ଆଜିକାଲି ଘରର ସୁନ୍ଦରତା ବୃଦ୍ଧି କରିବା ଲାଗି ଲୋକମାନେ ଅନେକ ପ୍ରକାରର ଗଛ ଲଗାଉଛନ୍ତି। ବାସ୍ତୁଶାସ୍ତ୍ର ଅନୁସାରେ ଏଭଳି ଏକ ଗଛ ରହିଛି ଯାହାକୁ ଲଗାଇଲେ ଘରର ସୌନ୍ଦର୍ଯ୍ୟ ସାଙ୍ଗକୁ ଆର୍ଥିକ ସ୍ଥିତିରେ ସୁଧାର ଆସିଥାଏ। ସେଇଟି ହେଲା ମନି ପ୍ଲାଣ୍ଟ। ତେବେ କିଭଳି ଏବଂ କେଉଁ ଦିଗରେ ଲଗାଇବା ଠିକ୍ ତାହା ଜାଣି ନ ଥିବା ଲୋକ ମନଇଚ୍ଛା ଯେଉଁଠି ଚାହାନ୍ତି ଏହାକୁ ଲଗାଇ ଦେଇଥାନ୍ତି। ହେଲେ ମନି ପ୍ଲାଣ୍ଟକୁ ଲଗାଇବାର କିଛି ନିୟମ ରହିଛି। ଆସନ୍ତୁ ଜାଣିବା:-
-ବାସ୍ତୁଶାସ୍ତ୍ର ଅନୁଯାୟୀ ମନି ପ୍ଲାଣ୍ଟକୁ ଘରର ଅଗ୍ନିକୋଣରେ ଲଗାଇବା ସବୁଠାରୁ ଭଲ। ଏହି ଦିଗରେ ଗଛ ଲଗାଇଲେ ଘରେ ସକରାତ୍ମକ ଶକ୍ତି ବାସ କରିଥାଏ। ଆର୍ଥିକ ସ୍ଥିତିରେ ସୁଧାର ଆସିଥାଏ।
-ମନିପ୍ଲାଣ୍ଟକୁ କେବେହେଲେ ଉତ୍ତରପୂର୍ବ ଭାଗରେ ଲଗାନ୍ତୁ ନାହିଁ। ଏହା କରିବା ଦ୍ୱାରା ନକରାତ୍ମକ ପ୍ରଭାବ ପଡ଼ିଥାଏ। ଏହି ଦିଗର ପ୍ରତିନିଧିତ୍ୱ ବୃହସ୍ପତି କରିଥାନ୍ତି ଶୁକ୍ର ଏବଂ ବୃହସ୍ପତି ପରସ୍ପରର ବିରୋଧି। ଏଣୁ ଏହି ଦିଗରେ ମନି ପ୍ଲାଣ୍ଟ ଲଗାଇବା ହାନିକାରକ।
-ଘରର ପୂର୍ବ ନଚେତ ପଶ୍ଚିମ ଦିଗରେ ମନି ପ୍ଲାଣ୍ଟ ଲଗାନ୍ତୁ ନାହିଁ। ଏହି ଦିଗରେ ମନି ପ୍ଲାଣ୍ଟ ଲଗାଇଲେ ମାନସିକ ଚିନ୍ତା ବୃଦ୍ଧି ପାଇବା ସାଙ୍ଗକୁ ସମ୍ପର୍କରେ ମତଭେଦ ଦେଖାଦେଇଥାଏ। ଏଣୁ ଭୁଲ୍ରେ ବି ଏହି ଦିଗରେ ଏହି ଗଛ ଲଗାନ୍ତୁ ନାହିଁ।
-ବାସ୍ତୁ ଅନୁଯାୟୀ ମନି ପ୍ଲାଣ୍ଟର ଲତା ମାଟି ଛୁଇଁଲେ ଅଶୁଭ। ଏହା ସୁଖ-ସମୃଦ୍ଧିକୁ ରୋକିଦେଇଥାଏ। ଏଣୁ ସବୁବେଳେ ଏହାକୁ ଉପରକୁ ଟେକିକରି ଲଗାନ୍ତୁ।
-ବାସ୍ତୁ ଅନୁସାରେ ମନି ପ୍ଲାଣ୍ଟକୁ ଦକ୍ଷିଣ ପୂର୍ବ ଦିଗରେ ଲଗାଇବା ଶୁଭ। ଏହାଦ୍ୱାରା ଆର୍ଥିକ ସ୍ଥିତିରେ ସୁଧାର ଆସିଥାଏ। ଘରେ ସୁଖଶାନ୍ତି ବଜାୟ ରହିବା ପାଇଁ ମନି ପ୍ଲାଣ୍ଟକୁ ଦଉଡ଼ି ନଚେତ ବାଡ଼ି ସାହାଯ୍ୟରେ ବାନ୍ଧି ଦିଅନ୍ତୁ। ଏହାଦ୍ୱାରା ଆପଣଙ୍କ ମାନସମ୍ମାନ ବଢ଼ିବା ସହ ଟଙ୍କାପଇସାରେ ବୃଦ୍ଧି ହୋଇଥାଏ।
-ମନିପ୍ଲାଣ୍ଟର ପତ୍ର ଶୁଖିଯାଇଥିଲେ ତାକୁ ଶୀଘ୍ର କାଢ଼ି ଦିଅନ୍ତୁ। ଏହାଛଡ଼ା ରବିବାର ଦିନ ଏହି ଗଛରେ ପାଣି ଦିଅନ୍ତୁ ନାହିଁ। ଯଦି ପାଣି ଦିଅନ୍ତି ତେବେ ସେଥିରେ ଟିକିଏ କ୍ଷୀର ମିଶାଇପାରିବେ। ଏପରି କରିବା ଦ୍ୱାରା ଆର୍ଥିକ ସ୍ଥିତିରେ ସୁଧାର ଆସିପାରେ।
-ମନି ପ୍ଲାଣ୍ଟକୁ କେବେହେଲେ ଘର ବାହାରେ ଲଗାଇବା ଉଚିତ ନୁହେଁ। ଏହାକୁ ସବୁବେଳେ ଘର ଭିତରେ ରଖିବା ଉଚିତ । ଲୋକମାନଙ୍କ ଦୃଷ୍ଟି ଯେପରି ଏହା ଉପରେ ନ ପଡ଼ିବ ତାହା ଦେଖିବା ଉଚିତ। କାରଣ ଖରାପ ଦୃଷ୍ଟି ପଡ଼ିଲେ ଏହି ଗଛ ଶୁଖି ଯାଇଥାଏ। ଏଣୁ ଲୋକଙ୍କ ଦୃଷ୍ଟିରୁ ଅଲଗା ଏହି ଗଛକୁ ଲଗାଇବା ଉଚିତ।