ଭୁବନେଶ୍ୱର,୧୮।୬: ଦେଶର ପ୍ରମୁଖ ଘରୋଇ ସଂସ୍ଥା ତଥା ବେଦାନ୍ତ ଗ୍ରୁପ୍ର ପ୍ରମୁଖ କମ୍ପାନୀ ବେଦାନ୍ତ ଆଇରନ ଓର୍ ଓଡ଼ିଶା (ଆଇଓଓ)ର ନୂତନ ଅଭିଯାନ ସମ୍ପର୍କରେ ଘୋଷଣା କରାଯାଇଛି। ଏପରିକି କମ୍ପାନୀର ଲୋକପ୍ରିୟ ପ୍ରକଳ୍ପ ତଥା ପ୍ରୋଜେକ୍ଟ ‘ଜୀଭିକା’ର ଏକ ଅଂଶ ଭାବେ ଏହି ଅଭିଯାନ ଆରମ୍ଭ କରାଯାଇଥିଲାବେଳେ ନାଡ଼ିଡିହ ଏବଂ ରେଙ୍ଗାଲବେଡ଼ା ଗାଁର ୬ଟି ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)ର ମିଳିତ ସହଯୋଗରେ ବେଦାନ୍ତ ଆଇଓଓ ୬ଟି ନୂତନ ଛତୁଚାଷ ୟୁନିଟ୍ ପ୍ରତିଷ୍ଠା କରିଛି। ବିଶେଷ କରି ଏହା ମହିଳା ଗୋଷ୍ଠୀର ସଦସ୍ୟମାନଙ୍କୁ ଉଦ୍ୟୋଗିକ ସହାୟତା ଯୋଗାଇବା ସହିତ ସ୍ଥାୟୀ ଜୀବିକା ନିର୍ବାହ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ ବୋଲି କୁହାଯାଉଛି।
ଏହି ପରିପ୍ରେକ୍ଷୀରେ ଗୋଷ୍ଠୀର ସଦସ୍ୟ, ଏନ୍ଜିଓ ପାର୍ଟନର ପୁନରୁଥାନ ଏବଂ ବେଦାନ୍ତ ଆଇଓଓର ସିଏସ୍ଆର୍/ଇଆର୍ ମୁଖ୍ୟ ସମ୍ବିତ ନାୟକ ଓ ଅନ୍ୟମାନେ ଯୋଗ ଦେଇଥିଲେ।
ଉଲ୍ଲେଖଯୋଗ୍ୟ, ଓୟୁଏଟି ଭୁବନେଶ୍ୱରର ଶିଶିର କୁମାର ମହନ୍ତଙ୍କ ନେତୃତ୍ୱରେ ଏକ ବିସ୍ତୃତ ଦିନିକିଆ ତାଲିମ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ମହନ୍ତଙ୍କ ବହୁ ଅଭିଜ୍ଞତା ଆଧାରରେ ତାଲିମ କାର୍ଯ୍ୟ ବେଶ୍ ସଫଳ ରହିଥିଲା। ଏହି ପ୍ରଶିକ୍ଷଣ ଅଧିବେଶନରେ ପ୍ରକଳ୍ପର ମହତ୍ତ୍ୱ ଏବଂ ମହିଳା ଗୋଷ୍ଠୀ ମଧ୍ୟରେ ସ୍ଥାୟୀ ଜୀବିକା ଓ ଔଦ୍ୟୋଗିକ ପ୍ରୋତ୍ସାହନ କରିବା ପାଇଁ ସାମର୍ଥ୍ୟ ଉପରେ ଗୁରୁତ୍ୱାରୋପ କରାଯାଇଥିଲା। ଏ ସମ୍ପର୍କରେ ଆଇରନ ଓର୍ ଓଡ଼ିଶା,ବେଦାନ୍ତ ସେସା ଗୋଆର ସିଓଓ ବିଶ୍ୱନାଥ ସାହୁ କହିଥିଲେ, ପ୍ରୋଜେକ୍ଟ ଜୀଭିକା ମାଧ୍ୟମରେ ଆମେ ଜୈବିକ ଚାଷ ପ୍ରତି ଆଗ୍ରହୀ ଏବଂ ଛତୁ ଉପତ୍ାଦନରେ ଓଡ଼ିଶାକୁ ଆତ୍ମନିର୍ଭରଶୀଳ କରିବାରେ ସହଯୋଗ କରୁଥିବା ବ୍ୟକ୍ତିବିଶେଷଙ୍କୁ ସମର୍ଥନ କରିବାକୁ ଲକ୍ଷ୍ୟ ରଖିଛୁ। ସେହିଭଳି ଆମେ ଯେଉଁଠାରେ କାର୍ଯ୍ୟ କରୁଛୁ, ସେଠାକାର ବା ସ୍ଥାନୀୟ ମହିଳା ଉଦ୍ୟୋଗୀଙ୍କୁ ସଶକ୍ତୀକରଣ କରିବାକୁ ପ୍ରୟାସ କରୁଛୁ। ମହିଳା ଗୋଷ୍ଠୀଗୁଡ଼ିକ ସ୍ଥାୟୀ ବିକାଶ ଏବଂ ଅର୍ଥନୈତିକ ଅଭିବୃଦ୍ଧିର ଦୃଷ୍ଟିକୋଣ ସହ ସମ୍ପୂର୍ଣ୍ଣ ଭାବେ ସଜାଗ ହୋଇ ରହିଛନ୍ତି।