ଭୁବନେଶ୍ୱର,୨୯।୧୨: ବେଦାନ୍ତ ଆଲୁମିନିୟମର ଓଡ଼ିଶା ୟୁନିଟ୍ ପକ୍ଷରୁ ଏକ ୨ ଦିନିଆ ‘ସିଏସ୍ଆର୍ କ୍ୟାମ୍ପେନିଂ’ କାର୍ଯ୍ୟକ୍ରମର ଶୁଭାରମ୍ଭ କରାଯାଇଛି। ଏପରିକି କମ୍ପାନୀର କର୍ପୋରେଟ ସାମାଜିକ ଦାୟିତ୍ୱବୋଧ (ସିଏସ୍ଆର୍) କାର୍ଯ୍ୟକ୍ରମ ଅଧୀନରେ ଓଡ଼ିଶାର କୋରାପୁଟ ଓ ରାୟଗଡ଼ା ଜିଲାର ବିଭିନ୍ନ ବ୍ଲକର ବୃଦ୍ଧ ଓ ଅସହାୟ ଲୋକମାନଙ୍କୁ ଶୀତ ବସ୍ତ୍ର ଓ କମ୍ବଳ ବଣ୍ଟନ କରାଯାଇଥିଲା। ବିଶେଷକରି ଉଭୟ ଜିଲାର ଦଶମନ୍ତପୁର, କାଶୀପୁର ଓ ଲକ୍ଷ୍ମୀପୁର ବ୍ଲକର ୫୦ରୁ ଅଧିକ ଗ୍ରାମ ସହ ୭୫୦ରୁ ଅଧିକ ଲୋକଙ୍କ ପାଖରେ କମ୍ପାନୀର ଉକ୍ତ କାର୍ଯ୍ୟକ୍ରମ ପହଞ୍ଚତ୍ଥିଲା।
ଏ ସମ୍ପର୍କରେ ବେଦାନ୍ତ ଆଲୁମିନିୟମର ସିଇଓ (ମାଇନ୍ସ) ଭି. ଶ୍ରୀକାନ୍ତ କହିଛନ୍ତି, ସ୍ଥାନୀୟ ଗୋଷ୍ଠୀଙ୍କୁ ନିରନ୍ତର ସହାୟତା ଯୋଗାଇଦେବା ଉଦ୍ଦେଶ୍ୟରେ କମ୍ପାନୀର ଏଭଳି ଅନେକ କାର୍ଯ୍ୟକ୍ରମର ଡିଜାଇନ କରାଯାଇଛି।
ବିଶେଷକରି କୋରାପୁଟ ଓ ରାୟଗଡ଼ା ଜିଲାର ଶୀତ ପରିସ୍ଥିତିକୁ ଧ୍ୟାନରେ ରଖି ଆମେ ଆମର ଏହି ଶୀତ ପ୍ରସ୍ତୁତି ଅଭିଯାନ ଆରମ୍ଭ କରୁଛି। ଏହାଦ୍ୱାରା ଆମେ ବୃଦ୍ଧ ଓ ଅସହାୟ ଲୋକମାନଙ୍କୁ ଗରମ ପୋଷାକ ଓ ଶୀତବସ୍ତ୍ର ବଣ୍ଟନ କରିବାକୁ ଲକ୍ଷ୍ୟ ରଖିଛୁ। ସେହିପରି ସମାଜରେ ସାମୂହିକ ସ୍ବାସ୍ଥ୍ୟ ଓ ସୁସ୍ଥତାକୁ ବଜାୟ ରଖିବା ଲାଗି ଆମେ ଦୂର ଗ୍ରାମଗୁଡ଼ିକରେ ମୋବାଇଲ ସ୍ବାସ୍ଥ୍ୟ ୟୁନିଟ୍, ଆମ୍ବୁଲାନ୍ସ ସେବା ଜରିଆରେ ବିଭିନ୍ନ ସ୍ବାସ୍ଥ୍ୟ ଯତ୍ନ କାର୍ଯ୍ୟକ୍ରମ ପରିଚାଳନା କରୁଛୁ। ଅପରପକ୍ଷରେ ଲକ୍ଷ୍ମୀପୁର ବିଧାୟକ ପ୍ରଭୁ ଜାନି କହିଥିଲେ, ଆମ ଅଞ୍ଚଳରେ ଅତ୍ୟଧିକ ଶୀତ ଅନୁଭୂତ ହୋଇଥାଏ। ବିଶେଷକରି ଗରିବ ଲୋକମାନେ ବହୁ କଷ୍ଟ ସହିଥାନ୍ତି। ଏଭଳି ସମୟରେ ଲୋକମାନଙ୍କୁ ସାହାଯ୍ୟ କରିବା ଓ ସେମାନଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣିବାରେ ବେଦାନ୍ତର ଏଭଳି ପ୍ରଚେଷ୍ଟାକୁ ମୁଁ ଧନ୍ୟବାଦ ଜଣାଉଛି। ଏହି ପରିପ୍ରେକ୍ଷୀରେ ଦଶମନ୍ତପୁର ବ୍ଲକ ଉପାଧ୍ୟକ୍ଷ ଅରୁଣ କୁମାର ଚେଠି, ବିଡିଓ ଡମ୍ବରୁଧର ମଲ୍ଲିକଙ୍କ ସମେତ ମୁରାକାର ପଞ୍ଚାୟତ ସରପଞ୍ଚ ତଥା ପଞ୍ଚାୟତ ସମିତି ସଦସ୍ୟ ଓ ଅନ୍ୟମାନେ ଉପସ୍ଥିତ ଥିଲେ।
