ସମ୍ବଲପୁର,୧୫ା୯(ବ୍ୟୁରୋ):ରାଜ୍ୟ ସରକାର କମ୍ପାନୀ ପ୍ରତି ଅହେତୁକ ଅନୁକମ୍ପା ଦେଖାଉଥିବା ନେଇ ଅଭିଯୋଗ ହୋଇଆସୁଛି। ଝାରସୁଗୁଡ଼ା ଜିଲାରେ ଥିବା ବେଦାନ୍ତ ଆଲୁମିନିୟମ କମ୍ପାନୀକୁ ଚଞ୍ଚକତା କରି ଜଳକର ଛାଡ କରାଯାଇଥିବା ନେଇ ଆଉ ଏକ ଅଭିଯୋଗ ଏଥିରେ ଯୋଡିହୋଇଛି। ବେଦାନ୍ତ କମ୍ପାନୀ ଆରମ୍ଭରୁ ଜଳକର ଦେବାରେ ବିଳମ୍ବ କରିବା ସହ ବିବାଦରେ ରହିଆସିଛି। ଏପରିସ୍ଥଳେ ରାଜ୍ୟ ଜଳସମ୍ପଦ ବିଭାଗ ପକ୍ଷରୁ ନଭେମ୍ବର ୨୦୨୦ରେ ଏକକାଳୀନ ଟିକସ ପ୍ରଦାନ (ଓଟିଏସ୍) ବ୍ୟବସ୍ଥା କରାଯାଇଥିଲା। ଏ ନେଇ ଜଳସମ୍ପଦ ବିଭାଗ ଇଞ୍ଜିନିୟର ଇନ୍ ଚିଫ୍ ଜ୍ୟୋତିର୍ମୟ ରଥଙ୍କ ହସ୍ତାକ୍ଷର ଥିବା ଚିଠି (ନଂ. ୨୦୦୯୦, ସେପ୍ଟେମ୍ବର ୨୨, ୨୦୨୦) କରାଯାଇଛି। ଏହା ଆଧାରରେ କମ୍ପାନୀର ୨ କୋଟି ୭ ଲକ୍ଷ ୫ ହଜାର ଟଙ୍କା ଜଳକର ଛାଡ କରାଯାଇଥିଲା। ଏହି ଚିଠିର ନକଲ ଧରିତ୍ରୀର ହସ୍ତଗତ ହୋଇଛି।
ଅନ୍ୟପକ୍ଷେ ୨୦୨୦ ମାର୍ଚ୍ଚ ୩୧ ତାରିଖ ସୁଦ୍ଧା ବେଦାନ୍ତର ଜଳକର, ସୁଧ ଓ ଜରିମାନା ମିଶି ୧୦ କୋଟି ୮ ଲକ୍ଷ ୬୮ ହଜାର ଟଙ୍କା ବକେୟା ରହିଥିଲା। ଟଙ୍କା ଦେବାରେ ଖିଲାପ କରିଥିବା ସତ୍ତ୍ୱେ କମ୍ପାନୀକୁ ହୀରାକୁଦ ଜଳଭଣ୍ଡାରରୁ ପାଣି ନେବା ଉପରେ ରୋକ ଲଗାଯାଇ ନ ଥିଲା। ଏଥିରୁ ଚଞ୍ଚକତା କରି କମ୍ପାନୀକୁ ଓଟିଏସ୍ରେ ସାମିଲ କରାଯାଇଥିବା ସ୍ପଷ୍ଟ ହେଉଛି। ବେଦାନ୍ତ କମ୍ପାନୀ ପୂର୍ବରୁ ମଧ୍ୟ ଜଳକର ଦେବାରେ ଖିଲାପ କରିଥିବା ଜଣାପଡିଛି। ବେଦାନ୍ତ ଭଳି ବୃହତ୍ କମ୍ପାନୀକୁ ଅନେକ କୋଟି ଟଙ୍କା ଛାଡ କରାଯାଉଥିବାବେଳେ ଗରିବ ଚାଷୀଙ୍କୁ ଗୋଟିଏ ଟଙ୍କା ମଧ୍ୟ ଛାଡ଼ କରାଯାଉନାହିଁ। ଜମିର ଖଜଣା ଦେବା ସମୟରେ ରାଜସ୍ବ ବିଭାଗ ଜଳକର ମିଶାଇ ନେଇଯାଉଛି। ଏପରି କି ଚାଷୀ ନ ଦେଲେ ଜମିରେ ନାଲି ଝଣ୍ଡା ଲଗାଇବା ଭଳି ଘଟଣା ଦେଖାଯାଉଛି। ସୂଚନାଯୋଗ୍ୟ, ଝାରସୁଗୁଡ଼ାର ବେଦାନ୍ତ କମ୍ପାନୀ ସମ୍ବଲପୁର ପିତାପାଲିଠାରେ ପମ୍ପ୍ହାଉସ କରି ହୀରାକୁଦ ଜଳଭଣ୍ଡାରରୁ ପାଣି ନେଉଛି। ଜଳଭଣ୍ଡାରରୁ ପାଣି ନେବା ସମୟରେ ବିରୋଧ ହୋଇଥିଲା। ପରେ ପ୍ରଶାସନ ପକ୍ଷରୁ ବଳପୂର୍ବକ ଜଳଭଣ୍ଡାରରୁ ପାଣି ଯୋଗାଇଦେବା ବ୍ୟବସ୍ଥା ହୋଇଥିଲା। ଏ ସମ୍ପର୍କରେ ହୀରାକୁଦ ଜଳଭଣ୍ଡାର ଅତିରିକ୍ତ ମୁଖ୍ୟଯନ୍ତ୍ରୀ ନିରାକାର ବିଶି କହିଛନ୍ତି, ଓଟିଏସ୍ ବ୍ୟବସ୍ଥା ଆମ କାର୍ଯ୍ୟାଳୟରୁ ହୋଇ ନ ଥାଏ। କମ୍ପାନୀର ଜଳକର ଛାଡ ହୋଇଥିବା ନେଇ ସେ ଜାଣିନାହାନ୍ତି ବୋଲି କହିଥିଲେ।