ପ୍ରେମୀଯୁଗଳଙ୍କ ପାଇଁ ଉଦାହରଣ ପାଲଟିଛନ୍ତି କଟକର ବାଳକୃଷ୍ଣ ମାଝୀ ଓ ଆଲୋଚନା ଦେବୀ। ବିବାହର ୭୪ ବର୍ଷ ପରେ ମଧ୍ୟ ଉଭୟଙ୍କ ପରସ୍ପର ପ୍ରତି ଭଲପାଇବା କମିନାହିଁ। ବାରଙ୍ଗ ବ୍ଲକ ଅଧୀନ କେନ୍ଦୁପାଟଣା ଗ୍ରାମରେ ଉଭୟ ଜନ୍ମଗ୍ରହଣ କରିଥିଲେ। ଆଲୋଚନାଙ୍କ ବାପା ଜୟରାମ ଦାସ ଜମିଦାର ଥିଲେ। ଗ୍ରାମର ପ୍ରଥମ ଗ୍ରାଜୁଏଟ୍ ବାଳକୃଷ୍ଣଙ୍କୁ ନିଜ ଜାମାତା କରିବେ ବୋଲି ଜୟରାମ କହିଥିଲେ। ଅପରପକ୍ଷେ ଅନ୍ୟ ସ୍ଥାନରେ ବାଳକୃଷ୍ଣଙ୍କର ପୂର୍ବରୁ ନିର୍ବନ୍ଧ ସରିଥିଲେ ମଧ୍ୟ କୌଣସି କାରଣରୁ ବାହାଘର ଭାଙ୍ଗି ଯାଇଥିଲା। ଏହାପରେ ୧୯୪୮ ଜୁନ୍ରେ ବାଳକୃଷ୍ଣ ଓ ଆଲୋଚନାଙ୍କର ବିବାହ ହୋଇଥିଲା। ବିବାହ ବେଳକୁ ବାଳକୃଷ୍ଣଙ୍କୁ ୨୫ ବର୍ଷ ଓ ଆଲୋଚନାଙ୍କୁ ୧୭ ବର୍ଷ ହୋଇଥିଲା। ବିବାହର ୧୫ ଦିନ ପରେ ରାଜକନିକା ହାଇସ୍କୁଲରେ ଶିକ୍ଷକ ଭାବରେ ଯୋଗ ଦେଇଥିଲେ ବାଳକୃଷ୍ଣ। ପରେ ସେଠାରୁ ଆସି ୧୯୪୯ରେ ସଚିବାଳୟରେ ଚାକିରି କରିଥିଲେ। ହେଲେ ସେଠାରେ ତାଙ୍କୁ ଆମତ୍ସନ୍ତୋଷ ନ ମିଳିବାରୁ ଦୁଇବର୍ଷ ପରେ ଚାକିରି ଛାଡି ଗାଁକୁ ଚାଲିଆସିଥିଲେ। ବାଲ୍ୟକାଳ ଅଭାବ ଅନଟନରେ ବିତିଥିବାରୁ ଶିକ୍ଷା ଲାଭ ପାଇଁ ତାଙ୍କୁ ବହୁ କଷ୍ଟ କରିବାକୁ ପଡ଼ିଥିଲା। ସେଥିଲାଗି ଗ୍ରାମରେ ପିଲାମାନଙ୍କ ପାଇଁ ଶିକ୍ଷାନୁଷ୍ଠାନ ଖୋଲିବାକୁ ସେ ସ୍ବପ୍ନ ଦେଖିଥିଲେ। ସେ ନିଜ ଗ୍ରାମରେ ଉତ୍କଳମଣି ମଧ୍ୟ ଇଂରାଜୀ ଉଚ୍ଚବିଦ୍ୟାଳୟ, ଉତ୍କଳମଣି ବାଳିକା ଉଚ୍ଚବିଦ୍ୟାଳୟ ଓ କୁଞ୍ଜବିହାରୀ ମହାବିଦ୍ୟାଳୟ(ବାରଙ୍ଗ କଲେଜ) ଅନେକ ବଦାନ୍ୟ ବ୍ୟକ୍ତିଙ୍କ ଆର୍ଥତ୍କ ସହାୟତାରେ ପ୍ରତିଷ୍ଠା କରିଥିଲେ। ତେବେ ରାଣୀହାଟ ହାଇସ୍କୁଲରେ ଶିକ୍ଷକ ଭାବେ କାର୍ଯ୍ୟ କରି ଅବସର ନେଇଥିଲେ ସେ। ସମାଜ ପାଇଁ କିଛି କରିବା ଜିଦ୍ରେ ତାଙ୍କ ପରିବାର, ୩ପୁଅ ଓ ୫ଝିଅଙ୍କୁ ସମ୍ଭାଳିଥାନ୍ତି ଆଲୋଚନା। ଉଭୟଙ୍କ ସମ୍ପର୍କକୁ ୭୪ ବର୍ଷ ବିତିଯାଇଥିଲେ ମଧ୍ୟ ପରସ୍ପର ପ୍ରତି ଭଲପାଇବା ତିଳେମାତ୍ର କମିନାହିଁ ବୋଲି ଆଲୋଚନା କହିଛନ୍ତି। ସେହିପରି ବାଳକୃଷ୍ଣ କହିଛନ୍ତି, ଜୀବନରେ ଆଲୋଚନା ସାଥିରେ ଥିବାରୁ କିପରି ଏତେ ବର୍ଷ ବିତିଯାଇଛି ସେ ଜାଣି ପାରିନାହାନ୍ତି। କାରଣ ସେ ମୋ ପାଇଁ ଆଉ ମୁଁ ତାଙ୍କ ପାଇଁ।
– ସୁପ୍ରିୟା ପ୍ରିୟଦର୍ଶିନୀ