୀବନର ଉତ୍ଥାନ ପତନରେ ସର୍ବଦା ସ୍ବାମୀ ବାଇଡେନଙ୍କ ସହ ଛିଡ଼ା ହୋଇଆସିଛନ୍ତି ଜିଲ୍। ୨୦୧୫ରେ ଦୁହିଁଙ୍କ ପୁଅ ବ୍ୟୁ କ୍ୟାନ୍ସରରେ ପ୍ରାଣ ହରାଇଥିଲେ। ଏହାପରେ ସେମାନଙ୍କ ଉପରେ ଦୁଃଖର ପାହାଡ଼ ଭାଙ୍ଗିଥିଲା। ମାତ୍ର ସବୁ ସମୟରେ ଜିଲ୍ ବାଇଡେନ୍ଙ୍କ ସହ ରହି ତାଙ୍କର ରାଜନୈତିକ କ୍ୟାରିୟରକୁ ଆଗକୁ ବଢ଼ାଇବାରେ ସହାୟତା କରିଆସିଛନ୍ତି।