ବୁଗୁଡ଼ା,୧୭ା୯(ଡି.ଏନ.ଏ.): ସମ୍ପ୍ରତି ବୁଗୁଡ଼ା ଏନ୍ଏସି ଅଧୀନ ୫ନଂ ୱାର୍ଡର ଅଙ୍ଗନୱାଡି କେନ୍ଦ୍ରରେ କର୍ମୀ ଓ ସହାୟିକାଙ୍କ ବିବାଦ ଲାଗି ରହିଛି। ଏ ନେଇ ୫ ଦିନ ହେଲା ଏନ୍ଏସି ଅନ୍ତର୍ଗତ ବିଭିନ୍ନ ଅଙ୍ଗନୱାଡି କେନ୍ଦ୍ର ବନ୍ଦ ରହିଥିବା ବେଳେ ଏଥିରେ ସ୍ଥାନୀୟ ପ୍ରଶାସନ ଏବଂ ଅଙ୍ଗନୱାଡି କର୍ମୀ ସଂଘର ଭୂମିକାକୁ ନେଇ ଚର୍ଚ୍ଚା ଜୋର ଧରିଛି। ଏହି ବିବାଦ ବହୁ ପୁରୁଣା ହୋଇଥିଲେ ବି ପ୍ରଶାସନିକ ଅପାରଗତା ଯୋଗୁ ଅଦ୍ୟାବଧି ଏହାର କୌଣସି ସ୍ଥାୟୀ ସମାଧାନ ହୋଇ ପାରୁ ନାହିଁ। ବୁଗୁଡ଼ା ଏନ୍ଏସି ଅନ୍ତର୍ଗତ ୧୮ ଅଙ୍ଗନୱାଡି କେନ୍ଦ୍ରରୁ ଅନେକ କେନ୍ଦ୍ରର ନିଜସ୍ବ ଗୃହ ନ ଥିବା ବେଳେ ସେଥିରୁ କେତେକ କେନ୍ଦ୍ର ନିକଟସ୍ଥ ବିଦ୍ୟାଳୟଗୁଡିକରେ ଚାଲୁଛି ଏବଂ ଆଉ କେତେକ କେନ୍ଦ୍ର ଅଙ୍ଗନୱାଡି କର୍ମୀ କିମ୍ବା ସହାୟିକାଙ୍କ ଘରେ ଚାଲୁଛି। ତେବେ ୱାର୍ଡ ନଂ ୫ର ଅଙ୍ଗନୱାଡି କେନ୍ଦ୍ର ସମ୍ପୃକ୍ତ କର୍ମୀଙ୍କ ଘରେ ଗତ ୨୦୦୯ରୁ ଚାଲି ଆସୁଥିବା ବେଳେ କିଛି ମାସ ହେବ କର୍ମୀ ଓ ସହାୟିକାଙ୍କ ମଧ୍ୟରେ କୌଣସି କାରଣରୁ ମନାନ୍ତର ଘଟି ବିବାଦର ସୂତ୍ରପାତ ଘଟିଥିଲା। ଏହାପରେ କିଛି ଦିନ ପାଇଁ ମୁଖ୍ୟ ସଡ଼କ ବିଦ୍ୟାଳୟକୁ ଅଙ୍ଗନୱାଡି କେନ୍ଦ୍ରଟି ସ୍ଥାନାନ୍ତର ହୋଇଥିଲେ ହେଁ ମୁଖ୍ୟ ରାସ୍ତା ପାର ହୋଇଯିବାକୁ ଶିଶୁମାନଙ୍କର ଅଭିଭାବକମାନେ ଏଥିରେ ଅସହମତ ହେବାରୁ ପରବର୍ତ୍ତୀ ସମୟରେ ପୁଣି ସେହି ଅଙ୍ଗନୱାଡି କର୍ମୀଙ୍କ ଘରକୁ କେନ୍ଦ୍ର ଫେରି ଯାଇଥିଲା ବେଳେ ଏହାକୁ ବିରୋଧ କରି ସହାୟିକା ଜଣକ କର୍ମୀଙ୍କ ଘରକୁ ନ ଯାଇ ସ୍କୁଲରେ ଆସି ବସିବା ସହ ମାସିକ ପ୍ରାପ୍ୟ ହାସଲ କରୁଥିଲେ। ଏନେଇ ସହାୟିକା ଜଣକ ଅଙ୍ଗନୱାଡି କର୍ମୀ ସଂଘର ସହାୟତା ଲୋଡିବା ପରେ ଏଥିରେ ହସ୍ତକ୍ଷେପ କରି ସଂଘ ପକ୍ଷରୁ ନିର୍ଦ୍ଧାରିତ ସମୟ ମଧ୍ୟରେ ବିବାଦର ସମାଧାନ ପାଇଁ ପ୍ରଶାସନକୁ ନିବେଦନ କରିବା ସହ ଅନ୍ୟଥା ସେମାନେ କେନ୍ଦ୍ରଗୁଡିକୁ ବନ୍ଦ କରିବା ଲାଗି ଚେତାବନୀ ଦେଇଥିଲେ। ତେବେ ପ୍ରଶାସନର ଉଦାସୀନତା ଯୋଗୁ ବିବାଦର ସମାଧାନ ହୋଇ ପାରି ନ ଥିଲା ବେଳେ ସଂଘ ସହ ଜଡିତ ନ ଥିବା କେତେକ ଅଙ୍ଗନୱାଡି କର୍ମୀଙ୍କ ବ୍ୟତୀତ ଅନ୍ୟ ସମସ୍ତ କର୍ମୀ ସେମାନଙ୍କ କେନ୍ଦ୍ରଗୁଡିକୁ ଗତ ୧୨ ତାରିଖରୁ ବନ୍ଦ ରଖିଛନ୍ତି। ତେଣୁ ଏହି ଅଭାବନୀୟ ପରିସ୍ଥିତିର ଦୂରୀକରଣ ପାଇଁ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବା ସହ ଏ ପ୍ରକାର ପ୍ରହସନକୁ ବନ୍ଦ କରିବା ଲାଗି ସାଧାରଣରେ ଦାବି ହେଉଛି।