ସୁରଟ,୨୩।୧୨: ଆଧୁନିକ ଶୈଳୀରେ ପ୍ରସ୍ତୁତ ହୋଇଥିବା ବନ୍ଦେ ଭାରତ ଟ୍ରେନରେ ଆପଣ ଯାତ୍ରାର ଅନୁଭବ କରିସାରିଛନ୍ତି। ହେଲେ ରେଷ୍ଟୁରାଣ୍ଟ! ଆମେ ଆପଣଙ୍କୁ ଟ୍ରେନ ଭିତରେ ହୋଇଥିବା କୌଣସି ରେଷ୍ଟୁରାଣ୍ଟ କଥା କହୁନାହୁଁ। ଗୁଜୁରାଟର ସୁରଟରେ ବନ୍ଦେ ଭାରତ ଟ୍ରେନର ଥିମରେ ଏକ ରେଷ୍ଟୁରାଣ୍ଟ ଆରମ୍ଭ ହୋଇଛି। ତେବେ ରେଷ୍ଟୁରାଣ୍ଟରେ ଦିଆଯାଉଥିବା ସେବା ଓ ବିଭିନ୍ନ ଡେକୋରମକୁ ନେଇ ରେଷ୍ଟୁରାଣ୍ଟଟି ଏବେ ଲୋକପ୍ରିୟ ହେବାରେ ଲାଗିଛି। ଖାଦ୍ୟପ୍ରେମୀଙ୍କ ଏଠାରେ ଭିଡ ଜମିବାରେ ଲାଗିଛି। ଭାରତୀୟ ଭାସ୍କର୍ଯ୍ୟ ଏବଂ ବନ୍ଦେ ଭାରତ ଟ୍ରେନ-ଥିମ ସାଜସଜ୍ଜା ସହିତ ଭିତର ଇଣ୍ଟେରିୟକୁ ବିଭିନ୍ନ ରଙ୍ଗରେ ସଜାଯାଇ ବାସ୍ତବ ଓ ଆକର୍ଷଣୀୟ ପରିବେଶ ସୃଷ୍ଟି କରିଛି।
ବନ୍ଦେ ଭାରତ ଟ୍ରେନ ଥିମରେ ସଜ୍ଜା ହୋଇଥିବା ରେଷ୍ଟୁରାଣ୍ଟର ନାମ ହେଉଛି ‘ଲା ପିଜା ଟ୍ରେନୋ’, ଯାହାର ଅର୍ଥ ହିନ୍ଦୀରେ ‘ପିଜା ଟ୍ରେନ’। ରେଷ୍ଟୁରାଣ୍ଟର ଭିତର ଦୃଶ୍ୟ ପୁରା ଟ୍ରେନର କୋଚ ପରି। ଏଠାରେ ଖାଦ୍ୟ ଖାଇବା ସହ ଟ୍ରେନ ଯାତ୍ରାର ଅନୁଭବ ମଧ୍ୟ କରିପାରିବେ।
ବନ୍ଦେ ଭାରତ ଟ୍ରେନରେ ଥିବା ସମାନ ରଙ୍ଗ ଏଥିରେ ବ୍ୟବହୃତ ହୋଇଛି। ଟ୍ରେନ କୋଚ ପରି ଭିତରର ଟେବୁଲ ଚେୟାର ସହ ବନ୍ଦେ ଭାରତ ପରି ସମ୍ମୁଖ ଭାଗ ଇଞ୍ଜିନ ମଧ୍ୟ ଡିଜାଇନ ହୋଇଛି।
ଭାଇରାଲ ଭିଡିଓ ଅନୁଯାୟୀ, ରେଷ୍ଟୁରାଣ୍ଟରେ ଦୁଇ ପ୍ରକାରର ସୁପ, ସାତ ପ୍ରକାରର ଚାଟ, ୧୦ ପ୍ରକାର କୋଲ୍ଡ ସାଲାଡ, ଦୁଇ ପ୍ରକାର ଗାର୍ଲିକ ବ୍ରେଡ ଏବଂ ତିନି ପ୍ରକାରର ପିଜା ସହିତ ବିଭିନ୍ନ ପ୍ରକାରେ ଖାଦ୍ୟ ମଧ୍ୟ ପରିବେଷଣ ହେଉଛି। ଏହା ବ୍ୟତୀତ ସେମାନେ ଦକ୍ଷିଣ ଭାରତୀୟ ଏବଂ ପଞ୍ଜାବୀ ଖାଦ୍ୟ ମଧ୍ୟ ରଖିଛନ୍ତି। ମଧ୍ୟାହ୍ନ ଭୋଜନ ଆପଣଙ୍କୁ ୨୬୯ ଟଙ୍କା ଏବଂ ରାତ୍ରୀ ଭୋଜନ ପାଇଁ ୨୮୯ ଟଙ୍କା ଦେବାକୁ ପଡିବ।