ଲହୁଣୀପଡା,୧୮ା୫(ଡି.ଏନ.ଏ.): ସୁନ୍ଦରଗଡ ଜିଲା ଲହୁଣୀପଡା ବ୍ଲକ ଅନ୍ତର୍ଗତ ଦର୍ଜୀଂ ପଞ୍ଚାୟତ ଦର୍ଜୀଂ ଗ୍ରାମର ନଦୀପଠା ଜଙ୍ଗଲ ନିକଟରେ ଶିଳ୍ପ ପ୍ରତିଷ୍ଠା ନାଁରେ ଶହ ଶହ ବର୍ଷର ପୁରୁଣା ଗଛକୁ ଦୁବୃର୍ତ୍ତମାନେ ରାତାରାତି କାଟି ସଫା କରି ଦେଇଛନ୍ତି। ଏପରି କି ଏହି ଘଟଣାକୁ ଲୁଚାଇବା ପାଇଁ ଗଛ ମୂଳ ଉପାଡି ମାଟି ସମତୁଲ କରି ଦିଆଯାଇଛି। ତେବେ ଏ ସମ୍ପର୍କରେ ବନବିଭାଗ ପାଖରେ କୌଣସି ଖବର ନାହିଁ। ପ୍ରକାଶ ଯେ, ବାଙ୍କୀ ରେଞ୍ଜ ଅନ୍ତର୍ଗତ ରାଜାମୁଣ୍ଡା ବନବିଭାଗ ଅଧୀନ ଦର୍ଜୀଂ ଗ୍ରାମ ନଦୀପଠାକୁ ଲାଗିକି ଥିବା ୪.୭୯ ଏକର ଜଙ୍ଗଲ ଜମି ଖାତା ନମ୍ବର ୧୩୨/୭୪, ପ୍ଲଟ ନମ୍ବର ୯୫୦,୯୨୩,୯୭୬,୯୩୭ ଲିଜ ସୂତ୍ରରେ ୨୦୦୪ ମସିହାରେ ଏକ କମ୍ପାନୀ ନାମରେ ଦିଆଯାଇଥିବା ତହସିଲ ପକ୍ଷରୁ ଜଣାପଡିଛି। ତେବେ ଗ୍ରାମବାସୀଙ୍କ ଅଗୋଚରରେ ବିନା ଗ୍ରାମସଭା, ପଲ୍ଲୀସଭାରେ ଉକ୍ତ ଜମି ଲିଜ୍ରେ ଦିଆଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏହାଛଡା ନିକଟରେ ଉକ୍ତ ଜମିରେ ଥିବା ପୁରୁଣା ଶାଳ, ପିଆଶାଳ ପରି ମୂଲ୍ୟବାନ ଗଛକୁ ରାତାରାତି କାଟି ଜେସିବି ଲଗାଇ ମୂଳ ଉପାଡ଼ି ଜମିରୁ ବାହାର କରି ଦେଇଥିବା ଅଭିଯୋଗ କରିଛନ୍ତି। ଫଳରେ ସବୁଜିମା ଭରା ଜଙ୍ଗଲ ଶ୍ରୀହୀନ ହୋଇପଡିଛି ା ଏଥିସହିତ ଜଙ୍ଗଲ ଉପରେ ନିର୍ଭର କରି ପରିବାର ପ୍ରତିପୋଷଣ କରୁଥିବା ଆଦିବାସୀଙ୍କ ଜୀବନ ଜୀବିକା ପ୍ରଭାବିତ ହୋଇଛି ା ମୂଳ ଥିଲେ ସିନା ବନ ବିଭାଗ ଗଛ ଚିହ୍ନଟ କରି ଜରିମାନା ଆଦାୟ କରିବ। କିନ୍ତୁ ମୂଳ ନ ଥିବାରୁ ପ୍ରମାଣ ନଷ୍ଟ ହୋଇଯାଇଥିବା ଗ୍ରାମବାସୀ ଦର୍ଶାଇନ୍ତି ା ଜଙ୍ଗଲ ଜମି ଉପରେ ଶିଳ୍ପ ପ୍ରତିଷ୍ଠା କରିବା ପାଇଁ ରାତାରାତି ଶହ ଶହ ସଂଖ୍ୟାରେ ଗଛ କାଟି ସଫା କରିବା କେତେଦୂର ଯଥାର୍ଥ ବୋଲି ଅଞ୍ଚଳବାସୀ ପ୍ରଶ୍ନ କରିଛନ୍ତି। ଏ ସଂକ୍ରାନ୍ତରେ ରେଞ୍ଜର ଅଜୟ କୁମାର ଖେସଙ୍କୁ ପଚାରିବାରେ , ଏ ନେଇ ଆମ ପାଖରେ କୌଣସି ସୂଚନା ନ ଥିଲା। ସୂଚନା ପାଇଲା ପରେ ତଦନ୍ତ କରାଯାଉଛି। ସେହିପରି ଲହୁଣୀପଡ଼ା ତହସିଲଦାର କିଛି ଜାଣି ନ ଥିବା କହିବା ସହିତ ଉକ୍ତ ଜମିରେ ଗଛ କାଟିବାକୁ ଜଏଣ୍ଟ ଭେରିଫିକେସନ ପାଇଁ ବନ ବିଭାଗ ପକ୍ଷରୁ କୌଣସି ଚିଠି ଆସି ନ ଥିବା କହିଥିଲେ। ସାଧାରଣ ଲୋକ ନିଜ ବାଡ଼ିରେ ଥିବା ଗଛଟିଏ କାଟିବା ପାଇଁ ଅନୁମତି ମାଗିଲେ ବନବିଭାଗ ନାକେଦମ୍ କରି ଦେଉଛି। କିନ୍ତୁ ଶିଳ୍ପ ନାଁରେ ଗଛ କଟା ହେଉଛି ବନବିଭାଗ ଜାଣିପାରୁ ନାହିଁ କେମିତି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ା