ଆବୁଧାବି,୨୧।୯: ୟୁଏଇରେ ପ୍ରଥମ ମ୍ୟାଚ୍ରେ ଉଲ୍ଲେଖନୀୟ ବୋଲିଂ କରି ଆଲୋଚକଙ୍କ ମୁହଁ ବନ୍ଦ କରିଦେଇଛନ୍ତି ମିଷ୍ଟ୍ରି ସ୍ପିନର ବରୁଣ ଚକ୍ରବର୍ତ୍ତୀ। ବରୁଣ ଆର୍ସିବି ବିପକ୍ଷ ମ୍ୟାଚ୍ରେ ବୋଲିଂ କରି ମାତ୍ର ୧୩ ରନ୍ ଦେଇ ୩ ଉଇକେଟ ନେଇଥିଲେ। ବ୍ୟାଟ୍ସମ୍ୟାନ୍ମାନଙ୍କୁ ରନ୍ କରିବାକୁ ଦେଇ ନ ଥିବାରୁ ଆର୍ସିବି ୧୯ ଓଭରରେ ମାତ୍ର ୯୨ ରନ୍ କରି ଅଲ୍ଆଉଟ୍ ହୋଇଥିଲେ। ଏହାକୁ ନେଇ ବରୁଣଙ୍କୁ ‘ମ୍ୟାନ୍ ଅଫ୍ ଦ ମ୍ୟାଚ୍’ ଭାବେ ଚୟନ କରାଯାଇଥିଲା।
୨୦୨୦ରେ ୟୁଏଇରେ ଖେଳାଯାଇଥିବା ଆଇପିଏଲ୍ରେ ଭଲ ପ୍ରଦର୍ଶନ କରିଥିଲେ ବରୁଣ। ସେ ପୁଣିଥରେ ଆଇପିଏଲ୍ ଦ୍ୱିତୀୟ ପର୍ଯ୍ୟାୟ ଆରମ୍ଭରୁ ନିଜର କମାଲ ଦେଖାଇଥିବାରୁ ତାଙ୍କ ପ୍ରଶଂସାରେ ଶତମୁଖ ହୋଇଛନ୍ତି ଆର୍ସିବି ଅଧିନାୟକ ବିରାଟ କୋହଲି। ମ୍ୟାଚ୍ ଶେଷ ହେବା ପରେ କୋହଲି କହିଛନ୍ତି, ବରୁଣ ଭାରତ ପାଇଁ ଯେତେବେଳେ ଖେଳିବେ, ସେ ଏକ୍ସ ଫ୍ୟାକ୍ଟର ପାଲଟିବେ। ଯେଉଁ ଯୁବ ଖେଳାଳିମାନଙ୍କୁ ଅନ୍ତର୍ଜାତୀୟ କ୍ରିକେଟ ଖେଳିବାକୁ ସୁଯୋଗ ମିଳିଛି ସେମାନଙ୍କୁ ଏହି ଲିଗ୍ରେ ଭଲ ପ୍ରଦର୍ଶନ କରୁଥିବା ଦେଖିବାକୁ ଇଚ୍ଛା। ଏହାଦ୍ୱାରା ଭାରତୀୟ ଟିମ୍ ମଜଭୂତ ହେବ। ବରୁଣ ଭବିଷ୍ୟତରେ ଭାରତ ପାଇଁ ଖେଳିବେ। ଏହା ଭଲ ସଙ୍କେତ ବୋଲି କୋହଲି କହିଛନ୍ତି।